କାବୁଲ : ଆଫଗାନିସ୍ତାନରେ ଗୁରୁବାରଦିନ ହୋଇଥିବା ସିରିଜ ବୋମା ବିସ୍ଫୋରଣ ପାଇଁ ନିଜକୁ ଦାୟୀ କରିଛି ଇସଲାମିକ୍ ଷ୍ଟେଟ୍ ବା ଆଇଏସ୍ । ଜଣେ ବରିଷ୍ଠ ଆଇଏସ କମାଣ୍ଡରଙ୍କ ହତ୍ୟାର ପ୍ରତିଶୋଧ ନେବା ପାଇଁ ଏସବୁ ଆକ୍ରମଣ କରାଯାଇଥିବା ଆଇଏସ ପକ୍ଷରୁ କୁହାଯାଇଛି ।
Sambad is now on WhatsApp
Join and get latest news updates delivered to you via WhatsApp
ଗୁରୁବାରଦିନ ଆଫଗାନିସ୍ତାନର ୪ଟି ସ୍ଥାନରେ ହୋଇଥିବା ପୃଥକ ପୃଥକ ବିସ୍ଫୋରଣରେ ମୋଟ ୩୧ ଜଣ ଲୋକ ନିହତ ହେବା ସହ ୮୭ ଜଣ ଆହତ ହୋଇଥିଲେ ।
ସବୁଠାରୁ ବଡ଼ ବିସ୍ଫୋରଣଟି ଉତ୍ତର ଆଫଗାନିସ୍ତାନରେ ଥିବା ଐତିହାସିକ ମଜାର-ଏ-ସରିଫ୍ ସହରରେ ହୋଇଥିଲା । ଏକ ସିହା ମସଜିଦରେ ହୋଇଥିବା ଏହି ବିସ୍ଫୋରଣଟି ବେଶ୍ ଶକ୍ତିଶାଳୀ ଥିବା କୁହାଯାଉଛି । ପବିତ୍ର ରମଜାନ ମାସ ଚାଲିଥିବାରୁ ସାଇ ଡୋକେନ ମସଜିଦରେ ବେଶ ଭୀଡ଼ ଥିଲା । ସିହା ସଂପ୍ରଦାୟର ଲୋକମାନଙ୍କୁ ଟାର୍ଗେଟ କରି ଏହି ବିସ୍ଫୋରଣ କରାଯାଇଥିଲା । ଏ ସଂପର୍କରେ ଆଇଏସ ପକ୍ଷରୁ କୁହାଯାଇଛି ଯେ ମସଜିଦରେ ଲୋକଭୀଡ଼ ଥିବାବେଳେ ଏକ ରିମୋଟ ଚାଳିତ ଡିଭାଇସ ମାଧ୍ୟମରେ ବୋମା ବିସ୍ଫୋରଣ କରାଯାଇଥିଲା ।
ସେହିପରି କାବୁଲର ଏକ ସ୍କୁଲ ଓ କୁନ୍ଦୁଜ ସହରରେ ବି ବିସ୍ଫୋରଣ ହୋଇଥିଲା । ୪ର୍ଥ ବିସ୍ଫୋରଣଟି ନଙ୍ଗରହାର ରାଜ୍ୟରେ ତାଲିବାନର ଏକ ଗାଡ଼ିକୁ ଏକ ଲାଣ୍ଡମାଇନ ଦ୍ବାରା ଉଡ଼ାଇ ଦିଆଯାଇଥିଲା । ଏଥିରେ ୪ ତାଲିବାନ ସଦସ୍ୟ ମୃତ୍ୟୁବରଣ କରିଥିଲେ ।