ପୋଷ୍ଟାଲ୍ ଚାକିରି ନାଁରେ କୋଟିଏ ଟଙ୍କା ଠକେଇ ମାମଲା: ଧୂର୍ତ୍ତ ଓ ସହଯୋଗୀ ଗିରଫ
ନକଲି ଷ୍ଟାମ୍ପ୍, ନିଯୁକ୍ତିପତ୍ର, ସର୍ଭିସ୍ ବୁକ୍ ଜବତ, ଠକାମିରେ ଫସି ପାଲଟିଗଲା ଠକ, ଗଣମାଧ୍ୟମ ଆଗରେ କାନ୍ଦିଲା ବିକି
ଭୁବନେଶ୍ବର: ପିଏମ୍ଜି ଓ ରାଜ୍ୟର ଅନ୍ୟାନ୍ୟ ପୋଷ୍ଟ ଅଫିସ୍ରେ ନିଯୁକ୍ତି ଦେବାକୁ କହି ପ୍ରାୟ ୧୨ ଜଣ ଯୁବକଙ୍କଠାରୁ କୋଟିଏ ଟଙ୍କା ଠକି ନେଇଥିବା ଜଣେ ଧୂର୍ତ୍ତକୁ ଗିରଫ କରିଛି କମିସନରେଟ୍ ପୁଲିସ। ଅଭିଯୁକ୍ତ ହେଲା ଯାଜପୁର ସଦର ଥାନା ଏରବାଙ୍କ ଅଞ୍ଚଳର ଦେବୀପ୍ରସାଦ ବିଶ୍ବାଳ ଓରଫ୍ ବିକି(୨୪)। ଏହି ଠକେଇରେ ବିକିକୁ ନକଲି ଷ୍ଟାମ୍ପ, ନିଯୁକ୍ତିପତ୍ର ଓ ସର୍ଭିସ୍ ବୁକ୍ ପ୍ରସ୍ତୁତ କରାଇବାରେ ସହଯୋଗ କରୁଥିବା ଶୁଭେନ୍ଦୁ ଜେନା(୪୦)କୁ ମଧ୍ୟ ଗିରଫ କରାଯାଇଛି। ଶୁଭନ୍ଦେୁର ଘର ଯାଜପୁର ଟାଉନ୍ ସାହିପୁର ବୋଲି ଜଣାପଡ଼ିଛି। ପୁଲିସ ସେମାନଙ୍କଠାରୁ ବିପୁଳ ରବର ଷ୍ଟାମ୍ପ, ନକଲି ନିଯୁକ୍ତିପତ୍ର, ସର୍ଭିସ୍ ବୁକ୍, ପରିଚୟ ପତ୍ର, ଜାଲ୍ ଟ୍ରେନିଂ କାଗଜପତ୍ର, ବ୍ୟାଙ୍କ ପାସବୁକ୍, ଏଟିଏମ୍ କାର୍ଡ ଓ କମ୍ପ୍ୟୁଟର ପ୍ରିଣ୍ଟର ଆଦି ଜବତ କରିଛି।
Sambad is now on WhatsApp
Join and get latest news updates delivered to you via WhatsApp
ପୁଲିସ ସୂଚନାନୁସାରେ, ବିକି ନିଜର ପରିଚୟ ବଦଳାଇ ବଡ଼ଗଡ଼ ବ୍ରିଟ୍ କଲୋନିରେ ରହୁଥିଲା। ନିଜକୁ ପିଏମ୍ଜିର ଜଣେ ଅଧିକାରୀ ବୋଲି କହୁଥିଲା। ସେଠାରେ ରହୁଥିବା ତଥା ମାମଲାର ଅଭିଯୋଗକାରୀ ସୌମ୍ୟରଞ୍ଜନ ଦାସ ଓ ତାଙ୍କ ବାପାଙ୍କ ସହ ତା’ର ଚିହ୍ନା ପରିଚୟ ହୋଇଥିଲା। ସୌମ୍ୟରଞ୍ଜନଙ୍କ ବାପାଙ୍କ ଜଣେ ସମ୍ପର୍କୀୟଙ୍କ ଘର ପାଖରେ ବିକିର ଘର। ତେଣୁ ସମ୍ପର୍କ ବଢ଼ିଥିଲା। ସୌମ୍ୟରଞ୍ଜନ ଓ ତାଙ୍କ ଭାଇ ସ୍ନାତକ ପାସ୍ କରି ଘରେ ବେକାର ବସିଥିବା ଜାଣିବାକୁ ପାଇବା ପରେ ବିକି ତାଙ୍କୁ ଚୂନ ଲଗାଇବାକୁ ଜାଲ ବିଛାଇଥିଲା। ଉଭୟଙ୍କୁ ଚାକିରି କରାଇଦେବ ବୋଲି କହି ଫସାଇଥିଲା ଓ ବିଭିନ୍ନ ପର୍ଯ୍ୟାୟରେ ସେମାନଙ୍କଠାରୁ ୨୫ ଲକ୍ଷ ଟଙ୍କା ନେଇଥିଲା। ଏମିତିକି ପିଏମ୍ଜିର ଏକ ଜାଲ୍ ନିଯୁକ୍ତିପତ୍ର ଦେଇଥିଲା। ମାତ୍ର ଦୁଇ ଭାଇ ପିଏମ୍ଜି ଯାଇ ନକଲି