ସେଲ୍ଫି ନେବା ପାଇଁ ନଓ୍ଵାଜୁଦ୍ଦିନ୍ ସିଦ୍ଦିକିଙ୍କୁ ପଛରୁ ଟାଣି ଧରିଲେ ଯୁବକ, ତା’ ପରେ…..
କାନ୍ପୁର : ବଲିଉଡ୍ ଅଭିନେତା ନଓ୍ଵାଜୁଦ୍ଦିନ୍ ସିଦ୍ଦିକୀ ନିଜର ଅଭିନୟ ପାଇଁ ଦର୍ଶକଙ୍କ ମନରେ ଏକ ସ୍ୱତନ୍ତ୍ର ସ୍ଥାନ ତିଆରି କରିଛନ୍ତି । ଖୁବ୍ କମ ଦିନ ମଧ୍ୟରେ ସେ ଦର୍ଶକଙ୍କ ମନରେ ନିଜ ପାଇଁ ସ୍ଥାନ ତିଆରି କରିଥିବା ବେଳେ ଫିଲ୍ମର ଚରିତ୍ର ମଧ୍ୟ ଖୁବ୍ ଭାବି ଚିନ୍ତି ଚୟନ କରିଥାନ୍ତି । ଆଗକୁ ତାଙ୍କର ଆଉ ଏକ ଫିଲ୍ମ ଫଟୋଗ୍ରାଫ୍ ରିଲିଜ୍ ହେବାକୁ ଥିବା ବେଳେ ଏହାର ପ୍ରମୋସନକୁ ନେଇ ବ୍ୟସ୍ତ ଅଛନ୍ତି ନଓ୍ଵାଜୁଦ୍ଦିନ୍ । ଏହା ସହ ନଓ୍ଵାଜୁଦ୍ଦିନ୍ ଏବେ କାନପୁରରେ ନିଜ ଅନ୍ୟ ଏକ ଫିଲ୍ମ ରାତ୍ ଅକେଲିର ସୁଟିଂରେ ମଧ୍ୟ ବ୍ୟସ୍ତ ଥିବା ଜଣା ପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଫିଲ୍ମର ସୁଟିଂ ସାରି ନଓ୍ଵାଜୁଦ୍ଦିନ୍ ନିଜ କାର୍ ପାଖକୁ ଆସୁଥିବା ବେଳେ ତାଙ୍କ ପ୍ରଶଂସକମାନେ ତାଙ୍କୁ ଘେରି ଯାଇଥିଲେ । ତାଙ୍କ ସହ ସେଲ୍ଫି ନେବା ପାଇଁ ଚେଷ୍ଟା କରୁଥିବା ବେଳେ ଜଣେ ଯୁବକ ତାଙ୍କୁ ପଛ ପଟୁ ଟାଣି ପଛକୁ ନେଇ ଆସିଥିଲେ । ଯାହା ପରେ ନଓ୍ଵାଜୁଦ୍ଦିନ୍ଙ୍କ ସୁରକ୍ଷାକର୍ମୀ ଯୁବକଙ୍କୁ ଠେଲି ଦେବା ସହ ନଓ୍ଵାଜୁଦ୍ଦିନ୍ଙ୍କୁ ଗାଡ଼ିରେ ଆଣି ବସାଇଥିଲେ । ଏହି ସମୟର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । କେବଳ ନଓ୍ଵାଜୁଦ୍ଦିନ୍ ନୁହନ୍ତି, ଏହା ପୂର୍ବରୁ ଅନେକ କଳାକାରଙ୍କ ସହ ଏଭଳି ଘଟି ସାରିଛି ।