କେନ୍ଦ୍ରାପଡ଼ା : ହୁକିଟୋଲାରୁ ପିକନିକ୍ ସାରି ଫେରୁଥିବା ବେଳେ ମହାନଦୀରେ ବୁଡ଼ିଲା ଡଙ୍ଗା, ୧ ମୃତ, ୭ ନିଖୋଜ
କେନ୍ଦ୍ରାପଡ଼ା: କେନ୍ଦ୍ରାପଡ଼ାର ଜମ୍ବୁଥାନା ଅନ୍ତର୍ଗତ ନିପାଣିଆ ନିକଟରେ ଘଟିଛି ବଡ଼ ଅଘଟଣ। ମହାନଦୀରେ ଡଙ୍ଗା ବୁଡ଼ି ଜଣଙ୍କର ମୃତ୍ୟୁ ହୋଇଥିବା ବେଳେ ୭ ଜଣ ନିଖୋଜ ଅଛନ୍ତି। ମୃତକଙ୍କ ନାମ ପ୍ରଭାତୀ ସ୍ୱାଇଁ ବୋଲି ଜଣାପଡ଼ିଛି। କୁଜଙ୍ଗ ଅଂଚଳର ହସିଣା ନିବାସୀ ହେଉଛନ୍ତି ପ୍ରଭାତୀ। ଘଟଣାସ୍ଥଳରେ ବନ ବିଭାଗ, ପ୍ରଶାସନ ଓ ଅଗ୍ନିଶମ ବାହିନୀ ପହଞ୍ଚିଥିବା ଜଣାପଡ଼ିଛି। ଏଥିସହ ଡାକ୍ତରୀ ଦଳ ପହଞ୍ଚି ଉଦ୍ଧାର ହୋଇଥିବା ଯାତ୍ରୀଙ୍କୁ ପ୍ରାଥମିକ ଚିକିତ୍ସା କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁସାରରେ, କେନ୍ଦ୍ରାପଡ଼ା ଜିଲ୍ଲାର ହୁକିଟୋଲା ବତୀଘରକୁ କୁଜଙ୍ଗ ଅଞ୍ଚଳର ମହିଳା ଓ ଶିଶୁଙ୍କ ସମେତ ପ୍ରାୟ ୪୫ଜଣ ପିକ୍ନିକ୍ କରିବାକୁ ଯାଇଥିଲେ। ପିକନିକ ସାରି ସଂଧ୍ୟାରେ ସେମାନେ ଫେରୁଥିବା ସମୟରେ ନଈରେ ବଡ଼ ବଡ଼ ଢ଼େଉ ଆସିବାରୁ ମହାନଦୀ ମୁହାଣ ନିକଟରେ ଡଙ୍ଗାଚାଳକ ଡଙ୍ଗାର ଭାରସାମ୍ୟ ରକ୍ଷା କରିପାରି ନ ଥିଲେ, ଫଳରେ ଡଙ୍ଗାଟି ବୁଡ଼ି ଯାଇଥିଲା। ଏଥିରେ ବସିଥିବା ସମସ୍ତ ଯାତ୍ରୀ ପାଣିରେ ପଡ଼ି ଯାଇଥିଲେ।
ଏହା ପରେ ପାଖରେ ଥିବା ମତ୍ସ୍ୟଜୀବୀ ଓ ଅନ୍ୟ ଡଙ୍ଗାଚାଳକ ଉଦ୍ଧାରରେ ଲାଗି ପଡ଼ିଥିଲେ। ତେବେ ସଂପୂର୍ଣ୍ଣ ଅନ୍ଧକାର ହୋଇଯିବାରୁ ଉଦ୍ଧାର କାର୍ଯ୍ୟ ହୋଇପାରି ନ ଥିଲା। ଏଯାବତ୍ ଘଟଣାସ୍ଥଳକୁ ଜଣେ ବୟସ୍କ ବ୍ୟକ୍ତିଙ୍କ ଶବ ମିଳିଥିବା ବେଳେ ୭ ଜଣ ନିଖୋଜ ଅଛନ୍ତି। ନିଖୋଜ ଥିବା ଯାତ୍ରୀଙ୍କ ମଧ୍ୟରୁ ଅଧିକାଂଶ ଶିଶୁ ବୋଲି ପ୍ରାଥମିକ ସୂଚନାରୁ ଜଣାପଡ଼ିଛି।