ପଶ୍ଚିମବଙ୍ଗ ବିଜେପି କନ୍ଦଳ: କେନ୍ଦ୍ରମନ୍ତ୍ରୀଙ୍କୁ ତାଲା ପକାଇଦେଲେ କର୍ମୀ

କୋଲକାତା: ପଶ୍ଚିମବଙ୍ଗର ବାଙ୍କୁଡ଼ାରେ ଆଜି ବିଜେପି କର୍ମୀମାନେ କେନ୍ଦ୍ରମନ୍ତ୍ରୀ ସୁଭାଷ ସରକାରଙ୍କୁ ପାର୍ଟି ଅଫିସରେ ତାଲା‌ ପକାଇ ଦେଇଛନ୍ତି। ସୁଭାଷ ସରକାର ଅତ୍ୟନ୍ତ ସ୍ବେଚ୍ଛାଚାରୀ ଢଙ୍ଗରେ ବିଜେପି ଜିଲ୍ଲା ଶାଖାକୁ ପରିଚାଳନା କରୁଛନ୍ତି ବୋଲି ସେମାନେ ଅଭିଯୋଗ କରିଛନ୍ତି। କେନ୍ଦ୍ର ଶିକ୍ଷା ବିଭାଗ ରାଷ୍ଟ୍ରମନ୍ତ୍ରୀ ତଥା ବାଙ୍କୁଡ଼ା ସାଂସଦ ସୁଭାଷ ଆଜି ଅପରାହ୍ନ ପ୍ରାୟ ଗୋଟାଏ ସମୟରେ ଦଳୀୟ ଅଫିସରେ ଏକ ବୈଠକ କରୁଥିବାବେଳେ ଏହି ସମୟରେ ବିଜେପି କର୍ମୀମାନେ ସ୍ଲୋଗାନ ଦେଇ ପାର୍ଟି ଅଫିସ ଭିତରକୁ ପଶି ଯାଇଥିଲେ ଏବଂ ତାଙ୍କୁ ତାଲା ପକାଇ ଦେଇଥିଲେ। ମୋହିତ ଶର୍ମା ନାମକ ଜଣେ ଆନ୍ଦୋଳନକାରୀ କହିଛନ୍ତି, ସୁଭାଷ ସରକାର ଦଳର ଭଲ କର୍ମୀମାନଙ୍କୁ ଗୁରୁତ୍ବ ଦେଉନାହାନ୍ତି।

ଦଳକୁ ସୁରକ୍ଷା ଦେବାପାଇଁ ଆମେ ଏଠାରେ ଏକାଠି ହୋଇଛୁ ବୋଲି ସେ କହିଛନ୍ତି। ମନ୍ତ୍ରୀଙ୍କ ଅଯୋଗ୍ୟତା ପାଇଁ ଚଳିତ ଥର ବାଙ୍କୁଡ଼ା ମ୍ୟୁନିସପାଲିଟିରେ ବିଜେପି କୌଣସି ଆସନ ପାଇବନି ବୋଲି ସେ କହିଛନ୍ତି। ମନ୍ତ୍ରୀଙ୍କୁ ତାଲା ପକାଯିବା ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚିଥିଲା ଏବଂ କେନ୍ଦ୍ରମନ୍ତ୍ରୀଙ୍କୁ ବନ୍ଦ ଘରୁ ଉଦ୍ଧାର କରିଥିଲା। ବିଜେପି ରାଜ୍ୟ ମୁଖପାତ୍ର ସମିକ ଭଟ୍ଟାଚାର୍ଯ୍ୟ ଉକ୍ତ ଘଟଣାକୁ ଦୁର୍ଭାଗ୍ୟଜନକ କହିବା ସହ ଦଳୀୟ କର୍ମୀଙ୍କ ବିରୋଧ‌ରେ କାର୍ଯ୍ୟାନୁଷ୍ଠାନ ଗ୍ରହଣ ହେବ ବୋଲି କହିଛନ୍ତି। ବିଜେପି ଭଳି ଶୃଙ୍ଖଳିତ ଦଳରେ ଏଭଳି ଘଟଣା‌ ଅଗ୍ରହଣୀୟ ବୋଲି ସେ କହିଛନ୍ତି।