ବଢ଼ୁଛି ଅଦା, ରସୁଣ ଦର
ଭୁବନେଶ୍ବର: ରାଜ୍ୟରେ ଅଦା ଓ ରସୁଣ ଦର କମିବାର ନାଁ ଧରୁନି। ଉଭୟ ଅଦା ଓ ରସୁଣ ଦର ଗ୍ରାହକଙ୍କୁ ବାଧୁଛି। ମଧ୍ୟବିତ୍ତ ଓ ନିମ୍ନମଧ୍ୟବିତ୍ତ ପରିବାର ଏହି ସାମଗ୍ରୀ କିଣିବା ବେଳେ ପକେଟ୍କୁ ଚାହୁଁଥିଲା ବେଳେ ଖଟିଖିଆ ଦିନ ମଜୁରିଆଙ୍କ କଥା ନକହିବା ଭଲ। ରାଜ୍ୟରେ ବର୍ତ୍ତମାନ ଦରବୃଦ୍ଧିରେ ରସୁଣ ଓ ଅଦା ପରସ୍ପରକୁ ଟକ୍କର ଦେଉଛନ୍ତି। ଏପରିକି ନିର୍ବାଚନ ସମୟରେ ମଧ୍ୟ ଏହାକୁ ନିୟନ୍ତ୍ରଣ କରାଯାଇ ପାରୁନାହିଁ। ଅର୍ଥାତ ପାଇକାରୀରେ ରସୁଣ କିଲୋ ପିଛା ୧୦୦ରୁ ୧୪୦ (ଖୁଚୁରାରେ ୧୭୦) ଏବଂ ଅଦା ୯୦ରୁ ୧୩୦ ଟଙ୍କାରେ ବିକ୍ରି ହେଉଛି।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ, ଭୁବନେଶ୍ବରକୁ ଦୈନିକ ୧ ଟ୍ରକ ରସୁଣ ଆସିଥାଏ। ଯାହା ଉତ୍ତରପ୍ରଦେଶ, ମଧ୍ୟପ୍ରଦେଶ, ରାଜସ୍ଥାନ ଓ ଗୁଜରାଟରୁ ଆସୁଛି। ଏହାର ସ୍ବାଭାବିକ ଦର ୨୦ରୁ ୩୦ ଟଙ୍କା ରହିଥାଏ। ଅନ୍ୟ ଦିଗରେ ଅଦା ଉତ୍ପାଦନରେ କୋରାପୁଟର ସ୍ବତନ୍ତ୍ର ପରିଚୟ ରହିଛି। ଏହା ସତ୍ତ୍ବେ କେବଳ ବର୍ଷା ଦିନରେ ହିଁ କୋରାପୁଟ ଅଦା ଭୁବନେଶ୍ବର ବଜାରକୁ ଆସିପାରେ। ବର୍ଷତମାମ ବେଙ୍ଗାଲୁରୁ ଓ ମହାରାଷ୍ଟ୍ର ଉପରେ ହିଁ ଭୁବନେଶ୍ବର ନିର୍ଭରଶୀଳ। ଅଦାର ସ୍ବାଭାବିକ ଦର କିଲୋ ପିଛା ୨୦ରୁ ୪୦ ଟଙ୍କା ରହିଥାଏ। କିନ୍ତୁ ଦୁଇ ବର୍ଷ ହେଲା ଉଭୟ ଅଦା ଓ ରସୁଣ କିଲୋ ପିଛା ୧୦୦ ଟଙ୍କାକୁ ଅତିକ୍ରମ କରିଛି। ଉତ୍ପାଦିତ ରାଜ୍ୟର ଉଚ୍ଚ ଦର ଯୋଗୁଁ ଏଠାକାର ବ୍ୟବସାୟୀ ଅଧିକ ଦାମରେ ବିକ୍ରି କରିବାକୁ ବାଧ୍ୟ ହେଉଥିବା ନେଇ ସ୍ଥାନୀୟ ପାଇକାରୀ ବ୍ୟବସାୟୀମାନେ ମତ ଦିଅନ୍ତି। ସେଥିରେ ପୁଣି ଗାଡ଼ି ଭଡ଼ା