ଭାରତୀୟ ଜ୍ଞାନ ପରମ୍ପରା ଆଧାରିତ ପୁସ୍ତକ ଉନ୍ମୋଚନ କଲେ ଧର୍ମେନ୍ଦ୍ର
ଭାରତୀୟ ଜ୍ଞାନ ପରମ୍ପରାକୁ ଶିକ୍ଷା ବ୍ୟବସ୍ଥାର ମୁଖ୍ୟସ୍ରୋତରେ ଯୋଡ଼ାଯିବ: ଧର୍ମେନ୍ଦ୍ର
ନୂଆଦିଲ୍ଲୀ/ଭୁବନେଶ୍ୱର: ଅଦ୍ୱିତୀୟ ଜ୍ଞାନର ପ୍ରତୀକ ଭାରତୀୟ ଜ୍ଞାନ ପରମ୍ପରାକୁ ଶିକ୍ଷା ବ୍ୟବସ୍ଥାର ମୁଖ୍ୟସ୍ରୋତରେ ଯୋଡ଼ିବା ଉଦ୍ଦେଶ୍ୟରେ ସୋମବାର ଦିନ ‘ଭାରତୀୟ ଜ୍ଞାନ ପରମ୍ପରା ଆଧାରିତ ପୁସ୍ତକ’ ଉନ୍ମୋଚନ କରାଯାଇଛି। ସୋମବାର ନୂଆଦିଲ୍ଲୀଠାରେ ଏକ ସ୍ୱତନ୍ତ୍ର ପୁସ୍ତକ ଉନ୍ମୋଚନ କାର୍ଯ୍ୟକ୍ରମରେ ଯୋଗଦେଇ ଏହା କହିଛନ୍ତି କେନ୍ଦ୍ର ଶିକ୍ଷା, ଦକ୍ଷତା ବିକାଶ ଏବଂ ଉଦ୍ୟମିତା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ। ଶ୍ରୀ ପ୍ରଧାନ କହିଛନ୍ତି ଯେ ବିଶ୍ୱର ସମସ୍ୟାକୁ ସମାଧାନ କରିବା ଭାରତୀୟ ଜ୍ଞାନ ପରମ୍ପରାର ମୂଳ ଆଧାର ଏବଂ ଏହାକୁ ଆଧୁନିକ ଓ ବୈଜ୍ଞାନିକ ଭାଷାରେ ବିଶ୍ୱ ସାମ୍ନାରେ ଆଣିବା ଆମ ପାଇଁ ଏକ ଆହ୍ୱାନ। ସନାତନ ଭାରତୀୟ ଜ୍ଞାନର ସମୃଦ୍ଧ ପରମ୍ପରାକୁ ସ୍ପଷ୍ଟ ଭାବରେ ଲୋକଲୋଚନକୁ ଆଣିବା ଏବଂ ଆଧୁନିକ ପାଠ୍ୟକ୍ରମର ଅଂଶୀଦାର କରିବା ଦିଗରେ ‘ଇଣ୍ଡିଆନ ନଲେଜ୍ ସିଷ୍ଟମ’ ଉପରେ ଏହି ଗବେଷଣା ଆଧାରିତ ଗ୍ରନ୍ଥ ଉନ୍ମୋଚିତ ହେବା ଗୌରବର ବିଷୟ । ଏଥିପାଇଁ କେନ୍ଦ୍ରମନ୍ତ୍ରୀ ପୁସ୍ତକର ତିନି ଲେଖକ ପ୍ରଫେସର ବି. ମହାଦେବନ, ପ୍ରଫେସର ବିନାୟକ ରଜତ ଭଟ୍ଟ, ପ୍ରଫେସର ନାଗେନ୍ଦ୍ର ପୱନ ଏବଂ ଏଆଇସିଟିଇକୁ ଶୁଭେଚ୍ଛା ଜଣାଇଛନ୍ତି। ଶ୍ରୀ ପ୍ରଧାନ କହିଛନ୍ତି ଯେ ସତ୍ୟ, ଅହିଂସା, ନ୍ୟାୟ, ଧର୍ମ ଭଳି ନୀତି ସିଦ୍ଧାନ୍ତ, ବେଦ, ଉପନିଷଦ, ରାମାୟଣ, ମହାଭାରତ ଭଳି ମହାକାବ୍ୟ ଏବଂ ସଂସ୍କୃତ, ପାଲି, ପାକୃତ, ତାମିଲ ଭଳି ପ୍ରାଚୀନ ଭାରତୀୟ ଭାଷା, ଭାରତର ଜୀବନ ପଦ୍ଧତି ଏବଂ ଦର୍ଶନ ହିଁ ଭାରତୀୟ ଜ୍ଞାନ ପରମ୍ପରା । ଗ୍ରହ ନକ୍ଷତ୍ରର ଚଳଣି, ସମୟର ସଠିକ୍ ଗଣନା, ରସାୟନ ଶାସ୍ତ୍ର, ନାଗରିକ ଶାସ୍ତ୍ର, ବାସ୍ତୁକଳା, ବିଜ୍ଞାନ ଭଳି ଅନେକ କ୍ଷେତ୍ରରେ ଭାରତ ଖ୍ରୀଷ୍ଟପୂର୍ବରୁ ହିଁ ଜ୍ଞାନ ସଂସ୍କୃତିର ପରିଚୟ ରହିଆସିଛି । ଶିଳ୍ପ ବିପ୍ଳବ ଠାରୁ ୧୭୦୦ ରୁ ୨୦୦୦ ବର୍ଷ ପୂର୍ବେ ଭାରତରେ ସ୍ୱତନ୍ତ୍ର ଇସ୍ପାତର ବ୍ୟବହାର ହେଉଥିବାର ବୈଜ୍ଞାନିକ ପ୍ରମାଣ ରହିଛି।
