ନୂଆବର୍ଷରେ ମହାପ୍ରଭୁଙ୍କ ଦର୍ଶନ ସହ ରାଜ୍ୟବାସୀଙ୍କ ମଙ୍ଗଳ କାମନା କଲେ ମୁଖ୍ୟମନ୍ତ୍ରୀ, ନବୀନ ନିବାସରୁ ଶୁଭିଲା ଭଜନ ସମ୍ରାଟ ଭିକାରି ବଳଙ୍କ ଜଗନ୍ନାଥ ଭଜନ
ଭୁବନେଶ୍ବର: ନୂଆ ଆଶା ଓ ସମ୍ଭାବନା ନେଇ ୨୦୨୨ ଆସିଛି । ଆଉ ଏହି ୨୦୨୨କୁ ନିଆରା ଢଙ୍ଗରେ ସ୍ୱାଗତ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଗତ କିଛି ଘଣ୍ଟା ହେବ ସୋସିଆଲ ମିଡ଼ିଆରେ ନବୀନଙ୍କର ଏକ ଭିଡ଼ିଓ ଭାଇରାଲ ହେଉଛି, ଯେଉଁଥିରେ ନବୀନଙ୍କର ଏକ ନିଆରା ଅନ୍ଦାଜ ଦେଖିବାକୁ ମିଳିଛି । କରୋନା କଟକଣା କାରଣରୁ ପୁରୀ ଶ୍ରୀମନ୍ଦିର ଭକ୍ତଙ୍କ ପାଇଁ ବନ୍ଦ ରହିଥିବା ବେଳେ ନବୀନ ନିବାସରେ ମହାପ୍ରଭୁଙ୍କୁ ପ୍ରାର୍ଥନା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । କାରଣ ପ୍ରତିବର୍ଷ ନୂଆବର୍ଷରେ ମହାପ୍ରଭୁଙ୍କ ଦର୍ଶନ ସହ ବର୍ଷର ଆରମ୍ଭ କରିଥାନ୍ତି ନବୀନ । କିନ୍ତୁ ଚଳିତଥର କଟକଣା ଭିତରେ ପୁରୀ ଯାଇ ସାଆନ୍ତେଙ୍କୁ ଦର୍ଶନ କରିବା ନବୀନଙ୍କ ପକ୍ଷେ ସମ୍ଭବ ହୋଇନି । କୋଭିଡ କଟକଣାକୁ ମାନି ନବୀନ ନିବାସରୁ ହିଁ ମହାପ୍ରଭୁଙ୍କୁ ପ୍ରାର୍ଥନା କରିବା ସହ ରାଜ୍ୟବାସୀଙ୍କ ମଙ୍ଗଳ କାମନା କରିଛନ୍ତି ମୁଖ୍ୟମନ୍ତ୍ରୀ।
Sambad is now on WhatsApp
Join and get latest news updates delivered to you via WhatsApp
ଭାଇରାଲ ହୋଇଥିବା ଦେଢ ମିନିଟର ଭିଡ଼ିଓରେ ନବୀନ ଏକ ଧଳା ଟି-ସାର୍ଟ ପିନ୍ଧି ରୁମରୁ ବାହାରୁଥିବାର ଦେଖିବାକୁ ମିଳିଛି । ଆଉ ପରେ ଅନ୍ୟ ଏକ ରୁମର ଦ୍ୱାର ଖୋଲିବା ସହ ଜଗନ୍ନାଥଙ୍କୁ ପ୍ରାର୍ଥନା କରୁଛନ୍ତି । ଆଉ ଏହି ସମୟରେ ଭଜନ ସମ୍ରାଟ ଭିକାରି ବଳଙ୍କ ଲୋକପ୍ରିୟ ଗୀତ ଜଗନ୍ନାଥ କିଛି ମାଗୁ ନାହିଁ ତୋତେ ଗୀତ ବାଜୁଥିବାର ଶୁଣିବାକୁ ମିଳୁଛି । ପୂର୍ବରୁ ଅନେକଥର ନବୀନଙ୍କ ଜଗନ୍ନାଥ ପ୍ରେମ ଦେଖିବାକୁ ମିଳିଛି । ଆଉ ଆଜି ଯେତେବେଳେ ଭକ୍ତଙ୍କ ପାଇଁ ପୁରୀ ଶ୍ରୀମନ୍ଦିର ବନ୍ଦ ରହିଛି ସେତେବେଳେ ନବୀନ ନିବାସରୁ ହିଁ ସାଆନ୍ତେଙ୍କ ନିକଟରେ ପ୍ରାର୍ଥନା କରିଛନ୍ତି ମୁଖ୍ୟମନ୍ତ୍ରୀ । ଆଉ ଏଭଳି କରି କୋଭିଡ ନିୟମ ପାଳନ କରିଛନ୍ତି ନବୀନ ।
ନୂଆ ବର୍ଷ ଉପଲକ୍ଷେ ରାଜ୍ୟବାସୀଙ୍କୁ ମୋର ଆନ୍ତରିକ ଶୁଭେଚ୍ଛା ଓ ଅଭିନନ୍ଦନ। ମହାପ୍ରଭୁ ଶ୍ରୀ ଜଗନ୍ନାଥଙ୍କ କୃପାରୁ ରାଜ୍ୟର ପ୍ରଗତି ସହ ପ୍ରତିଟି ଜୀବନ ମଙ୍ଗଳମୟ ହେଉ।#HappyNewYear2022 pic.twitter.com/lf2hlpUCqj
— Naveen Patnaik (@Naveen_Odisha) January 1, 2022
ଏହାପୂର୍ବରୁ ରାଜ୍ୟବାସୀଙ୍କୁ ନୂଆବର୍ଷର ଶୁଭେଚ୍ଛା ଜଣାଇଥିଲେ ନବୀନ । ୨୦୨୨ ରାଜ୍ୟବାସୀଙ୍କ ପାଇଁ ସୁଖ ଓ ସମୃଦ୍ଧିର ବର୍ଷ ହେଉ ବୋଲି ପ୍ରାର୍ଥନା କରିଛନ୍ତି ନବୀନ । ଆଉ ଏହାସହ ସମସ୍ତଙ୍କୁ କରୋନା ଗାଇଡଲାଇନ ମାନିବାକୁ ପରାମର୍ଶ ଦେଇଛନ୍ତି ମୁଖ୍ୟମନ୍ତ୍ରୀ ।