ଯୋଡ଼ି ହୋଇଯାଏ। ଓଡ଼ିଶାରେ ଚା’, ତରକାରୀ ଠାରୁ ଆରମ୍ଭ କରି ସ୍ବାସ୍ଥ୍ୟଗତ କାରଣରୁ ମଧ୍ୟ ଲୋକେ ଅଦା ବ୍ୟବହାର କରୁଥିବାରୁ ଦର ଯେତେ ବଢ଼ିଲେ ମଧ୍ୟ ଅନେକ ଏହାକୁ କ୍ରୟ କରିବାକୁ ବାଧ୍ୟ ହେଉଛନ୍ତି। ରାଜ୍ୟ ବ୍ୟବସାୟୀ ସଂଘ ପକ୍ଷରୁ କୁହାଯାଇଛି, ଫସଲ ନଷ୍ଟ ହେଲେ ଦର ୧ରୁ୨ ପ୍ରତିଶତ ବଢ଼ିପାରେ। ତାହା ମଧ୍ୟ ସାମୟିକ ସମୟ ପାଇଁ ଥାଏ। ପୂର୍ବରୁ ଅତି ବେଶିରେ ୨୦ ଟଙ୍କା ବଢ଼ୁଥିଲା।
ପରବର୍ତ୍ତୀ ସମୟରେ ସ୍ଥିତି ନିୟନ୍ତ୍ରିତ ହୋଇଯାଏ। କିନ୍ତୁ ବର୍ତ୍ତମାନ ଏକାଥରକେ ୧୦୦ ପ୍ରତିଶତ ଦର ବଢ଼ୁଛି। ୨୦୨୩ ମସିହାରୁ ଲଗାତାର ଯେଉଁଭଳି ଭାବରେ ଅଦା, ରସୁଣ, ଡାଲି, ତେଲ ଭଳି ଅତ୍ୟାବଶକୀୟ ସାମଗ୍ରୀର ଦର ବଢ଼ୁଛି ଏହା ପଛରେ ବଡ଼ କର୍ପୋରେଟ ଲବି କାର୍ଯ୍ୟ କରୁଥିବା ଅନୁମାନ କରାଯାଉଛି। ବର୍ତ୍ତମାନ ଏହି ଅତ୍ୟାବଶକୀୟ ସାମଗ୍ରୀ ବିକ୍ରି ବଡ଼ ବଡ଼ କର୍ପୋରେଟ୍ କବ୍ଜାରେ ରହିଛି। ତେଣୁ ସମ୍ଭବତଃ ନିର୍ବାଚନ ସମୟରେ ମଧ୍ୟ ସରକାର ଏହାର ଦରକୁ କମ କରିପାରୁ ନାହାନ୍ତି। ବର୍ତ୍ତମାନ ସ୍ଥିତି ଯେଉଁଭଳି ରହିଛି ଚଳିତ ବର୍ଷ ମଧ୍ୟ ଏହି ଦର ପୂର୍ବାବସ୍ଥାକୁ ଫେରିବାର ଆଶା କ୍ଷୀଣ ବୋଲି ଅଧିକାଂଶ ବ୍ୟବସାୟୀମାନେ ମତ ଦେଉଛନ୍ତି।ଆଇଗିଣିଆ ପାଇକାରୀ ରସୁଣ ବ୍ୟବସାୟୀ ସତ୍ୟନାରାୟଣ ସାହୁଙ୍କ କହିବା ମୁତାବକ, କିଛି ମାସ ପୂର୍ବରୁ ରସୁଣ କିଲୋପ୍ରତି ଦର ୪୦୦ ଟଙ୍କା ଛୁଇଁଥିଲା। ଏହାର ପ୍ରଭାବ କେବଳ ଗ୍ରାହକ ନୁହେଁ ପାଇକାରୀ ବ୍ୟବସାୟୀଙ୍କ ଉପରେ ମଧ୍ୟ ପଡ଼ୁଛି। ଏଥିଯୋଗୁଁ ପୂର୍ବରୁ ଦୈନିକ ୧୦୦ ପ୍ୟାକେଟ ରସୁଣ ବିକ୍ରି ହେଉଥିଲା ବେଳେ ବର୍ତ୍ତମାନ ଏହା ୩୦ରୁ ୪୦ ପ୍ୟାକେଟରେ ସୀମିତ ରହିଛି।