ମଣିପୁର, ପଶ୍ଚିମବଙ୍ଗରେ ହିଂସା ମଧ୍ୟରେ ଶେଷ ହେଲା ପ୍ରଥମ ପର୍ଯ୍ୟାୟ ଭୋଟଗ୍ରହଣ
ନୂଆଦିଲ୍ଲୀ: ମଣିପୁର ଓ ପଶ୍ଚିମବଙ୍ଗର କେତେକ ସ୍ଥାନରେ ହିଂସା ମଧ୍ୟରେ ପ୍ରଥମ ପର୍ଯ୍ୟାୟ ଭୋଟ ଗ୍ରହଣ ଶେଷ ହୋଇଛି । ତେବେ ଅନ୍ୟ ରାଜ୍ୟଗୁଡ଼ିକରେ ସ୍ଥିତି ଶାନ୍ତିପୂର୍ଣ୍ଣ ଥିଲା । ଭୋଟ ଗ୍ରହଣ ସକାଳ ୭ଟାବେଳେ ଆରମ୍ଭ ହୋଇଥିବାବେଳେ ସଂଧ୍ୟା ୫ଟା ସମୟରେ ଶେଷ ହୋଇଛି । ତେବେ କେତେକ ବୁଥରେ ଏବେ ବି ଭୋଟର ଥିବାରୁ ସେସବୁ ବୁଥରେ ଭୋଟଗ୍ରହଣ ଜାରି ରହିଛି । ଭୋଟ କେନ୍ଦ୍ର ପରିସରରେ ଧାଡ଼ିରେ ଥିବା ସବୁ ଭୋଟର ଭୋଟ ଦେବାପରେ ହିଁ ଭୋଟଗ୍ରହଣ ଶେଷ ହେବ । ଆଜି ୧୬ଟି ରାଜ୍ୟ ଓ ୫ କେନ୍ଦ୍ର ଶାସିତ ଅଂଚଳର ମୋଟ ୧୦୨ଟି ଆସନରେ ଭୋଟ ଗ୍ରହଣ ହୋଇଥିଲା । ଆଜି ମୋଟ ୧୬୨୫ ଜଣ ପ୍ରାର୍ଥୀଙ୍କ ଭାଗ୍ୟ ଇଭିଏମରେ କୈଦ ହୋଇଯାଇଛି ।
Sambad is now on WhatsApp
Join and get latest news updates delivered to you via WhatsApp
ନିର୍ବାଚନ କମିସନଙ୍କ ସୂଚନା ଅନୁସାରେ ସଂଧ୍ୟା ୫ଟା ସୁଦ୍ଧା ପଶ୍ଚିମବଙ୍ଗର ୩ଟି ଲୋକସଭା ଆସନରେ ୭୭.୫୭ ପ୍ରତିଶତ ମତଦାନ ହୋଇଛି । ଅରୁଣାଚଳ ପ୍ରଦେଶରେ ୬୩.୦୩ ପ୍ରତିଶତ ଓ ଆସାମରେ ୭୦ ପ୍ରତିଶତ ମତଦାନ ହୋଇଛି । ଅନ୍ୟପକ୍ଷରେ ହିଂସାଗ୍ରସ୍ତ ମଣିପୁରରେ ୬୭ ପ୍ରତିଶତ ମତଦାନ ହୋଇଛି । ସିକ୍କିରେ ୬୭ ପ୍ରତିଶତ, ତ୍ରିପୁରାରେ ୭୬ ପ୍ରତିଶତ, ତାମିଲନାଡୁରେ ୬୨ ପ୍ରତିଶତ,ଉତ୍ତରପ୍ରଦେଶରେ ୫୭ ପ୍ରତିଶତ ଓ ଉତ୍ତରାଖଣ୍ଡରେ ୫୩ ପ୍ରତିଶତ ଭୋଟଗ୍ରହଣ ହୋଇଛି ।