ଇନଷ୍ଟାଗ୍ରାମରେ ଫଟୋ ଛାଡ଼ି ନିର୍ବାଚନ ପର୍ଯ୍ୟବେକ୍ଷକ ପଦରୁ ବିଦାହେଲେ ଆଇଏଏସ୍
ଅହମ୍ମଦାବାଦ: ଇନଷ୍ଟାଗ୍ରାମରେ ପଦ ଓ ପାୱାର ଦେଖାଇ ଅଡୁଆରେ ପଡିଲେ ଆଇଏଏସ ଅଫିସର | ଗୁଜୁରାଟ ନିର୍ବାଚନ ସମୟରେ ଇନଷ୍ଟାଗ୍ରାମରେ ନିଜର ଏକ ପୋଷ୍ଟ ମାଧ୍ୟମରେ ଶକ୍ତି ପ୍ରଦର୍ଶନ କରିଥିବାରୁ ନିର୍ବାଚନ ଆୟୋଗ ଜଣେ ଅଧିକାରୀଙ୍କୁ ପର୍ଯ୍ୟବେକ୍ଷକ ଦାୟିତ୍ୱରୁ ହଟାଇ ଦେଇଛନ୍ତି। ନିର୍ବାଚନ ଆୟୋଗ ପକ୍ଷରୁ ଜାରି ନିର୍ଦ୍ଦେଶ ମୁତାବକ ଉତ୍ତରପ୍ରଦେଶ କ୍ୟାଡରର ଜଣେ ଅଧିକାରୀ ଅଭିଷେକ ସିଂ ଇନଷ୍ଟାଗ୍ରାମରେ ନିଜର ଫଟୋ ସେୟାର କରିଛନ୍ତି ଏବଂ ନିଜର ପଦବୀକୁ ଏକ ପ୍ରଚାର ପ୍ରସାର ପାଇଁ ବ୍ୟବହାର କରିଛନ୍ତି। ଗୁଜୁରାଟ ବିଧାନସଭା ନିର୍ବାଚନ ସମୟରେ ଅଭିଷେକ ସିଂ ଦୁଇଟି ବିଧାନସଭା ନିର୍ବାଚନମଣ୍ଡଳୀ ଅହମ୍ମଦାବାଦ-ବାପୁନଗର ଏବଂ ଆସାରୱା ପାଇଁ ପର୍ଯ୍ୟବେକ୍ଷକ ଭାବରେ ନିଯୁକ୍ତ ହୋଇଥିଲେ।
Sambad is now on WhatsApp
Join and get latest news updates delivered to you via WhatsApp
ସୂତ୍ରରୁ ପ୍ରକାଶ ଯେ ନିର୍ବାଚନ ଆୟୋଗ ଅଧିକାରୀଙ୍କ ଇନଷ୍ଟା ପୋଷ୍ଟକୁ ଅତ୍ୟନ୍ତ ଗମ୍ଭୀରତାର ସହ ନେଇଥିଲେ ଏବଂ ତେଣୁ ତାଙ୍କୁ ତୁରନ୍ତ ପର୍ଯ୍ୟବେକ୍ଷକ ଭାବରେ ତାଙ୍କ କାର୍ଯ୍ୟରୁ ହଟାଇ ଦେଇଥିଲେ | ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ କୌଣସି ନିର୍ବାଚନ ସମ୍ବନ୍ଧୀୟ କାର୍ଯ୍ୟରେ ଜଡିତ ହୋଇପାରିବେ ନାହିଁ ବୋଲି ନିର୍ଦ୍ଦେଶନାମା ଜାରି କରାଯାଇଛି | ତାଙ୍କୁ ଆଜି ନିର୍ବାଚନମଣ୍ଡଳୀ ଛାଡିବାକୁ ନିର୍ଦ୍ଦେଶ ଦିଆଯାଇଛି। ସୂତ୍ରରୁ ପ୍ରକାଶ ଯେ ଅଭିଷେକ ସିଂଙ୍କୁ ପର୍ଯ୍ୟବେକ୍ଷକ ଦାୟିତ୍ୱ ପାଇଁ ଦିଆଯାଇଥିବା ସମସ୍ତ ସରକାରୀ ସୁବିଧା ପ୍ରତ୍ୟାହାର କରି ନିଆଯାଇଛି। ଅଭିଷେକ ସିଂଙ୍କ ସ୍ଥାନରେ ଆଉ ଜଣେ ଆଇଏଏସ୍ (ଭାରତୀୟ ପ୍ରଶାସନିକ ସେବା) ଅଧିକାରୀ କୃଷ୍ଣ ବାଜପାଇଙ୍କୁ ନିଯୁକ୍ତ କରାଯାଇଛି।