ଖୋର୍ଦ୍ଧା/ବେଗୁନିଆ: ଗତ ୨୯ ତାରିଖ ରାତି ପ୍ରାୟ ସାଢ଼େ ୧୦ଟାରେ ବାଘମାରୀ ବଜାର ନିକଟରେ ଜନୈକ ବ୍ୟବସାୟୀ ମନମୋହନ ସାମନ୍ତରାୟଙ୍କୁ ଗୁଳିମାଡ଼ କରି ୭୦ହଜାର ଟଙ୍କା ଲୁଟ କରି ନେଇଥିବା ଘଟଣାରେ ଆଜି ପୁଲିସ ୩ ଜଣ ଅଭିଯୁକ୍ତଙ୍କୁ ଗିରଫ କରିଛି । ମାମଲାରେ ଗିରଫ ହୋଇଥିବା ବ୍ୟକ୍ତିମାନେ ହେଲେ ପୋଡ଼ାଡିହର କମଳ ମଙ୍ଗରାଜ ଓରଫ ପପୁ, କୁମ୍ବୀଲୋର ଜୀବନ ସୁନ୍ଦରାୟ ଓରଫ ଦିପୁ ଓ ବରୁଣ ସାମନ୍ତରାୟ ଓରଫ ବୁବୁ । ସେମାନଙ୍କ ନିକଟରୁ ୭ ହଜାର ଟଙ୍କା ଜବତ କରାଯାଇଛି । ଗିରଫ ହୋଇଥିବା ଅଭିଯୁକ୍ତଙ୍କ ମଧ୍ୟରୁ ଜୀବନ ଓରଫ ଦିପୁ ମନମୋହନଙ୍କ ଠାରୁ ଟଙ୍କା ଲୁଟିବାକୁ ଯୋଜନା କରି ଅନ୍ୟମାନଙ୍କୁ ଏକାଠି କରିଥିଲେ ।
Sambad is now on WhatsApp
Join and get latest news updates delivered to you via WhatsApp
ସେହିଭଳି ଏହି ଅପରାଧରେ ସମ୍ପୃକ୍ତ ଥିବା ପପୁ ମଙ୍ଗରାଜ ବିରୋଧରେ ଖୋର୍ଦ୍ଧାର ବିଭିନ୍ନ ଥାନାରେ ଏକାଧିକ ଅପରାଧିକ ମାମଲା ରହିଛି । ତେବେ ଲୁଟ ଦିନ ଯେଉଁ ଆସାମୀ ଜଣକ ମନମୋହନଙ୍କ ଉପରେ ଗୁଳି ମାଡ଼ କରିଥିଲା ସେ ଓ ଅନ୍ୟ ୪ ଜଣ ଫେରାର୍ ଅଛନ୍ତି । ସେମାନଙ୍କ ଚିହ୍ନଟ ହୋଇସାରିଛି, ଖୁବଶୀଘ୍ର ସେମାନଙ୍କୁ ଧରାଯିବ ବୋଲି ଏସପି ରାଜକିଶୋର ଦୋରା କହିଛନ୍ତି । ସୂଚନାଯୋଗ୍ୟ, ୨୯ ତାରିଖ ରାତିରେ ମନମୋହନ ନିଜର ଦୋକାନ ବନ୍ଦ କରି ଏକ ଟିଭିଏସ୍ ମୋପେଡରେ ସୁନ୍ଦରାସାହିସ୍ଥ ନିଜ ଘରକୁ ଫେରୁଥିଲେ ।
ଏହି ସମୟରେ ରାଜସ୍ୱ କାର୍ଯ୍ୟାଳୟ ନିକଟ ଛକରେ ୭ଜଣ ଯୁବକ ତାଙ୍କୁ ଅଟକାଇବା ସହ ତାଙ୍କ ଗୋଡ଼କୁ ଗୁଳିମାଡ଼ କରି ସେ ଧରିଥିବା ଟଙ୍କା ଭର୍ତି ବ୍ୟାଗଟିକୁ ଲୁଟି ନେଇଥିଲେ । ଗୁଳି ଶବ୍ଦ ଶୁଣି ଆଖପାଖର ଲୋକ ସେଠାରେ ଏକଜୁଟ ହୋଇଥିଲେ । ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ମନମୋହନଙ୍କୁ ଉଦ୍ଧାର କରି ପ୍ରଥମେ ଖୋର୍ଦ୍ଧା ଜିଲ୍ଲା ମୁଖ୍ୟ ଚିକିତ୍ସାଳୟ ଓ ପରେ ଭୁବନେଶ୍ୱର ଏମ୍ସକୁ ସ୍ଥାନାନ୍ତର କରାଯାଇଥିଲା । ଏହି ମାମଲାରେ ଅପରାଧୀଙ୍କୁ ଧରିବାକୁ ଏସପିଙ୍କ ନିର୍ଦ୍ଦେଶରେ ଏସଡିପିଓ ସୁଶୀଲ କୁମାର ମିଶ୍ର, ଖୋର୍ଦ୍ଧା ସ୍ପେସାଲ୍ ସ୍କ୍ୱାଡ୍ ଅଧିକାରୀ ରାମଚନ୍ଦ୍ର ମିଶ୍ରଙ୍କ ନେତୃତ୍ୱରେ ଏକ ଟିମ୍ ଗଠନ କରାଯାଇ ମାମଲାର ତଦନ୍ତ ଆରମ୍ଭ ହୋଇଥିଲା ।