କୋରାପୁଟ : କୋରାପୁଟ ଜିଲ୍ଲା ସହିଦ ଲକ୍ଷ୍ମଣ ନାୟକ ମେଡିକାଲ କଲେଜ ଓ ହସ୍ପିଟାଲରେ ଶବବୁହା ଗାଡ଼ି ନଥିବା ହେତୁ ଗରିବ ଲୋକେ ଅନେକ ସମୟରେ ଅସୁବିଧାର ସମ୍ମୁଖୀନ ହେଉଥିବାର ଅଭିଯୋଗ ଶୁଣିବାକୁ ମିଳୁଛି। ଆଜି ବି ଏପରି ଏକ ଘଟଣା ଘଟିଥିବା ଜଣାପଡ଼ିଛି । ମହାପ୍ରୟାଣ ଗାଡ଼ି ନ ମିଳିବାରୁ ସକାଳ ୬ଟାରୁ ପ୍ରାୟ ୭ ଘଣ୍ଟାଧରି ଜଣେ ମହିଳାଙ୍କ ଶବ ପଡ଼ି ରହିଥିବାର ଦେଖିବାକୁ ମିଳିଛି ।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁସାରେ, କୋରାପୁଟ ଜିଲ୍ଲା ବୈପାରିଗୁଡ଼ା ଥାନା ଅନ୍ତର୍ଗତ ପଣସପୁଟ ଗାଁର ମୋତି ଖରା ନାମକ ଜଣେ ମହିଳା କର୍କଟ ରୋଗରେ ପୀଡ଼ିତ ଥିଲେ । ଗତ କିଛି ଦିନ ହେବ ସେ କୋରାପୁଟ ସହିଦ ଲକ୍ଷ୍ମଣ ନାୟକ ମେଡିକାଲ କଲେଜରେ ଚିକିତ୍ସିତ ହେଉଥିଲେ । ଆଜି ସକାଳ ପ୍ରାୟ ୬ଟା ବେଳେ ଚିକିତ୍ସାଧିନ ଅବସ୍ଥାରେ ତାଙ୍କର ମେଡିକାଲରେ ହିଁ ମୃତ୍ୟୁ ଘଟିଛି । ତାଙ୍କ ଗାଁ କୋରାପୁଟ ଠାରୁ ୭୦କିମି ଦୂର । ପରିବାର ଲୋକ ଗରିବ ହୋଇଥିବା ହେତୁ ଶବକୁ ୭୦କିମି ଦୂରକୁ ଗାଡ଼ିରେ ନେବାଲାଗି ସେମାନଙ୍କ ପାଖରେ ଟଙ୍କା ନାହିଁ ।
ଏଣୁ ମୃତକଙ୍କ ସମ୍ପର୍କୀୟ ମେଡିକାଲରେ ସକାଳ ୬ରୁ ଶବ ରଖି ବସିଛନ୍ତି । କୋରାପୁଟ ଜିଲ୍ଲାପାଳ ମଧୁସୂଦନ ମିଶ୍ର ଏହି ଖବର ପାଇବାପରେ ୭ ଘଣ୍ଟାପରେ ମହାପ୍ରୟାଣ ଗାଡ଼ିର ବ୍ୟବସ୍ଥା କରିଥିବା ଜଣାଯାଇଛି।