ବାଙ୍ଗାଲୋର: କିଛି ଦିନ ତଳେ ବାଙ୍ଗାଲୋରର ଜଣେ ବସ କଣ୍ଡକ୍ଟର ୟୁପିଏସସି ବା ସଂଘୀୟ ଲୋକସେବା ଆୟୋଗ ପରୀକ୍ଷାର ପ୍ରି ଓ ମେନ୍ ପରୀକ୍ଷାରେ ସଫଳତା ହାସଲ କରିଥିବା ନେଇ ଖବର ପ୍ରକାଶ ପାଇଥିଲା | ଜାତୀୟ ଗଣମାଧ୍ୟମର ଖବର ଅନୁସାରେ ବାଙ୍ଗାଲୋର ବିଏମ୍ଟିସି(ବାଙ୍ଗାଲୋର ମେଟ୍ରୋପଲିଟାନ ଟ୍ରାନ୍ସପୋର୍ଟ କର୍ପୋରେସନ) ର ଜଣେ ବସ୍ କଣ୍ଟକ୍ଟର ଭାବେ କାମ କରୁଥିବା ୨୯ ବର୍ଷୀୟ ମଧୁ ୟୁପିଏସ୍ସି ପରୀକ୍ଷାର ପ୍ରି ଓ ମେନ ପରୀକ୍ଷା ପାସ୍ କରିଥିବା ନେଇ ଖବର ଆସିଥିଲା | କିନ୍ତୁ ଏବେ ଏହି ଖବର ମିଛ ବୋଲି ଜଣାପଡିଛି | ମଧୁ ପରୀକ୍ଷାରେ ଯୋଗ୍ୟତା ହାସଲ କରିନଥିବାବେଳେ ଗଣମାଧ୍ୟମକୁ ବିଭ୍ରାନ୍ତ କରିଥିବାର ଜଣାପଡିଛି |
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ମୁତାବକ ଜାନୁୟାରୀ ୧୪ ତାରିଖ ୨୦୨୦ରେ ୟୁପିଏସସି ନୋଟିସରେ ଉଲ୍ଲେଖ ଥିବା ସାକ୍ଷାତକାର ତାଲିକାରେ ମଧୁଙ୍କ ନାମ ନଥିଲା | ଏହି ସାକ୍ଷାତକାର ଆଇଏଏସ, ଆଇପିଏସ, ଆଇଏଫଏସ ଓ ଅନ୍ୟ କେନ୍ଦ୍ର ଅଧିକାରୀଙ୍କ ନିଯୁକ୍ତି ପାଇଁ ନିଆଯାଇଥାଏ | ମଧୁ ଯେଉଁ ସାର୍ଟିଫିକେଟ ଦେଖାଇଥିଲେ ତାହା ତାଙ୍କର ନଥିଲା ବୋଲି ଜଣାପଡିଛି | ଏହି ସାର୍ଟିଫିକେଟ ମଧୁ କୁମାରୀ ନାମକ ଜଣେ ଯୁବତୀଙ୍କର ହୋଇଥିବାବେଳେ ମଧୁ ଚଂଚକତା କରି ସମସ୍ତଙ୍କୁ ମିଛ କଥା କହିଥିଲେ | ଏହି ମିଛ ଖବରକୁ ନେଇ ବାଙ୍ଗାଲୋର ମିରରର ସମ୍ପାଦକ ରବି ଯୋଶୀ କ୍ଷମା ପ୍ରାର୍ଥନା କରିଛନ୍ତି | କାରଣ ପ୍ରଥମେ ଏହି ଖବରଟି ବାଙ୍ଗାଲୋର ମିରରରେ ପ୍ରକାଶ ପାଇଥିଲା ଓ ଧୀରେ ଧୀରେ ଏହା ଭାଇରାଲ ହୋଇଥିଲା |
I would like to apologise to all our readers. It was such a great story of grit and determination that even the BMTC MD and all his seniors decided to help him crack the interview. Alas, it was too good to be true
— Ravi Joshi (@Joshi_Aar) January 30, 2020
ଅନ୍ୟପକ୍ଷରେ କିଭଳି କଣ୍ଡକ୍ଟର ଜଣକ ସମସ୍ତଙ୍କୁ ଭୁଆଁ ବୁଲାଇଥିଲେ ବିଏମଟିସି ବର୍ତ୍ତମାନ ଏହି ଘଟଣାର ତଦନ୍ତ କରୁଛି | ଏଠାରେ ସୂଚନା ଥାଉ କି ମାର୍ଚ୍ଚ ୨୫ ତାରିଖରେ ତାଙ୍କର ଇଣ୍ଟରଭ୍ୟୁ ଅଛି ବୋଲି ମଧୁ କହିଥିଲେ | ଏସବୁ ଭଗବାନଙ୍କ ଆର୍ଶୀବାଦ ସହିତ ତାଙ୍କର ଆତ୍ମବିଶ୍ୱାସ ଓ କଠିନ ପରିଶ୍ରମ ହେତୁ ଏହା ସମ୍ଭବ ହୋଇପାରିଛି ବୋଲି ବସ୍ କଣ୍ଡକ୍ଟର ମଧୁ କହିଥିଲେ, ଯାହାକି ମିଛ ବୋଲି ଜଣାପଡିଛି ।