କଖାରୁ କିଆରିକୁ ଯାଇଥିଲେ ଚାଷୀ, ବଜ୍ରାଘାତରେ ଜଣେ ମୃତ
ଗୁହାଳେ ଗାଇ ମୃତ ଏବଂ ୨ ଖଣ୍ଡ ହୋଇଗଲା ନଡ଼ିଆ ଗଛ
ବାଲିପାଟଣା: ଖୋର୍ଦ୍ଧା ଜିଲ୍ଲା ବାଲିପାଟଣା ବ୍ଲକରେ ଆଜି ବଜ୍ରପାତରେ ବ୍ୟାପକ କ୍ଷୟକ୍ଷତି ହୋଇଛି। ଗୁଆପୁର ପଞ୍ଚାୟତ କୁଞ୍ଚୁପଦା ଗ୍ରାମର ରଞ୍ଜନ ସେନାପତି (୫୦)ଙ୍କ ଆଜି ବଜ୍ରାଘାତରେ ମୃତ୍ୟୁ ହୋଇଛି । ରଞ୍ଜନ କଖାରୁ କିଆରିକୁ କାମ କରିବାକୁ ଯାଇଥିଲେ । ଅପରାହ୍ନ ସାଢେ ୩ଟା ବେଳେ ହଠାତ ବଜ୍ରପାତରେ ରଞ୍ଜନ ସେହି କିଆରୀରେ ଟଳି ପଡିଥିଲେ । ଖବର ପାଇ ସେଠାରୁ ଉଦ୍ଧାର କରି ତାଙ୍କୁ ବାଲିପାଟଣା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଆଣିଥିଲେ । ହେଲେ ଚିକିତ୍ସା ଦାୟିତ୍ୱ ରେ ଥିବା ଡାକ୍ତର ମୃତ ଘୋଷଣା କରିଥିଲେ । ବଜ୍ରାଘାତର ପ୍ରଭାବରେ ରଞ୍ଜନଙ୍କ କାନ ମୁଣ୍ଡାରୁ ରକ୍ତ ବାହାରି ଯାଇଛି । ୧୦୮ ଆମ୍ବୁଲାନ୍ସ ଯୋଗେ ବ୍ୟବଛେଦ ପାଇଁ କ୍ୟାପିଟାଲ ହସ୍ପିଟାକୁ ନିଆଯାଇଛି । ସେ ଜଣେ ଚାଷୀ । ପରିବାର କହିଲେ ପତ୍ନୀ ଓ ତାଙ୍କର ଏକମାତ୍ର ପୁଅ । ଚାଷରୁ ଯାହା ରୋଜଗାର ହୁଏ ସେଥିରେ ୩ ପ୍ରାଣୀ କୁଟୁମ୍ବ ଚଳନ୍ତି । ଉକ୍ତ ପରିବାରକୁ ସରକାରୀ କ୍ଷତି ପୂରଣ ଯୋଗାଇ ଦେବାକୁ ସାଧାରଣରେ ଦାବି ହେଉଛି ।
Sambad is now on WhatsApp
Join and get latest news updates delivered to you via WhatsApp
ସେହିପରି କୁରୁଞ୍ଜିପୁର ପଞ୍ଚାୟତ ବଦଳା ପଚିଶଖଣ୍ଡ ଗ୍ରାମର ହେମନ୍ତ ନାୟକଙ୍କ ନଡ଼ିଆ ଗଛରେ ବଜ୍ରପାତ ହୋଇଥିଲା। ଫଳରେ ଗଛ ଟି ୨ ଗଡ଼ ହୋଇ ଯାଇଥିଲା ଏବଂ ତାଙ୍କ ଗୁହାଳେ ଥିବା ଗୋଟିଏ ଦୁହାଁଳିଆ ଗାଇର ମଧ୍ୟ ମୃତ୍ୟୁ ହୋଇଛି । ଗାଈଟିର ମୂଲ୍ୟ ୪୦ହଜାର ଟଙ୍କାରୁ ଉର୍ଦ୍ଧ ହେବ ବୋଲି ଜଣାପଡିଛି । ବଜ୍ରପାତରେ କ୍ଷତିଗ୍ରସ୍ତ ଉଭୟ ପରିବାରକୁ ସରକାରୀ ସହାୟତା ଯୋଗାଇ ଦେବାକୁ ବିଭିନ୍ନ ମହଲରୁ ଦାବି ହେଉଛି ।ଅପରପକ୍ଷରେ ରାଜସ୍ୱ ନିରୀକ୍ଷକଙ୍କ ଦ୍ୱାରା ଆସନ୍ତା କାଲି କ୍ଷୟକ୍ଷତି ର ଆକଳନ ହେବ ବୋଲି ବାଲିପାଟଣା ତହସିଲଦାର ସୁନିତା ଜେନା ସୂଚନା ଦେଇଛନ୍ତି।