ଡିଆରଡିଏ ନିର୍ବାହୀ ଯନ୍ତ୍ରୀଙ୍କ ସରକାରୀ କ୍ୱାଟର ଜବରଦଖଲ ମାମଲା: ଜବରଦଖଲକାରୀଙ୍କୁ ହଟାଇପାରୁନି ଡିଆରଡିଏ
ଖୋର୍ଦ୍ଧା: ଖୋର୍ଦ୍ଧା ସହରରେ ସରକାରୀ ଜମି, ଜଙ୍ଗଲ ଜମି, ନାଳ ଆଦି ଜବରଦଖଲ ଚାଲିଥିଲା । ତେବେ ଜବରଦଖଲକାରୀଙ୍କ କବଳରୁ ସରକାରୀ କୋଠା, ସରକାରୀ କର୍ମଚାରୀଙ୍କ କ୍ୱାଟର ମଧ୍ୟ ବାଦ୍ ପଡ଼ିନାହିଁ । ଗତ ୧୦ ବର୍ଷ ଧରି ଜବଦରଦଖଲରେ ଥିବା ଡିଆରଡିଏ ନିର୍ବାହୀ ଯନ୍ତ୍ରୀଙ୍କ ସରକାରୀ କ୍ୱାଟରକୁ ହଟାଇବାକୁ ପ୍ରଶାସନ ମଧ୍ୟ ସାହସ କରିପାରୁନାହିଁ ।
Sambad is now on WhatsApp
Join and get latest news updates delivered to you via WhatsApp
ଗତ ୧୩ ତାରିଖରେ ଖୋର୍ଦ୍ଧା ସହରରେ ଜବରଦଖଲକାରୀଙ୍କ କବଜାରେ କିଭଳି ଜିଲ୍ଲା ଗ୍ରାମ୍ୟ ଉନ୍ନୟନ ପ୍ରକଳ୍ପ ବିଭାଗର ନିର୍ବାହୀ ଯନ୍ତ୍ରୀଙ୍କ ସରକାରୀ କୋଠା କ୍ଷମତାଶାଳୀଙ୍କ ଜବରଦଖଲ ରହିଛି ସେନେଇ ବିସ୍ତୃତ ଖବର ପ୍ରକାଶ ପାଇଥିଲା । ଏହାପରେ ଡିଆରଡିଏ ପକ୍ଷରୁ ଉକ୍ତ କୋଠାକୁ ନିଜ ହାତକୁ ଆଣିବାକୁ ପ୍ରଚେଷ୍ଟା କରାଯିବ ବୋଲି କୁହାଯାଇଥିଲା । ଇତିମଧ୍ୟରେ ଖୋଦ୍ ଡିଆରଡିଏ ପିଡି ଦିଗନ୍ତ ରାଉତରାୟ ଉକ୍ତ କୋଠାର ସ୍ଥିତିକୁ ସରଜମିନ ଅନୁସନ୍ଧାନ କରି ଫେରିଛନ୍ତି । ତେବେ ଏହି କୋଠାଟି ବ୍ଲକ ପ୍ରଶାସନ ପକ୍ଷରୁ ଡିଆରଡିଏକୁ ହସ୍ତାନ୍ତର କରାଯାଇନଥିବା ଜଣାପଡ଼ିଥିଲା । ଏନେଇ ଡିଆରଡିଏପକ୍ଷରୁ ହସ୍ତାନ୍ତର ପାଇଁ ଚିଠି ଲେଖାଯାଇଥିଲା ।
ଘଟଣା ସମ୍ପର୍କରେ ଖୋର୍ଦ୍ଧା ବ୍ଲକ ବିଡିଓ ପ୍ରଶାନ୍ତ ନାୟକଙ୍କୁ ଯୋଗାଯୋଗ କରିବାରେ ସେ କହିଛନ୍ତି ଯେ ସେ ଥିବା ସମୟରେ ଏହି କୋଠାର ନିର୍ମାଣ ହୋଇନାହିଁ । ଏଣୁ ନଥିପତ୍ର ନଦେଖିଲା ଯାଏଁ ଏନେଇ ସେ କିଛି କହିପାରିବେ ନାହିଁ । ଅପରପକ୍ଷରେ ଡିଆରଡିଏ ପିଡି ଶ୍ରୀ ରାଉତରାୟଙ୍କୁ ପଚାରିବାରେ ସେ କହିଛନ୍ତି ଯେ । କୋଠା ପରିସର ମଧ୍ୟରେ ପାଳଗଦା, ଗୋଡ଼ି, ବାଲି ଆଦି ଜମା ହୋଇଛି । ଏହାକୁ ହଟାଇବାକୁ କୁହାଯାଇଥିଲା । କିନ୍ତୁ ଏଯାଏଁ ହଟାଯାଇନାହିଁ । ଏଣୁ ଶେଷରେ ଡିଆରଡିଏ ପକ୍ଷରୁ ଉପଜିଲ୍ଲାପାଳଙ୍କ ଅଦାଲତରେ ସରକାରୀ ଜମି ଜବରଦଖଲ ନିରୋଧ ଆଇନରେ (ଓପିଏଲ୍ଏ)ରେ ଆବେଦନ କରାଯିବ । ଜବରଦଖଲକାରୀଙ୍କୁ ବଳପୂର୍ବକ ସେଠାରୁ ହଟାଯିବ ।
ତେବେ ଏଠାରେ ପ୍ରଶ୍ନ ଉଠୁଛି, ଯେଉଁ ଜବରଦଖଲକାରୀଙ୍କୁ ସରକାରୀ କ୍ୱାଟରରୁ ହଟାଇବା ପାଇଁ ପ୍ରଶାସନର ସାଧାରଣ ନିର୍ଦ୍ଦେଶ ମଧ୍ୟ କାମ କରୁନାହିଁ ଏବଂ ପ୍ରଶାସନ ଶେଷରେ ଆଇନ ଓ ପୁଲିସର ଆଶ୍ରୟ ନେଇ ଏହାକୁ ହଟାଇବାକୁ ପଡ଼ୁଛି ସେଭଳି ଜବରଦଖଲକାରୀ କିଏ? ତାଙ୍କ ବିରୋଧରେ କାହିଁକି ପ୍ରଶାସନ ସିଧାସଳଖ ପଦକ୍ଷେପ ନେବାକୁ ପଛଘୁଞ୍ଚା ଦେଉଛି । ଯଦି ପ୍ରଶାସନ ଏଭଳି ନିଷ୍କ୍ରିୟ ଓ ଅସହାୟ ତେବେ ସାଧାରଣ ଲୋକ ନ୍ୟାୟ ପାଇଁ କାହାର ଦ୍ୱାରସ୍ଥ ହେବେ ବୋଲି ସାଧାରଣରେ ଚର୍ଚ୍ଚା ହେଉଛି ।