Sambad is now on WhatsApp
Join and get latest news updates delivered to you via WhatsApp
ମହାତ୍ମା ଗାନ୍ଧୀ ଦୁନିଆକୁ ଏକ ନୂଆ ବିଚାର ଦେଇଥିଲେ । ସମାଜରେ ସତ୍ୟ ଓ ଅହିଂସା ଦ୍ୱାରା ଲୋକତନ୍ତ୍ର ସ୍ଥାପନ ହେବାର ନୂଆ ଦିଗଦର୍ଶନ ଦେଇଥିଲେ । ଗାନ୍ଧିଜୀଙ୍କୁ ଶ୍ରୀମଦ୍ ଭାଗବତ ଗୀତାରୁ ହିଁ ସତ୍ୟ ଓ ଅହିଂସା ପଥରେ ଚାଲିବାର ପ୍ରେରଣା ମିଳିଥିଲା। ଗୀତା ମାନବ ଜୀବନ ସହ ଜଡ଼ିତ ଜ୍ଞାନର ଏକ ପ୍ରାସଙ୍ଗିକ ସଙ୍କଳନ । ଜଳର ଉପଲବ୍ଧତାରୁ ଆମର ସଭ୍ୟତା ସଂସ୍କୃତି ବିକଶିତ ହୋଇଛି । ବୁନ୍ଦେଲଖଣ୍ଡର ନଈ ଭଳି ଜଳ ପ୍ରବନ୍ଧନର ପୁରାତନ ଇତିହାସ ଏବଂ ଭାରତର କୋଣ ଅନୁକୋଣରେ ଏଭଳି ଅନେକ ଉଦାହରଣ ଭାରତୀୟ ଜ୍ଞାନ ପରମ୍ପରାର ବୈଭବର ସାକ୍ଷୀ ହୋଇଛି । ମାତ୍ର ଭାରତ ଉପରେ ବିଦେଶୀ ଆକ୍ରମଣ ସହ ଆମର ଜ୍ଞାନ ପରମ୍ପରାକୁ ସଂକୁଚିତ କରିବା ପାଇଁ ଷଡ଼ଯନ୍ତ୍ର ରଚନା କରାଯାଇଥିଲା । ଏଥିପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦୂରଦୃଷ୍ଟିସମ୍ପନ୍ନ ନୂଆ ରାଷ୍ଟ୍ରୀୟ ଶିକ୍ଷା ନୀତି ଦ୍ୱାରା ଭାରତୀୟ ଶିକ୍ଷା ବ୍ୟବସ୍ଥାକୁ ବିଔପନିବେଶୀକରଣ କରିବା ଦିଗରେ ଚେଷ୍ଟା ଆରମ୍ଭ ହୋଇଛି। କରୋନା ସମୟରେ ଯୋଗ ଏବଂ ଆୟୁର୍ବେଦ ଭଳି ଭାରତର ବ୍ୟବସ୍ଥା ବିଶ୍ୱର ଆହ୍ୱାନଗୁଡ଼ିକୁ ସମାଧାନ କରିବାର ବାଟ ବାହାର କରିଥିଲେ। ଏହା ହିଁ ହେଉଛି ଭାରତୀୟ ଜ୍ଞାନ ବ୍ୟବସ୍ଥା । ବିଶ୍ୱର ସବୁ ବିକଶିତ ଦେଶ ନିଜର ଜ୍ଞାନ ପରମ୍ପରା ଦ୍ୱାରା ମହାଶକ୍ତି ହୋଇପାରିଛନ୍ତି । ଭାରତକୁ ଜ୍ଞାନ ଆଧାରିତ ମହାଶକ୍ତି କରିବା ତଥା ଏକବିଂଶ ଶତାବ୍ଦୀରେ ବୈଶ୍ୱିକ ମାନବ ପ୍ରସ୍ତୁତ କରିବା ଦିଗରେ ଆମେ ଆମର ନିଜ ଭାରତୀୟ ଜ୍ଞାନ ପରମ୍ପରା ଉପରେ ଆଧାରିତ ଶିକ୍ଷା ଭିତ୍ତିଭୂମି ପ୍ରସ୍ତୁତ କରିବା, ଯାହା କେବଳ ନିଜ ପାଇଁ ନୁହେଁ ବରଂ ବିଶ୍ୱର ସମସ୍ୟାକୁ ସମାଧାନ କରିବ ବୋଲି କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ କହିଛନ୍ତି ।