ମହଙ୍ଗା ପଡ଼ିପାରେ ମହାଥୀରଙ୍କ ଭାରତ ବିରୋଧୀ ମନ୍ତବ୍ୟ : ମାଲେସିଆରୁ ଖାଇବା ତେଲ ଆମଦାନୀ ବନ୍ଦ କରିବ ଭାରତ
ନୂଆଦିଲ୍ଲୀ : ବାରମ୍ବାର ଚେତାବନୀ ସତ୍ତ୍ୱେ ମାଲେସିଆର ପ୍ରଧାନମନ୍ତ୍ରୀ ମହାଥୀର ମହମ୍ମଦ ଭାରତ ବିରୋଧରେ ବୟାନ ଦେଉଥିବାରୁ ତାହାକୁ ଗୁରୁତ୍ୱର ସହ ନେଇଛି ଭାରତ । ମାଲେସିଆକୁ ପାନେ ଦେବା ପାଇଁ ସେଠାରୁ ଖାଇବା ତେଲ (ପାମୋଲିନ୍) ଆମଦାନୀ ବନ୍ଦ କରିବାକୁ ସରକାର ନିଷ୍ପତ୍ତି ନେଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଗତ ସୋମବାରଦିନ ଭାରତ ସରକାର ପାମ୍ ଅଏଲ୍ ଆମଦାନୀ କରୁଥିବା ରିଫାଇନାରୀଗୁଡ଼ିକୁ ଡକାଇ ମାଲେସିଆରୁ ଆମଦାନୀ ବନ୍ଦ କରିବାକୁ ଅଣଔପଚାରିକଭାବେ ନିର୍ଦ୍ଦେଶ ଦେଇଛନ୍ତି। ମାଲେସିଆ ବଦଳରେ ଇଣ୍ଡୋନେସିଆରୁ ତାଳତେଲ କିଣିବାକୁ ରିଫାଇନାରୀମାନଙ୍କୁ ସରକାର କହିଛନ୍ତି ।
ଭାରତ ବର୍ଷକୁ ପ୍ରାୟ ୯ ନିୟୁତ ଟନ ପାମ୍ ଅଏଲ ଆମଦାନୀ କରିଥାଏ । ଏହାର ୭୦ ପ୍ରତିଶତ ଇଣ୍ଡୋନେସିଆରୁ ଓ ୩୦ ପ୍ରତିଶତ ମାଲେସିଆରୁ ଆମଦାନୀ ହୋଇଥାଏ । ଏହା ସତ୍ତ୍ୱେ ଭାରତ ହେଉଛି ମାଲେସିଆ ପାଇଁ ସବୁଠୁ ବଡ଼ ଗ୍ରାହକ । ଭାରତ ମାଲେସିଆର ବୃହତମ ଖାଇବା ତେଲ ଗ୍ରାହକ ହୋଇଥିବାରୁ ଭାରତୀୟ କମ୍ପାନିମାନେ ନ କିଣିରେ ମାଲେସିଆ ଗୁରୁତରଭାବେ ପ୍ରଭାବିତ ହେବା ଆଶଙ୍କା ରହିଛି । କିନ୍ତୁ ଏହାର ଫାଇଦା ପଡୋଶୀ ଇଣ୍ଡୋନେସିଆ ନେବାର ସମ୍ଭାବନା ରହିଛି । ମାଲେସିଆ ବଦଳରେ ଇଣ୍ଡୋନେସିଆ,ଆର୍ଜେଣ୍ଟିନା ଓ ୟୁକ୍ରେନରୁ ଖାଇବା ତେଲ ଆମଦାନୀ କରିବାକୁ ଭାରତ ବିଚାର କରୁଛି ।
ଗତ ବର୍ଷ ମହାଥୀର କଶ୍ମୀର ସଂପର୍କରେ ଓ ନିକଟରେ ନାଗରିକତା ଆଇନ ସଂପର୍କରେ ମନ୍ତବ୍ୟ ଦେଇଥିଲେ । ତାଙ୍କ ମନ୍ତବ୍ୟକୁ ଭାରତ ବିରୋଧ କରୁଛି ।