ରାୟପୁର: ଦାମୀ ମଦ ଦିଅ, ତୁମ କାମ କରିଦେବି | ଜଣେ ଚାଷୀଙ୍କୁ କିଛି ଏଭଳି ଲାଞ୍ଚ ମାଗୁଥିବାର ଭିଡିଓ ଏବେ ଭାଇରାଲ ହେବାରେ ଲାଗିଛି | ଛତିଶଗଡର ବିଳାସପୁରର ମସ୍ତୁରୀ ତହସିଲ ତହସିଲଦାର ଜଣେ ଚାଷୀଙ୍କଠାରୁ ଲାଞ୍ଚରେ ଦାମୀ ବ୍ରାଣ୍ଡେଡ୍ ମଦ ମାଗିଥିଲେ। ଏହାର ଏକ ଭିଡିଓ ଭାଇରାଲ ହେବା ପରେ ଏହାକୁ ନେଇ ଚର୍ଚ୍ଚା ଜୋର ଧରିଛି | ମିଳିଥିବା ସୂଚନା ମୁତାବକ ବିଳାସପୁର ଜିଲ୍ଲାର ମସ୍ତୁରୀ ତହସିଲ କାର୍ଯ୍ୟାଳୟର ତହସିଲଦାର ରମେଶ କୁମାରଙ୍କ ଏକ ଭିଡିଓ ସାମ୍ନାକୁ ଆସିଛି |
Sambad is now on WhatsApp
Join and get latest news updates delivered to you via WhatsApp
ଏହି ଭିଡିଓରେ ତହସିଲଦାର କାମ କରିବା ବଦଳରେ ବିଦେଶୀ ମଦ ବ୍ଲେଣ୍ଡରସ ପ୍ରାଇଡ ଆଣିବାକୁ କହୁଛନ୍ତି। ସୂଚନା ଅନୁଯାୟୀ ଚାଷୀ ତାଙ୍କ ଜମି ସହ ଜଡିତ ଏକ ସମସ୍ୟାର ସମାଧାନ କରିବାକୁ ତହସିଲଦାର ରମେଶ କୁମାରଙ୍କ ପାଖକୁ ଯାଇଥିଲେ । ସେଠାରେ ରମେଶ ଚାଷୀଙ୍କୁ କାମ ବଦଳରେ ବିଦେଶୀ ମଦର ମୂଲ୍ୟ ପଚାରିଥିଲେ ଏବଂ ଏହାକୁ ଆଣିବାକୁ କହିଥିଲେ। ତେବେ ଚାଷୀ ଜଣକ ଏହା ଆଣିବାକୁ ଅସମର୍ଥ ବୋଲି କହିବାରୁ ତହସିଲଦାର ତାଙ୍କୁ କାର୍ଯ୍ୟାଳୟରୁ ବାହାରିଯିବାକୁ କହିଥିଲେ |
ଘଟଣାର ଭିଡିଓ ଭାଇରାଲ ହେବା ପରେ ଜିଲ୍ଲାପାଳ ଡକ୍ଟର ସାରାଂଶ ମିତର ରମେଶ କୁମାରଙ୍କୁ ନିଲମ୍ବନ କରିଛନ୍ତି ଏବଂ ବିଭାଗୀୟ କାର୍ଯ୍ୟାନୁଷ୍ଠାନ ପାଇଁ ନିର୍ଦ୍ଦେଶ ଦେଇଛନ୍ତି । ଜିଲ୍ଲାପାଳ ଏହା ମଧ୍ୟ କହିଛନ୍ତି ଯେ ଯଦି କୌଣସି ସରକାରୀ କର୍ମଚାରୀଙ୍କ ଆଚରଣ ଜନସାଧାରଣଙ୍କ ସ୍ୱାର୍ଥରେ ନଥାଏ ତେବେ ତାଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।