ଜେନ୍ ଗୁରୁଙ୍କ ଶିଷ୍ୟ
କଥାଟିଏ - ଯାଯାବର
ଜଣେ ଜେନ୍ ସାଧୁ ଥିଲେ। ସେ କୌଣସି ଶିଷ୍ୟ ଗ୍ରହଣ କରୁ ନ ଥିଲେ। କିନ୍ତୁ ଥରେ ଜଣେ ବିଦ୍ବାନ ତାଙ୍କ ଶିଷ୍ୟ ହେବାକୁ ଜିଦି ଧରି ବସିଲେ। ସେଠାରୁ ଗଲେ ନାହିଁ। ତେଣୁ ବାଧ୍ୟ ହୋଇ ଜେନ୍ ସାଧୁ ତାଙ୍କୁ କହିଲେ- ଯଦି ଶିଷ୍ୟ ହେବାକୁ ଚାହଁ, ତେବେ ଗୋଟିଏ ସର୍ତ୍ତରେ। ମୁଁ ଯାହା କହିବି ତାକୁ ବିନା ପ୍ରଶ୍ନରେ କରିବ।
Sambad is now on WhatsApp
Join and get latest news updates delivered to you via WhatsApp
ବିଦ୍ବାନ ରାଜି ହେଲେ।
ଜେନ୍ ସାଧୁ ଏଥର ତାଙ୍କୁ ଏକ ତଳ ନ ଥିବା ପାତ୍ର ଧରାଇ ଦେଇ କହିଲେ ଏଥିରେ କୂଅରୁ ପାଣି ଉଠାଅ।
ବିଦ୍ବାନ ଏଭଳି ଅବାସ୍ତବ କଥାରେ ଆଚମ୍ବିତ ହୋଇ ଏଭଳି କରିବାର କାରଣ ପଚାରିବାକୁ ଯାଉଥିଲେ; କିନ୍ତୁ ସର୍ତ୍ତ ମନେ ପକାଇ ଚୁପ ରହିଲେ।
ତଳହୀନ ପାତ୍ରରେ ଟୋପାଏ ବି ପାଣି ଉଠିଲା ନାହିଁ। କିନ୍ତୁ ବିଦ୍ବାନ ପାଣି ଉଠାଇ ଚାଲିଲେ। ଦିନକ ପରେ ସେ ତାଙ୍କ ନିରର୍ଥକ ପରିଶ୍ରମ ଦେଖି ଆଉ ସମ୍ଭାଳି ନ ପାରି ନମ୍ରତାର ସହିତ ପଚାରିେଦଲେ- ଗୁରୁ, ଏମିତି କାମ କାହିଁକି କରୁଛନ୍ତି। ଏଥିରେ ପାଣି ତ ଉଠୁନାହିଁ! ଏମିତି ପରିଶ୍ରମରେ ଲାଭ କ’ଣ?
ଗୁରୁ କହିଲେ- ଏହି କାରଣରୁ ଶିଷ୍ୟ ନେଉ ନାହିଁ। ଗୋଟାଏ ଦିନ ପରେ ଲାଭ ଖୋଜିଲଣି। ତୁମ ମୁଣ୍ଡରେ ପଶି ଯାଇଛି ଯେ କୂଅରୁ ପାଣି ଉଠାଇ ବ୍ୟବହାର କରିବା ଲାଗି ଏହି ବ୍ୟବସ୍ଥା ରହିଛି। ତାହା ହୋଇ ନ ପାରିଲେ ସବୁ ପରିଶ୍ରମ ବୃଥା। କିନ୍ତୁ ଯଦି ତୁମେ ସେତକ ମନରୁ ପୋଛି କେବଳ ଖାଲି ପାତ୍ରକୁ ଉଠାଇ ଚାଲିଥାଆନ୍ତ, ତେବେ ଜାଣି ଥାଆନ୍ତି ଯେ ତୁମକୁ ଶିକ୍ଷା ଦେବା ଲାଗି ତୁମ ମୁଣ୍ଡରେ ଜାଗା ଅଛି। କିନ୍ତୁ ତୁମ ମୁଣ୍ଡ ତ ପୂର୍ବ ଧାରଣା ଓ ପୂର୍ବାଗ୍ରହରେ ଭରା, ଶିକ୍ଷା ପଶିବ କେମିତି? ଏବେ ବୁଝିଲ ତ?