ଟାଙ୍ଗିଆ ବେଣ୍ଟ ମାଡ଼ରେ ସ୍ତ୍ରୀର ମୃତ୍ୟୁ, ସ୍ୱାମୀ ଅଟକ
ରାଇଘର: ମଦ ପିଇ ସ୍ତ୍ରୀ ସହିତ ଝଗଡା ହେବା ପରେ ସ୍ବାମୀ ଜଣକ ବିଳମ୍ବିତ ରାତିରେ ଏକ ଟାଙ୍ଗିଆ ବେଣ୍ଟ ସାହାଯ୍ୟରେ ସ୍ତ୍ରୀକୁ ମାରି ଦେଇଥିବା ଜଣାପଡିଛି | ଏଭଳି ଅମାନବିୟ ଘଟଣା ଘଟିଛି ନବରଙ୍ଗପୁର ଜିଲ୍ଲା ରାଇଘର ବ୍ଲକ ଅନ୍ତର୍ଗତ ଭାରଶୁଣ୍ଡି (ଟୋଲା) ଗ୍ରାମର ରାଉତପାରା ସାହିରେ l ଏହି ଘଟଣାରେ ରାଇଘର ପୁଲିସ ସ୍ବାମୀକୁ ଅଟକ ରଖି ପଚରାଉଚରା କରୁଛି l ମିଳିଥିବା ସୂଚନା ଅନୁଯାୟୀ ଗୋନା ପଂଚାୟତ ଅନ୍ତର୍ଗତ ଭାରଶୁଣ୍ଡି ଟୋଲା ଗ୍ରାମର ରାଉତପାରା ସାହିର ଉଦୟ ସିଂ ଗଣ୍ଡ ଗତ ୧୩ ବର୍ଷ ପୂର୍ବେ କେବିକଙ୍ଗା ଗ୍ରାମର ସିଅନ୍ତି ଗଣ୍ଡଙ୍କୁ ବିବାହ କରିଥିଲେ | ବିବାହର କିଛି ଦିନ ପରେ ଉଭୟଙ୍କ ମଧ୍ୟରେ ମନୋମାଳିନ୍ୟ ଦେଖା ଦେଇଥିଲା l ଫଳରେ ଦୁହିଁଙ୍କ ମଧ୍ୟରେ ଝଗଡା ହେବା ସହ ମାରପିଟ ହୋଇଥିଲା | ଦୁହେଁ କିଛି ବର୍ଷ ଅଲଗା ହୋଇ ରହିବା ପରେ ପୁଣି ଦୁହେଁ ଏକାଠି ରହୁଥିଲେ l କିଛି ମାସ ବ୍ୟବଧାନ ପରେ ଦୁହିଁଙ୍କ ମଧ୍ୟରେ ପୁଣି ଥରେ ମନୋମାଳିନ୍ୟ ଆରମ୍ଭ ହୋଇ ଶେଷରେ ଉଭୟଙ୍କ ସମ୍ପର୍କରେ ତିକ୍ତତା ସୃଷ୍ଟି ହୋଇଥିଲା | ଗତକାଲି ଉଦୟ ସିଂ ପ୍ରବଳ ମଦ ପିଇ ସିଅନ୍ତି ସହିତ ଝଗଡା କରିବା ସହ ତାକୁ ମାରପିଟ କରିଥିଲା l
Sambad is now on WhatsApp
Join and get latest news updates delivered to you via WhatsApp
ରାତିରେ ପୁଣି ଥରେ ଉଭୟଙ୍କ ମଧ୍ୟରେ ଝଗଡା ହେବା ସହ ଉଦୟ ସିଂ ଘରେ ଥିବା ଏକ ଟାଙ୍ଗିଆ ବେଣ୍ଟ ସାହାଯ୍ୟରେ ସିଅନ୍ତିର ମୁଣ୍ଡରେ ମାରି ଦେବା ଫଳରେ ସିଅନ୍ତି ଅଚେତ ହୋଇ ପଡ଼ିଥିଲେ l ରାତି ସାରା ଅଚେତ ହେବା ଫଳରେ ଘଟଣାସ୍ଥଳରେ ହିଁ ସିଅନ୍ତିର ମୃତ୍ୟୁ ଘଟିଥିଲା l ଏ ନେଇ ଖବର ପାଇ ସିଅନ୍ତି ଗଣ୍ଡଙ୍କ ପରିବାର ଲୋକେ ଆଜି ଭାରସୁଣ୍ଡି (ଟୋଲା) ଗ୍ରାମକୁ ପହଞ୍ଚିବା ସହିତ ସିଅନ୍ତିଙ୍କ ଭାଇ ସୁନା ଗଣ୍ଡ ରାଇଘର ଥାନାରେ ଲିଖିତ ଅଭିଯୋଗ କରିଥିଲେ |
ଖବର ପାଇ ସକାଳୁ ସ୍ଥାନୀୟ ଥାନା ଅଧିକାରୀ ଟଙ୍କଗିରି ଭୋଇ ଘଟଣା ସ୍ଥଳରେ ପହଞ୍ଚି ଶବ ଜବତ କରି ବ୍ୟବଚ୍ଛେଦ ପାଇଁ ପଠାଇବା ସହ ଅଭିଯୁକ୍ତ ଉଦୟ ସିଂ କୁ ଥାନାରେ ଅଟକ ରଖି ପଚରାଉଚରା କରୁଛି | ପ୍ରକାଶ ଥାଉକି ସିଅନ୍ତି ଓ ଉଦୟ ସିଂ ଗଣ୍ଡଙ୍କ ଛୋଟ ଛୋଟ ଦୁଇ ଝିଅ ଓ ଜଣେ ପୁଅ ଅଛନ୍ତି | ମା ର ମୃତ୍ୟୁ ଓ ବାପାଙ୍କ ଗିରଫ ପରେ ତିନି ସନ୍ତାନ ମା ଛେଉଣ୍ଡ ହେବା ସହ ଏବେ ଅସହାୟ ହୋଇ ପଡିଛନ୍ତି l