ଶିକ୍ଷା ପ୍ରଶାସନ ଶିକ୍ଷାବିତ୍ଙ୍କ ହାତରେ ରହୁ, ମୁଖ୍ୟମନ୍ତ୍ରୀଙ୍କ ହସ୍ତକ୍ଷେପ ଲୋଡ଼ିଲା ଅବସରପ୍ରାପ୍ତ ଶିକ୍ଷକ ସଂଘ
ଭୁବନେଶ୍ବର : ଶିକ୍ଷା ପ୍ରଶାସନ ସାଧାରଣ ପ୍ରଶାସନିକ ବ୍ୟବସ୍ଥାଠାରୁ ଭିନ୍ନ। ଶିକ୍ଷା ପ୍ରଶାସନ ପ୍ରତ୍ୟକ୍ଷ ଭାବେ ମାନବ ସମ୍ବଳର ସଠିକ୍ ନିୟୋଜନ ଓ ଶିକ୍ଷା ବ୍ୟବସ୍ଥାର ଗୁଣାତ୍ମକ ଅଭିବୃଦ୍ଧିରେ ସହାୟକ ହୋଇଥାଏ। ଶିକ୍ଷା ପ୍ରଶାସନରେ ସଂଶ୍ଳିଷ୍ଟ ବ୍ୟକ୍ତିବିଶେଷ ଶିକ୍ଷା ବ୍ୟବସ୍ଥାରେ ନିରବଚ୍ଛିନ୍ନ ଅଭିଜ୍ଞତା ଓ ଅଙ୍ଗିକାରବଦ୍ଧତା ରହିବା ଆବଶ୍ୟକ। ଅନ୍ତର୍ଜାତୀୟ ଓ ଜାତୀୟ ଶିକ୍ଷା ସମ୍ପର୍କିତ କମିସନ ବାହ୍ୟ ହସ୍ତକ୍ଷେପ ବିନା ଶିକ୍ଷାବିତ୍ମାନଙ୍କୁ ଶିକ୍ଷା ପ୍ରଶାସନର ସୁପରିଚାଳନା ପାଇଁ ସମ୍ପୂର୍ଣ୍ଣ ସ୍ବାଧୀନତା ସପକ୍ଷରେ ମତପୋଷଣ କରିଛନ୍ତି। ଶିକ୍ଷା ପ୍ରଶାସନର ଆଦର୍ଶଗତ ଦିଗକୁ ଲକ୍ଷ୍ୟରେ ରଖି ଅତୀତରେ ସମସ୍ତ ଶିକ୍ଷା ବିଭାଗର ନିର୍ଦେଶକ ଓ ଅନ୍ୟାନ୍ୟ ପଦପଦବୀରେ ସରକାରୀ ମହାବିଦ୍ୟାଳୟର ବରିଷ୍ଠ ତଥା ଅଭିଜ୍ଞ ଶିକ୍ଷାବିତ୍ଙ୍କୁ ନିଯୁକ୍ତ କରାଯାଉଥିଲା।
Sambad is now on WhatsApp
Join and get latest news updates delivered to you via WhatsApp
ତେବେ ଓଡ଼ିଶା ସରକାର ଏଥିରେ ବ୍ୟତିକ୍ରମ କରି ଶିକ୍ଷା ବିଭାଗର ସମସ୍ତ ଉଚ୍ଚ ପଦପଦବିରେ ସର୍ବଭାରତୀୟ ପ୍ରଶାସନିକ ସେବା(ଆଇଏଏସ୍) ଓ ଓଡ଼ିଶା ପ୍ରଶାସନିକ ସେବା(ଓଏଏସ୍)ର ବ୍ୟକ୍ତିମାନଙ୍କୁ ନିଯୁକ୍ତ କରିଛନ୍ତି। ଓଏଏସ୍ର ପୁନଃଗଠନ ସଂକଳ୍ପରେ ଉଚ୍ଚଶିକ୍ଷା ନିର୍ଦେଶକ ଓ ଶିକ୍ଷା ବିଭାଗର ପ୍ରଶାସନିକ ପଦରେ ଓଏଏସ୍ ଅଧିକାରୀଙ୍କୁ ନିଯୁକ୍ତି ଦେବା ପାଇଁ ନିଷ୍ପତ୍ତି ହୋଇଛି। ଓଡ଼ିଶା ସରକାରୀ ମହାବିଦ୍ୟାଳୟ ସେବା ନିୟମରେ ମଧ୍ୟ ପରିବର୍ତନ କରିଛନ୍ତି। ମହାବିଦ୍ୟାଳୟ ଅଧ୍ୟକ୍ଷଙ୍କ କ୍ୟାଡର ନାହିଁ। ରାଜ୍ୟ ସରକାରଙ୍କ ଏଭଳି ନିଷ୍ପତ୍ତି ଦୁର୍ଭାଗ୍ୟଜନକ ଓ ଉଚ୍ଚଶିକ୍ଷାର ଗୁଣାତ୍ମକ ଅଭିବୃଦ୍ଧିରେ ବାଧକ ହେବ। ଓଡ଼ିଶା ସରକାରୀ କଲେଜ ଅବସରପ୍ରାପ୍ତ ଶିକ୍ଷକ ସଂଘ ଏଭଳି ନିଷ୍ପତ୍ତିକୁ ନାପସନ୍ଦ କରିବା ସହ ମୁଖ୍ୟମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଛି। ଶିକ୍ଷା ବ୍ୟବସ୍ଥାର ଗୁଣାତ୍ମକ ବିକାଶ ପାଇଁ ପୂର୍ବଭଳି ସରକାରୀ ମହାବିଦ୍ୟାଳୟର ବରିଷ୍ଠ ଓ ଅଭିଜ୍ଞ ଅଧ୍ୟାପକଙ୍କୁ ଶିକ୍ଷା ବ୍ୟବସ୍ଥାର ସର୍ବୋଚ୍ଚ ନୀତି ନିର୍ଧାରଣରେ ନିଯୁକ୍ତି ପ୍ରଦାନ କରିବା ପାଇଁ ସଂଘର ସାଧାରଣ ସମ୍ପାଦକ ଧୀରେନ୍ଦ୍ର କୁମାର ମହାପାତ୍ର ଏକ ପ୍ରେସ୍ ବିଜ୍ଞପ୍ତିରେ ଜଣାଇଛନ୍ତି।