ବିଶ୍ବ ହକି ପୂର୍ବରୁ ସୁଧୁରିବ କି ଟ୍ରାଫିକ ସମସ୍ୟା ?
କାମରେ ଆସୁନି କୋଟି କୋଟି ଟଙ୍କାର ପାର୍କିଂସ୍ଥଳ
ରାଉରକେଲା: ପୁରୁଷ ହକି ପୂର୍ବରୁ ଚମକିଲିଣା ସ୍ମାର୍ଟସିଟି ରାଉରକେଲା। ସହରର ସୌନ୍ଦର୍ଯ୍ୟକରଣରେ ପାଣି ବୋହିଲାପରି ଟଙ୍କା ଖର୍ଚ୍ଚ ହେଉଛି। ମାତ୍ର ସ୍ମାର୍ଟସିଟିର ଟ୍ରାଫିକ ସମସ୍ୟାକୁ ପ୍ରଶାସନିକ ଅଧିକାରୀ ଯେମିତି ଭୁଲି ଯାଇଛନ୍ତି। କୋଟି କୋଟି ଟଙ୍କାରେ ପାର୍କିଂ ସ୍ଥଳ ନିର୍ମାଣ ହୋଇଛି। କାମରେ ଆସୁନି। ପୁଣି କେଉଁଠି ପାର୍କିଂସ୍ଥଳରେ ଉଠାଦୋକାନୀଙ୍କୁ ଥାଇଥାନ କରାଯାଇଛି। ମହାନଗର ନିଗମର ଗାଡ଼ିଗୁଡ଼ିକର ଛିଡା ହେଉଛି। କିନ୍ତୁ ଏଠାରେ ଜଣେ ହେଲେ ଗାଡି ଚାଳକ ଗାଡି ରଖିବାକୁ ଆସୁ ନାହାନ୍ତି। ଆସିବେ ବା କାହିଁକି ? ମାର୍କେଟ ଠାରୁ ୫୦୦ ମିଟର ଦୂରରେ ଥିବା ପାର୍କିଂସ୍ଥଳରେ ଗାଡି ରଖି ମାର୍କେଟକୁ ଆସିବାକୁ ସହରବାସୀ ବେଶ୍ ବାଧୁଛି। ଅନ୍ୟ ସ୍ଥାନରେ ରହିଥିବା ପାର୍କିଂସ୍ଥଳଗୁଡ଼ିକ ମଧ୍ୟରୁ କିଛି ବିନା ଟେଣ୍ଡରରେ ଚାଲିଛି। ତାହା ପୁଣି ପୂର୍ବରୁ ନେଇଥିବା ଠିକା ସଂସ୍ଥା ଓ ଆର୍ଏମ୍ସିର ବିଭାଗୀୟ ଅଧିକାରୀଙ୍କ ଭିତିରି ସଲାସୁତୁରାରେ। ଏ ବାବଦରେ ଆର୍ଏମ୍ସି ପାଣ୍ଠିକୁ ଟଙ୍କା ରାଜସ୍ବ ଆସୁନାହିଁ। ପାର୍କିଂ ସ୍ଥଳ ଖାଲି ପଡିଛି। ରାସ୍ତା ଉପରେ ଶହ ଶହ ଗାଡ଼ି ଛିଡା ହେଉଛି। ପ୍ରମୁଖ ରାସ୍ତାଠାରୁ ଆରମ୍ଭ କରି ଗଳି କନ୍ଦିରେ ଦୈନନ୍ଦିନ ଏଭଳି ଟ୍ରାଫିକ ସମସ୍ୟା ଉପୁଜିଛି।
Sambad is now on WhatsApp
Join and get latest news updates delivered to you via WhatsApp
ଯାତାୟତରେ ଅନେକ ସମସ୍ୟା ସୃଷ୍ଟି ହେଉଛି। ଛୋଟ ବଡ ଦୁର୍ଘଟଣା ଘଟୁଛି। ହକି ପୂର୍ବରୁ ସହରରେ ଏହା ନିଶ୍ଚିତ ଭାବେ ବଡ ସମସ୍ୟା ହୋଇ ଉଭା ହେବ। ପର୍ବପର୍ବାଣୀ ହେଲେ ତ କଥା ସରିଲା। ପ୍ରମୁଖ ସହରର ଭିତରକୁ ମାର୍କେଟିଂ କରିବା ତ କାଠିକର ପାଠ ହୋଇପଡୁଛି। ତଥାପି ବିଭାଗୀୟ ଅଧିକାରୀଙ୍କ କୌଣସି ଠୋସ୍ ପଦକ୍ଷେପ ନିଆଯାଉ ନାହିଁ। ରାଉରକେଲା ଓରାମପଡାସ୍ଥ ବିଏସ୍ଏନ୍ଏଲ୍ ଅଫିସ୍ ସମ୍ମୁଖରେ ସ୍ମାର୍ଟସିଟି ପକ୍ଷରୁ ପ୍ରାୟ ଦେଢ଼ କୋଟି ଟଙ୍କା ବ୍ୟୟରେ ପାର୍କିଂ ସ୍ଥଳ ନିର୍ମାଣ ହେଲା। ଆଲୋକୀକରଣ ସହ ପାନୀୟ ଜଳ ସୁବିଧା ମଧ୍ୟ କରାଗଲା। ଦୁଇ, ତିନି ଓ ଚାରି ଚକିଆ ଗାଡି ବଦଳରେ ପାର୍କିଂ ସ୍ଥଳ ପାଲଟିଗଲା ଉଠାଦୋକାନୀଙ୍କ ଥଇଥାନ କେନ୍ଦ୍ର। ୩୦ରୁ ୪୦ ଉଠାଦୋକାନୀ ସେଠାରେ ଦୋକାନ ଖୋଲିଛନ୍ତି। ଆଉ କିଛି ସେ ଜାଗାକୁ ଦୋକାନ କରିବା ନାଁରେ ମାଡ଼ି ବସିଛନ୍ତି। ଆର୍ଏମ୍ସିର ବିଭାଗୀୟ ଅଧିକାରୀଙ୍କ ପାଖରେ ସୂଚନା ଅଛି।
ଏମାନଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ନିଆଯାଉ ନାହିଁ। ଯାହା ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ଦ୍ବିତୀୟ ପାର୍କିଂସ୍ଥଳ ସିଭିଲଟାଉନସିପ ଶନି ମନ୍ଦିର ପାର୍ଶ୍ବରେ ନିର୍ମାଣ ହେଲା। ଏଠି ମଧ୍ୟ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରାଯାଇଛି। ବର୍ଷରୁ ଅଧିକ ସମୟ ଧରି ସେମିତି ଖାଲି ପଡିଛି। ପାର୍କିଂସ୍ଥଳ ସମ୍ମୁଖ ରାସ୍ତାର ଦୁଇ ପାର୍ଶ୍ବରେ ଶହ ଶହ ଗାଡ଼ି ଛିଡା ହେଉଛି। ଏଥିସହ ଶନି ମନ୍ଦିର ପାର୍ଶ୍ବ ସହରର ପ୍ରମୁଖ ରାସ୍ତାରେ ଟ୍ରାଫିକ ସମସ୍ୟା ଆହୁରି ଜଟିଳ। କାରଣ ରାସ୍ତା ପାର୍ଶ୍ବରେ ରହିଛି କିଛି ପୁରୁଣା ଦୁଇ ଚକିଆ ଗାଡ଼ି ବିକ୍ରି ଦୋକାନ। ପୁରୁଣା ଦୁଇ ଚକିଆ ଗାଡ଼ି ବିକୁଥିବା ଏହି ଦୋକାନ ମାଲିକମାନେ ଫୁଟ୍ପାଟ୍ ସହ ସହରର ପ୍ରମୁଖ ରାସ୍ତାକୁ ମାଡ଼ି ବସିଛନ୍ତି। ଯେଉଁଠି ସେମାନେ ପ୍ରତ୍ୟେକ ଦିନ ଗାଡ଼ି ରଖି ବିକୁଛନ୍ତି। ଏମାନଙ୍କ ବିରୋଧରେ ଆର୍ଏମ୍ସି ନା ଟ୍ରାଫିକ ପୁଲିସ ପକ୍ଷରୁ ପଦକ୍ଷେପ ନିଆଯାଉ ନାହିଁ। ଯାହାକୁ ନେଇ ପଥଚାରୀଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଉଛି। ତେବେ ହକି ପୂର୍ବରୁ ସହରର ଟ୍ରାଫିକ ସମସ୍ୟା ଏଡାଇବାକୁ ଜିଲ୍ଳା ପ୍ରଶାସନ ନିର୍ମାଣ ପାର୍କିଂସ୍ଥଳକୁ କାର୍ଯ୍ୟକ୍ଷମ କରିବା ସହ ବିକଳ୍ପ ବ୍ୟବସ୍ଥା କରିବାକୁ ବିଭିନ୍ନ ମହଲରୁ ଦାବି ହେଉଛି।