ଗୁରୁଗ୍ରାମ : ଦିଲ୍ଳୀର ଗୁରୁଗ୍ରାମର ଟିକରି ଗ୍ରାମରେ ଦେଖିବାକୁ ମିଳିଛି ଏକ ଅଭାବନୀୟ ଘଟଣା । ଦ୍ୱାଦଶ ଶ୍ରେଣୀରେ ଅଧ୍ୟୟନରତ ଛାତ୍ରୀ ପଡ଼ୋଶୀ ଯୁବକଙ୍କ କମେଣ୍ଟ ସହ୍ୟ ନକରି ପାରି ଆତ୍ମହତ୍ୟା କରିଛନ୍ତି । ଘଟଣାସ୍ଥଳରେ ମିଳିଥିବା ସୁଇସାଇଡ୍ ନୋଟକୁ ଆଧାର କରି ପୁଲିସ ମାମଲା ରୁଜୁ କରିବା ସହ ବର୍ତ୍ତମାନ ତଦନ୍ତ କରୁଛି।
ପୁଲିସ ସୂଚନା ଅନୁଯାୟୀ , ଗୁରୁଗ୍ରାମର ବାଦସାହାପୁର ନିକଟସ୍ଥ ଟିକରି ଗ୍ରାମରେ ଦ୍ୱାଦଶ ଶ୍ରେଣୀରେ ଅଧ୍ୟୟନରତ ନାବାଳିକା ଘର ପଙ୍ଖାରେ ଫାଶୀ ଲଗାଇ ଆତ୍ମହତ୍ୟା କରିଛନ୍ତି । ବୁଧବାର ଦିନ ବହୁ ସମୟ ପରେ ମଧ୍ୟ ସ୍କୁଲ ଯିବା ପାଇଁ ନ ବାହାରିବାରୁ ନାବାଳିକାଙ୍କ ମା’ ତାଙ୍କ କୋଠରୀରେ ଯାଇ ଦେଖିଥିଲେ । ସେଠାରେ ସେ ତାଙ୍କ ଝିଅକୁ ପଙ୍ଖାରେ ଝୁଲନ୍ତା ଅବସ୍ଥାରେ ପାଇଥିଲେ । ଏହାପରେ ତୁରନ୍ତ ନାବାଳିକାଙ୍କୁ ଡ଼ାକ୍ତରଖାନା ନିଆଯାଇଥିଲେ ହେଁ ଡ଼ାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏନେଇ ପୁଲିସରେ ମାମଲା ରୁଜୁ କରାଯିବା ସହ ମୃତକୁ ବ୍ୟବଛେଦ ପାଇଁ ପଠାଯାଇଛି।
Sambad is now on WhatsApp
Join and get latest news updates delivered to you via WhatsApp
ପୁଲିସକୁ ଘଟଣାସ୍ଥଳରୁ ନାବାଳିକାଙ୍କର ଏକ ଚିଠି ମିଳିଥିଲା । ଯାହାପରେ ସମସ୍ତ ଘଟଣା ଉପରୁ ପରଦା ଉଠିଥିଲା । ଏହି ଚିଠିରେ ନାବାଳିକା ତାଙ୍କୁ ସ୍କୁଲ ଯିବାଆସିବା ବାଟରେ କିଛି ପଡ଼ୋଶୀ ଯୁବକ କମେଣ୍ଟ ମାରୁଥିବାର ଲେଖିଥିଲେ । ଯେଉଁଥିପାଇଁ ସେ ମାନସିକ ଚାପରେ ରହୁଥିଲେ । ଶେଷକୁ କିଛି ଉପାୟ ନପାଇ ଆତ୍ମହତ୍ୟାର ନିଷ୍ପତ୍ତି ନେଇଥିଲେ । ବର୍ତ୍ତମାନ ଏହି ଚିଠିକୁ ଆଧାର କରି ଘଟଣାଟିର ତଦନ୍ତ କରିବା ସହ ଅଭିଯୁକ୍ତ ଯୁବକକୁ ଖୋଜୁଛି ପୁଲିସ । ଏହା ସହ ନାବାଳିକାଙ୍କ ସ୍କୁଲ ଯିବାଆସିବା ବାଟରେ ଘଟଣା ସମ୍ବନ୍ଧରେ ଲୋକଙ୍କୁ ପଚରାଉଚରା କରିବା ସହ ରାସ୍ତାରେ ଥିବା ସିସିଟିଭି ଫୁଟେଜର ମଧ୍ୟ ଯାଞ୍ଚ କରୁଛି।