ନୂଆଦିଲ୍ଲୀ : ଭାରତର ଦକ୍ଷିଣରେ ଥିବା ମନ୍ନାର ଉପସାଗରରେ କେନ୍ଦ୍ରୀଭୂତ ହୋଇଥିବା ସାମୁଦ୍ରିକ ବାତ୍ୟା ବୁରେଭି ଆଉ କିଛି ଘଣ୍ଟା ପରେ ସ୍ଥଳଭାଗ ଛୁଇଁବାର ସମ୍ଭାବନା ରହିଛି । ଏହା ଗତ କିଛି ଘଣ୍ଟା ଧରି ଘଣ୍ଟାକୁ ୧୬ କିଲୋମିଟର ବେଗରେ ଗତି କରୁଛି ।
Sambad is now on WhatsApp
Join and get latest news updates delivered to you via WhatsApp
ଭାରତୀୟ ପାଣିପାଗ ବିଭାଗର ସୂଚନା ଅନୁସାରେ ଏହି ବାତ୍ୟା ଆଜି ରାତି କିମ୍ବା ଆସନ୍ତା କାଲି ସକାଳ ସୁଦ୍ଧା ତାମିଲନାଡ଼ୁର ପମ୍ବନ ଓ କନ୍ୟାକୁମାରୀ ମଧ୍ୟରେ ସ୍ଥଳଭାଗ ଛୁଇଁବ । ସ୍ଥଳଭାଗ ଛୁଇଁବା ସମୟରେ ପବନର ବେଗ ଘଣ୍ଟାପ୍ରତି ୭୦ରୁ ୮୦ କିଲୋମିଟର ପର୍ଯ୍ୟନ୍ତ ବୃଦ୍ଧି ପାଇବ ଓ ସ୍ଥଳବିଶେଷରେ ପବନର ବେଗ ଘଣ୍ଟାପ୍ରତି ୯୦ କିଲୋମିଟରକୁ ବୃଦ୍ଧି ପାଇବ । ଏହାର ପ୍ରଭାବରେ ତାମିଲନାଡ଼ୁର ସମସ୍ତ ଜିଲ୍ଲା, କେରଳ ଓ ଶ୍ରୀଲଙ୍କାରେ ପ୍ରବଳ ବର୍ଷା ଜାରି ରହିଛି । କେତେକ ସ୍ଥାନରେ ପବନର ବେଗ ବୃଦ୍ଧି ପାଇଛି । ବିଶେଷକରି ଦକ୍ଷିଣ ତାମିଲନାଡ଼ୁ ଓ ଦକ୍ଷିଣ କେରଳ ପାଇଁ ପାଣିପାଗ ବିଭାଗ ପକ୍ଷରୁ ରେଡ ଆଲର୍ଟ ଜାରି କରାଯାଇଛି ଓ ମତ୍ସ୍ୟଜୀବୀମାନଙ୍କୁ ସମୁଦ୍ର ମଧ୍ୟକୁ ନଯିବାକୁ ପରାମର୍ଶ ଦିଆଯାଇଛି ।
ଅନ୍ୟ ପକ୍ଷରେ ଆଜି ଅଶାନ୍ତ ସମୁଦ୍ର ମଧ୍ୟରେ ଫସିରହିଥିବା ୩ ଜଣ ମତ୍ସ୍ୟଜୀବୀଙ୍କୁ ଭାରତୀୟ ତଟରକ୍ଷୀ ବାହିନୀ ପକ୍ଷରୁ ଉଦ୍ଧାର କରାଯାଇଛି । ତାମିଲନାଡ଼ୁ ଉପକୂଳରେ ଥିବା ମନାଲି ଟିଭୁ ଦ୍ବୀପରେ ଏହି ମତ୍ସ୍ୟଜୀବୀମାନେ ଫସିରହିଥିଲେ । ସେମାନଙ୍କୁ ଉଦ୍ଧାର କରିବାକୁ ରାମନାଥପୁରମ ଜିଲ୍ଲାପାଳ କୋଷ୍ଟ ଗାର୍ଡକୁ ଅନୁରୋଧ କରିବା ପରେ ଏହି ଉଦ୍ଧାରକାର୍ଯ୍ୟ କରାଯାଇଥିଲା ।