ବ୍ରହ୍ମପୁର : ବାହୁଦା ନଦୀ ଗତିପଥ ବଦଳାଉଛି। ସମୁଦ୍ର ବି ବାରମ୍ବାର କୂଳ ଖାଉଛି। ହେଲେ, ପ୍ରଶାସନ ଏଥିପ୍ରତି କୌଣସି ପଦକ୍ଷେପ ଗ୍ରହଣ କରୁନାହାନ୍ତି। ଫଳରେ, ସ୍ଥାନୀୟ ଲୋକମାନେ ଆଜି ଅଣ୍ଟା ଭିଡ଼ିଛନ୍ତି। ରାମେୟାପାଟଣା ଓ ସୁନାପୁର ଗ୍ରାମର ୩ ଶହରୁ ଅଧିକ ଲୋକ ପୋତି ହୋଇଯାଇଥିବା ବାହୁଦା ମୁହାଣକୁ ଖୋଳିଛନ୍ତି। ୪ ଫୁଟ ଓସାର ଓ ପ୍ରାୟ ୧ଶହ ମିଟର ଲମ୍ବ ପରିମିତ ଜାଗାରୁ ଜେସିବି ସାହାଯ୍ୟରେ ବାଲି କାଢ଼ିଦେଇଛନ୍ତି। ମୁହାଣ ଖୋଳାଯିବା ପରେ ବାହୁଦା ନଦୀର ଜଳ ସମୁଦ୍ରକୁ ଯିବା ଆରମ୍ଭ ହୋଇଛି।
Sambad is now on WhatsApp
Join and get latest news updates delivered to you via WhatsApp
ଗଞ୍ଜାମ ଜିଲ୍ଲା ଚିକିଟି ତହସିଲ କତୁରୁ ପଞ୍ଚାୟତର ରାମେୟାପାଟଣା ଗାଁ। ଏହି ଗ୍ରାମଟି ସମୁଦ୍ର କୂଳରେ ରହିଛି। ରାମେୟପାଟଣା-ସୁନାପୁର ମଧ୍ୟବର୍ତ୍ତୀ ସ୍ଥାନରେ ବାହୁଦା ନଦୀ ସମୁଦ୍ରରେ ମିଶିଛି। ଉକ୍ତ ବାହୁଦା ମୁହାଣ ଗତ କିଛି ମାସ ହେବ ପୋତି ହେବା ସହିତ ବାହୁଦା ନଦୀ ଗତିପଥ ବଦଳାଇଥିଲା। ବାହୁଦା ନଦୀର ଜଳ ସମୁଦ୍ରକୁ ନିଷ୍କାସିତ ହୋଇପାରୁ ନ ଥିଲା। ଏହାର ପ୍ରଭାବରେ ସମୁଦ୍ର ଉଗ୍ର ହେବା ସହିତ ସୁଉଚ୍ଚ ଜୁଆର ଆସି କୁଳ ଖାଉଥିଲା। ସମୁଦ୍ରକୂଳରେ ରହିଥିବା ରାମେୟାପାଟଣା ଗ୍ରାମର ୨୭ଟି ବାସଗୃହ, ୨୨ଟି ଶୁଖୁଆଖଳା, ମତ୍ସଜୀବୀ ବିଶ୍ରାମ କେନ୍ଦ୍ର ଏବଂ ୧୦ରୁ ଅଧିକ ନଡ଼ିଆ ଗଛ ସମୁଦ୍ରର ଆଁରେ ପଶିଥିଲା। ଗତ ଅଗଷ୍ଟ ୧୦ ତାରିଖ ଠାରୁ ରାମେୟାପାଟଣା ଠାରେ ଏଭଳି ସ୍ଥିତି ଲାଗି ରହିଛି। ସମୁଦ୍ର ଅଶାନ୍ତ ଯୋଗୁଁ ରାମେୟାପାଟଣା, ସୁନାପୁର ଆଦି ଅଞ୍ଚଳର ମତ୍ସଜୀବୀମାନେ ମାଛ ମାରିବା ଲାଗି ସମୁଦ୍ରକୁ ଯାଇ ନ ପାରି ହାତବାନ୍ଧି ବସିଛନ୍ତି। ସମୁଦ୍ରର କରାଳ ରୂପ ଲାଗି ମତ୍ସଜୀବୀମାନଙ୍କ ଜୀବନଜୀବିକା ବାଧାପ୍ରାପ୍ତ ହୋଇଛି। ଶେଷରେ ଏହାର ପ୍ରତିକାର ଲାଗି ରାମେୟାପାଟଣା ଓ ସୁନାପୁର ଗ୍ରାମବାସୀ ଅଣ୍ଟା ଭିଡିଥିଲେ।
ଆଜି ସକାଳୁ ଦୁଇ ଗ୍ରାମର ୩ ରୁ ୪ଶହ ଗ୍ରାମବାସୀ ଡଙ୍ଗାରେ ଉଭୟ ପାର୍ଶ୍ବରୁ ଯାଇ ମୁହାଣ ନିକଟରେ ପହଁଞ୍ଚିଥିଲେ। ସୁନାପୁର ଠାରୁ ବେଳଭୂମି ଦେଇ ଏକ ଜେସିବି ମୁହାଣ ନିକଟକୁ ଅଣାଯାଇଥିଲା। ଦିନତମାମ ମୁହାଣ ଖୋଳା ଚାଲିଥିଲା। ଲୋକମାନଙ୍କ ଆଜିର ଉଦ୍ୟମ ପରେ ବାହୁଦା ନଦୀର ଜଳ ସମୁଦ୍ରକୁ ଯିବା ଆରମ୍ଭ କରିଛି।