ଭୁବନେଶ୍ବର: ଅଲିମ୍ପିକ୍ ବିଜେତା ପ୍ରମୋଦ ଭଗତ ଶନିବାର ଉଦ୍ଯାପିତ ହୋଇଯାଇଥିବା ଥାଇଲାଣ୍ଡ ପାରା ବ୍ୟାଡ୍ମିଣ୍ଟନ ପ୍ରତିଯୋଗିତାରେ ୩ ପଦକ କରାୟତ୍ତ କରିଛନ୍ତି। ପୁରୁଷ ଯୁଗଳରେ ସ୍ବର୍ଣ୍ଣିମ ସଫଳତା ହାତେଇଥିବା ପ୍ରମୋଦ ଏକକରେ ରୌପ୍ୟ ଏବଂ ମିଶ୍ରିତ ଯୁଗଳରେ କାଂସ୍ୟ ପଦକ ହାସଲ କରିଛନ୍ତି। ଶୁକ୍ରବାର ପୁରୁଷ ଯୁଗଳ ସେମିଫାଇନାଲ୍ରେ ଅନ୍ୟତମ ଭାରତୀୟ ଯୋଡ଼ି ମହମ୍ମଦ ଅର୍ବାଜ ଅନ୍ସାରୀ ଓ ଦୀପ ରଂଜନ ବିଶୋୟୀଙ୍କୁ ହରାଇଥିବା ପ୍ରମୋଦ ଓ ତାଙ୍କ ସାଥୀ ସୁକାନ୍ତ କଦମ ଶନିବାର ଏସ୍ଏଲ୍୩-ଏସ୍ଏଲ୍୪ ବର୍ଗର ଫାଇନାଲ୍ରେ ଇଣ୍ଡୋନେସିଆ ଯୋଡ଼ି ଦ୍ବିୟୋକୋ ଓ ଫ୍ରେଡି ସେତିଆୱାନଙ୍କୁ ୨୧-୧୮ ଓ ୨୧-୧୩ ସିଧାସଳଖ ଗେମ୍ରେ ପରାସ୍ତ କରି ସ୍ବର୍ଣ୍ଣ ପଦକ କବ୍ଜା କରିନେଇଥିଲେ।
Sambad is now on WhatsApp
Join and get latest news updates delivered to you via WhatsApp
ଅନ୍ୟପକ୍ଷରେ ପୁରୁଷ ଏକକ ସେମିଫାଇନାଲ୍ରେ ନିଜ ଦେଶର ନୀତେଶ କୁମାରଙ୍କୁ ପରାସ୍ତ କରିଥିବା ପ୍ରମୋଦ ଶନିବାର ଫାଇନାଲ୍ରେ ଇଂଲଣ୍ଡର ଡାନିଏଲ ବେଥେଲଙ୍କ ନିକଟରୁ ୧୩-୨୧ ଓ ୧୯-୨୧ ସିଧାସଳଖ ଗେମ୍ରେ ହାରିଯାଇ ରୌପ୍ୟରେ ସନ୍ତୁଷ୍ଟ ରହିଥିଲେ। ଏହା ପୂର୍ବରୁ ମିଶ୍ରିତ ଯୁଗଳରେ ପ୍ରମୋଦ ଓ ତାଙ୍କ ସାଥୀ ମନୀଷା ରାମଦାସ ୧୩-୨୧, ୯-୨୧ରେ ଫ୍ରାନ୍ସର ଲୁକାସ ମଜୁର ଓ ଫୌଷ୍ଟିନ୍ ନୋଏଲଙ୍କଠୁ ହାରି କାଂସ୍ୟରେ ସନ୍ତୁଷ୍ଟ ରହିଥିଲେ। ଏହି ପ୍ରତିଯୋଗିତାରେ ଭାଗ ନେଇଥିବା ଅନ୍ୟତମ ଓଡ଼ିଆ ତାରକା ଦୀପରଞ୍ଜନ ବିଶୋଇ ଯୁଗଳ ସେମିଫାଇନାଲ୍ରେ ପ୍ରମୋଦ-ସୁକାନ୍ତ ଯୋଡ଼ିଙ୍କ ନିକଟରୁ ହାରି କାଂସ୍ୟ ପଦକ ରେ ସନ୍ତୁଷ୍ଟ ରହିଥିଲେ।