ଜବରଦଖଲ ହଟାଇବାକୁ ପୌର ପରିଷଦର ପଛଘୁଂଚା
ଖୋର୍ଦ୍ଧା ପୌର ପରିଷଦର ୫ମ ସାଧାରଣ ପରିଷଦ ବୈଠକ
ଖୋର୍ଦ୍ଧା: ଆଜି ଖୋର୍ଦ୍ଧା ପୌର ପରିଷଦର ୫ମ ସାଧାରଣ ପରିଷଦ (କାଉନ୍ସିଲ) ବୈଠକ ଅନୁଷ୍ଠିତ ହୋଇଯାଇଛି । ତେବେ ସହରର ପ୍ରମୁଖ ଜବରଦଖଲ ସମସ୍ୟା ନେଇ ଉଠିଥିବା ଆଲୋଚନାରେ ପୌର ପରିଷଦ ନିଜର ସଂପୂର୍ଣ୍ଣ ଅପାରଗତା ଦର୍ଶାଇଥିବା ବୈଠକର ବିବରଣୀରୁ ସ୍ପଷ୍ଟ ହୋଇଛି ।
Sambad is now on WhatsApp
Join and get latest news updates delivered to you via WhatsApp
ସାଧାରଣତଃ ନିୟମାନୁସାରେ, ଜଳାଶୟ, ସର୍ବସାଧାରଣ ରାସ୍ତା, ନର୍ଦ୍ଦମା ନାଳ ଆଦି ମୌଳିକ ଭିତ୍ତିଭୂମି ଉପରେ କୌଣସି ପ୍ରକାର ଜବରଦଖଲ ହୋଇପାରିବ ନାହିଁ କିମ୍ବା ଜବରଦଖଲ ହଟାଇବାରେ କୌଣସି ପ୍ରତିବନ୍ଧକ ସୃଷ୍ଟି କରାଯାଇପାରିବ ନାହିଁ । କିନ୍ତୁ ଖୋର୍ଦ୍ଧାରେ ଥଇଥାନ ନାମରେ ସହରରେ ଚାଲୁଥିବା ନିୟମିତ ଜବରଦଖଲ ବିରୋଧରେ କୌଣସି ପଦକ୍ଷେପ ନେବାକୁ ଆଜି ହୋଇଥିବା ଆଲୋଚନାରେ କାଉନ୍ସିଲରଙ୍କ ଠାରୁ ଅଧ୍ୟକ୍ଷ ଓ ନିର୍ବାହୀ ଅଧିକାରୀ ସମସ୍ତେ ନିଜର ଅସାମର୍ଥ୍ୟ ପ୍ରକାଶ କରିଛନ୍ତି । ଏନେଇ ପୌରପରିଷଦ ପକ୍ଷରୁ ସ୍ପଷ୍ଟୀକରଣ ଦିଆଯାଇଛି ଯେ ଏନେଇ ଉଚ୍ଚନ୍ୟାୟାଳୟର ଆଦେଶ ରହିଛି, କିନ୍ତୁ ମାମଲାରେ ନ୍ୟାୟାଳୟର ନୋଟିସ୍ ଉପରେ ପୌରପରିଷଦ କାହିଁକି ଜବାବ ରଖିଲା ନାହିଁ ସେନେଇ ପରିଷଦ ନିରବ ରହିଛି ।
ତେବେ ବୈଠକରୁ ମିଳିଥିବା ସୂଚନାନୁସାରେ, ଥଇଥାନ ପରେ ୫୫୦ଟି କ୍ୟାବିନ୍କୁ ହଟାଯିବ ଓ ଯେଉଁ ଦୋକାନ ଅତିରିକ୍ତ ଭାବେ ରାସ୍ତା, ନାଳ ଆଦି ଜବରଦଖଲ କରିରଖିଛନ୍ତି ସେମାନଙ୍କୁ ମାଇକ ଯୋଗେ ଜବରଦଖଲ ସ୍ୱତଃସ୍ପୂର୍ତ ଭାବେ ହଟାଇବାକୁ ଅନୁରୋଧ କରାଯିବ । ଏହାସହ ଦୋକାନଗୁଡ଼ିକ ହୋଲିଡିଂ ଟିକସ ମଧ୍ୟ ଦେଉନଥିବା ନେଇ ଆଲୋଚନା ହୋଇଥିଲା । ବର୍ଷା ପରେ ସହରର ଅଟକିଥିବା ନାଳନର୍ଦ୍ଦମା ନିଷ୍କାସନ ବ୍ୟବସ୍ଥାକୁ ସଜଡ଼ାଯିବ, ଖୋଲାଥିବା ନାଳକୁ ଢାଙ୍କୁଣି ଦିଆଯିବ ବୋଲି ନିଷ୍ପତ୍ତିି ହୋଇଥିଲା । ସେହିଭଳି ପ୍ରଧାନମନ୍ତ୍ରୀ ଆବାସ ଯୋଜନାରେ ଯୋଗ୍ୟ ହିତାଧିକାରୀଙ୍କୁ ସାମିଲ କରିବା, କେନ୍ଦ୍ର ଓ ରାଜ୍ୟ ସରକାରଙ୍କ ଖାଦ୍ୟ ନିରାପତ୍ତା ଯୋଜନାରେ ଯୋଗ୍ୟ ହିତାଧିକାରୀଙ୍କୁ ସାମିଲ କରିବା ଆଦି ନେଇ ମଧ୍ୟ ଆଲୋଚନା ହୋଇଥିଲା ।
ଏହି ବୈଠକରେ ପୌରାଧ୍ୟକ୍ଷ କନକଲକ୍ଷ୍ମୀ ମହାନ୍ତି ଅଧ୍ୟକ୍ଷତା କରିଥିବା ବେଳେ ସ୍ଥାନୀୟ ବିଧାୟକ ଜ୍ୟୋତିରୀନ୍ଦ୍ର ନାଥ ମିତ୍ର, ପୌର ଉପାଧ୍ୟକ୍ଷ ଶୌର୍ଯ୍ୟରଂଜନ ମହାନ୍ତି, ଭାରପ୍ରାପ୍ତ ନିର୍ବାହୀ ଅଧିକାରୀ ତଥା ତହସିଲଦାର ଇପ୍ସିତ ସାହୁ, ଅନ୍ୟ କାଉନ୍ସିଲରମାନେ ଉପସ୍ଥିତ ଥିଲେ । ପୌର ପରିଷଦର କର୍ମଚାରୀମାନେ ବୈଠକର ପରିଚାଳନାରେ ସହଯୋଗ କରିଥିଲେ ।