ବିନା ପ୍ଲାନ୍ ମଂଜୁରିରେ ଲୋ-ରିସ୍କ କୋଠା
ୱେବ୍ସାଇଟ୍ରେ ଅଛି ୧୦୪ ଅନୁମୋଦିତ ପ୍ଲାନ୍
ଭୁବନେଶ୍ବର : ଲୋ-ରିସ୍କ କୋଠା ପାଇଁ ଆଉ ବିଲ୍ଡିଂ ପ୍ଲାନ୍ ମଂଜୁରିର ଆବଶ୍ୟକତା ପଡ଼ିବ ନାହିଁ। ସର୍ବାଧିକ ୧୦ ମିଟର ଉଚ୍ଚତା ବିଶିଷ୍ଟ କୋଠା ନିର୍ମାଣ ପାଇଁ ପ୍ଲାନ୍ ମଂଜୁରି ଦରକାର ନାହିଁ। ବିଡିଏ ୱେବ୍ସାଇଟ୍ରେ ୧୦୪ଟି ଅନୁମୋଦିତ ବିଲ୍ଡିଂ ପ୍ଲାନ୍ ରହିଛି। ଏଥିରୁ ଘର ମାଲିକ ମନ ପସନ୍ଦର ପ୍ଲାନ୍ ଚୟନ କରିପାରିବେ। ବିଡିଏ, ବିଏମ୍ସି ଓ ହାଉସିଂ ବୋର୍ଡର ଅନୁମୋଦନ ପାଇଥିବା ବିଲ୍ଡିଂ ପାଇଁ ଅନଲାଇନ୍ରେ ଦେୟ ଦେଇ ନାଗରିକମାନେ ପ୍ଲାନ୍ ନେଇପାରିବେ। ବିଏମ୍ସି କମିସନର୍ ତଥା ବିଡିଏର ଉପାଧ୍ୟକ୍ଷ ପ୍ରେମଚନ୍ଦ୍ର ଚୌଧୁରୀ ଆଜି ଏହି ମଡ୍ୟୁଲ୍ର ପ୍ରଚଳନକୁ ଶୁଭାରମ୍ଭ କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ବିଭିନ୍ନ ପ୍ରକାରର ମାନକ ପ୍ଲଟ୍(୨୫ରେ ୪୦ ଫୁଟ୍, ୨୫ରେ ୫୦ ଫୁଟ୍ ଇତ୍ୟାଦି) ଯେଉଁଠାରେ ଆବଶ୍ୟକ ରାସ୍ତାର ସୁବିଧା ରହିଥିବ, ସେସବୁ ସ୍ଥାନର ଅନଲାଇନ୍ ଅନୁମୋଦନ ହୋଇପାରିବ। ଲୋ-ରିସ୍କ ବିଲ୍ଡିଂ ମୁଖ୍ୟତଃ ୧୦ ମିଟରରୁ ଅଧିକ ଉଚ୍ଚ କିମ୍ବା ପ୍ଲଟ୍ର ଆକାର ୫ଶହ ବର୍ଗଫୁଟରୁ ଅଧିକ ହୋଇ ନ ଥିବ। ଏହାର ବେସମେଣ୍ଟ ନ ଥିବା ବେଳେ କୌଣସି ସରକାରୀ ବିଭାଗର କବ୍ଜାରେ ବା ନିୟମ ଅଧୀନରେ ପ୍ଲଟ୍ ନ ଥିବ। ଅନଲାଇନ୍ରେ ନାଗରିକମାନେ ଏଥିପାଇଁ ଦେୟ ନଦେଇ ପ୍ଲାନ୍ ଅନୁମୋଦନ କରିପାରିବେ। ରୋଡ୍ କଟିଂ ପାଇଁ ଭୁବନେଶ୍ବର ‘ମି’ ଯାଇ ସିଟିଜେନ୍ ସର୍ଭିସ ପୋର୍ଟାଲରେ ଏହି ଅନୁମୋଦନ କରିବାକୁ ହେବ। କୌଣସି ସ୍ଥାନରେ ରାସ୍ତା କାଟିବା ଓ ଉପଯୁକ୍ତ କାରଣ, ସମୟ, ଉଦ୍ଦେଶ୍ୟ ପ୍ରଭୃତି ଉଲ୍ଲେଖ କରିବାକୁ ହେବ। ସଂପୃକ୍ତ ସଂସ୍ଥାର ନାଁ, ଠିକଣା, କେତେ ଲମ୍ବର କଟିଂ ହେବ, କେଉଁ ସ୍ଥାନରେ ହେବ ଓ କେଉଁ ପ୍ରକାରର କାର୍ଯ୍ୟ ହେବ ତାହାର ସୂଚନା ଦେବାକୁ ହେବ ବୋଲି ବିଡିଏ ପକ୍ଷରୁ ସୂଚନା ଦିଆଯାଇଛି।