ନିଯୁକ୍ତିପତ୍ର ବାବଦରେ ଜାଣିବାକୁ ପାଇବା ପରେ ଠକେଇର ଶିକାର ହୋଇଥିବା ନେଇ ଖାରବେଳନଗର ଥାନାରେ ଅଭିଯୋଗ କରିଥିଲେ। ପୁଲିସ ଏମାନଙ୍କୁ ଗିରଫ କରିବା ପରେ ପ୍ରାୟ ୧୨ ଜଣ ଏମିତି ଠକାମିର ଶିକାର ହୋଇଥିବା ଜଣାପଡ଼ିଛି। ପୁଲିସ ତଦନ୍ତରୁ ବିକିର ଅନ୍ୟ ଏକ ସାଂଘାତିକ ଠକେଇ ସାମ୍ନାକୁ ଆସିଛି। ଯାଜପୁର ସଦର ଅଞ୍ଚଳର ଆଦିତ୍ୟ ନାରାୟଣ ଶତପଥୀଙ୍କୁ ଚାକିରି ଦେବା ନାଁରେ ତାଙ୍କଠୁ ୨୦ ଲକ୍ଷ ଟଙ୍କା ଓ ୫୦ ଗ୍ରାମ୍ ସୁନା ଅଳଙ୍କାର ନେଇଥିବା ଜଣାପଡ଼ିଛି। ସୁନାତକ ଏକ ଫାଇନାନ୍ସ ସଂସ୍ଥାରେ ବନ୍ଧକ ରଖି ଋଣ ଆଣିଛି। ତେବେ ଋଣ ପରିଶୋଧ କରି ନପାରିବାରୁ ଜଣେ ମହିଳା ରି-ଫାଇନାନ୍ସ କରାଇଥିବା ଜଣାପଡ଼ିଛି। ଏସଂକ୍ରାନ୍ତରେ ଯାଜପୁର ସଦର ଥାନାରେ ମାମଲା ହୋଇଥିବା ଜଣାପଡ଼ିଛି।
ଠକାମିରେ ଫସି ପାଲଟିଗଲା ଠକ
ବିକି ପୁଲିସକୁ ଦେଇଥିବା ବୟାନ ଅନୁସାରେ ସେ ଆଗ ଠକାମିର ଶିକାର ହେବା ପରେ ଠକ ପାଲଟିଯାଇଛି। ସ୍ନାତକ ପାସ୍ କରିବା ପରେ ବିକି ପାଣିକୋଇଲି ପୋଷ୍ଟ ଅଫିସର ଜଣେ କର୍ମଚାରୀଙ୍କ ସହ ପରିଚିତ ହୋଇଥିଲା। ୨ ଲକ୍ଷ ୧୦ ହଜାର ଟଙ୍କା ନେଇ ସେହି କର୍ମଚାରୀ ତାକୁ ଆସିଷ୍ଟାଣ୍ଟ ପୋଷ୍ଟମାଷ୍ଟର ନିଯୁକ୍ତିପତ୍ର ଦେଇଥିଲା। ଭବାନୀପାଟଣାରେ ତାଲିମ୍ ନେବା ପାଇଁ ସେ ମା’ଙ୍କୁ ସାଙ୍ଗରେ ଧରି ସେଠାରେ ୨ ମାସ ଡ୍ୟୁଟି କରିଥିଲା। ଏହି ୨ ମାସରେ ତା’ ଆକାଉଣ୍ଟକୁ ୧୩ ହଜାର ଟଙ୍କା ଲେଖାଏଁ ଆସିଥିଲା। କିନ୍ତୁ ପରେ ଜଣାପଡ଼ିଲା ସେ ବିପିଓ ଜରିଆରେ ଠିକା କର୍ମଚାରୀ ହିସାବରେ ସେ କାମ କରୁଥିଲା। ଏମିତି ଠକାମିର ଶିକାର ହେବା ପରେ ସେ ଏହି ଠକେଇ କୌଶଳକୁ ଆପଣାଇଥିଲା। ବିକିକୁ ଏଥିରେ ଶୁଭେନ୍ଦୁ ସହଯୋଗ କରୁଥିଲା। ଜାଲ୍ ନିଯୁକ୍ତିପତ୍ର ତିଆରି କରିବାରେ ଶୁଭେନ୍ଦୁ ସହଯୋଗ କରୁଥିଲା।
ଗଣମାଧ୍ୟମ ଆଗରେ କାନ୍ଦିଲା ବିକି
ଆଜି ଗଣମାଧ୍ୟମ ସମ୍ମୁଖରେ ବିକି ଭୋ ଭୋ ହୋଇ କାନ୍ଦିଥିଲା। ଭୁଲ୍ ସ୍ବୀକାର କରିବା ସହ ଜେଲ୍ରୁ ବାହାରିବା ପରେ ସମସ୍ତଙ୍କ ଟଙ୍କା ଫେରାଇବ ବୋଲି କହିଥିଲା। ଏମିତିକି ଏଣିକି ସେ ଜଣେ ଭଲ ମଣିଷ ହେବ ବୋଲି କାନ୍ଦିକାନ୍ଦି କହୁଥିଲା। ଲୋଭର ବଶବର୍ତ୍ତୀ ହୋଇ ସେ ଏସବୁ ଭୁଲ୍ କରିଛି ବୋଲି ମାନିଥିଲା।