ବିଶ୍ୱକୁ ଜଣାଇବା ପୂର୍ବରୁ ପାକିସ୍ତାନକୁ ଜଣାଇଥିଲି: ପ୍ରଧାନମନ୍ତ୍ରୀ
ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି ଯେ ସେ ପଛପଟୁ ଆକ୍ରମଣ କରିବାରେ ବିଶ୍ୱାସ କରନ୍ତି ନାହିଁ ଏବଂ ସେ ପ୍ରଥମେ ପାକିସ୍ତାନର ବାଲାକୋଟରେ ଥିବା ଆତଙ୍କବାଦୀ ଶିବିର ଉପରେ ହୋଇଥିବା ଏୟାର ଷ୍ଟ୍ରାଇକ୍ ବିଷୟରେ ପାକିସ୍ତାନୀ କର୍ତ୍ତୃପକ୍ଷଙ୍କୁ ଜଣାଇଥିଲେ। କର୍ଣ୍ଣାଟକର ବାଗଲକୋଟରେ ସୋମବାର ଏକ ରାଲିକୁ ସମ୍ବୋଧିତ କରି ସେ କହିଛନ୍ତି, ମୁଁ ସେନାକୁ କହିଥିଲି ଯେ ଭାରତର କାର୍ଯ୍ୟାନୁଷ୍ଠାନ ନେଇ ମୁଁ ପାକିସ୍ତାନୀ କର୍ତ୍ତୃପକ୍ଷଙ୍କୁ ଫୋନ୍ ମାଧ୍ୟମରେ ଜଣାଇବି। କିନ୍ତୁ ସେମାନେ ଫୋନ୍ ଉଠାଇ ନ ଥିଲେ। ତେଣୁ ମୁଁ ସେନାକୁ ଅପେକ୍ଷା କରିବାକୁ କହିଥିଲି। ମୁଁ ପାକିସ୍ତାନ କର୍ତ୍ତୃପକ୍ଷଙ୍କୁ ଜଣାଇବା ପରେ ଆମେ ରାତିରେ ଏୟାର ଷ୍ଟ୍ରାଇକ୍ କରିଥିଲୁ ଏବଂ ପରେ ସେ ବିଷୟରେ ଦୁନିଆ ଆଗରେ ପ୍ରକାଶ କରିଥିଲୁ। ‘ମୋଦୀ ଜିନିଷ ଲୁଚାଇବାରେ ବିଶ୍ୱାସ କରନ୍ତି ନାହିଁ କି ପିଠିପଟୁ ଆକ୍ରମଣ କରନ୍ତି ନାହିଁ’ ବୋଲି ସେ କହିଛନ୍ତି।
Sambad is now on WhatsApp
Join and get latest news updates delivered to you via WhatsApp
୨୦୧୯ ଫେବ୍ରୁଆରି ୨୬ତାରିଖରେ ଭାରତୀୟ ବାୟୁସେନା ପକ୍ଷରୁ ପାକିସ୍ତାନରେ ଥିବା ଆତଙ୍କବାଦୀ ଆଶ୍ରୟସ୍ଥଳୀ ଉପରେ ଏୟାର୍ ଷ୍ଟ୍ରାଇକ୍ ହୋଇଥିଲା। ୨୦୧୯ ଫେବ୍ରୁଆରି ୧୪ରେ ଜମ୍ମୁ-କାଶ୍ମୀରର ପୁଲଵାମାରେ ଭାରତୀୟ ଅର୍ଦ୍ଧସାମରିକ ବାହିନୀର ଯବାନଙ୍କ ଉପରେ ହୋଇଥିବା ଆତଙ୍କବାଦୀ ଆକ୍ରମଣର ଜବାବରେ ଏହି ଆକ୍ରମଣ କରାଯାଇଥିଲା। ପ୍ରଧାନମନ୍ତ୍ରୀ କହିଛନ୍ତି ଯେ ଯେଉଁମାନେ ନିର୍ବାଚନ ହାରିଛନ୍ତି ଏବଂ ହାରିବାର ଭୟ ରଖିଛନ୍ତି, ସେମାନେ ନକଲି ଭିଡିଓ ତିଆରି କରିବା ପାଇଁ ଟେକ୍ନୋଲୋଜି ଅପବ୍ୟବହାର କରୁଛନ୍ତି। ସେମାନେ ଆର୍ଟିଫିସିଆଲ ଇଣ୍ଟେଲିଜେନ୍ସର ଅପବ୍ୟବହାର କରି ସୋସିଆଲ ମିଡିଆରେ ମୋ ସ୍ୱରରେ ଭୁଲ କଥା କହୁଛନ୍ତି, ଯାହା ଏକ ବଡ଼ ବିପଦ ସୃଷ୍ଟି କରୁଛି। ଏଭଳି କୌଣସି ଭିଡିଓ ସମ୍ପର୍କରେ ପୁଲିସ କିମ୍ବା ବିଜେପି କର୍ମୀଙ୍କୁ ଅବଗତ କରାଗଲେ ଅଭିଯୁକ୍ତଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି। ଏହି ରାଲିରେ ବିଜେପି ନେତା ବିଏସ୍ ୟେଦୁରପ୍ପା, ବାଗଲକୋଟ ଓ ବିଜୟପୁରାର ସାଂସଦ ତଥା ପ୍ରାର୍ଥୀ ପିସି ଗଦ୍ଦିଗୌଦର ଓ ରମେଶ ଜିଗାଜିନାଗୀ ପ୍ରମୁଖ ଉପସ୍ଥିତ ଥିଲେ।