ନିର୍ବାଚନ ଲଢ଼ିବାକୁ ଅମଙ୍ଗ ହେଉଛନ୍ତି କଂଗ୍ରେସର ବଡ ବଡ ନେତା
ନୂଆଦିଲ୍ଲୀ: ଆସନ୍ତା ଲୋକସଭା ନିର୍ବାଚନ ପାଇଁ ଏବେ ସବୁ ଦଳ ଜୋରସୋରରେ ପ୍ରସ୍ତୁତି ଚଳାଇଛନ୍ତି | ବିଜେପି ପ୍ରଥମ ପ୍ରାର୍ଥୀ ତାଲିକା ଜାରି କରିଥିବାବେଳେ ଏବେ କଂଗ୍ରେସର ପ୍ରଥମ ପ୍ରାର୍ଥୀ ତାଲିକାକୁ ସମସ୍ତେ ଅପେକ୍ଷା କରିଛନ୍ତି | ଗାନ୍ଧୀ ପରିବାରରୁ କିଏ କେଉଁଠାରେ ପ୍ରତିନିଧିତ୍ୱ କରିବେ ଜାଣିବା ପାଇଁ ଲୋକଙ୍କ ଉତ୍ସାହ ବଢ଼ି ବଢ଼ି ଯାଇଥିଲେ ବି ଏଯାଏ କିଛି ଜଣାପଡ଼ିନାହିଁ। ତେବେ ବର୍ତ୍ତମାନ ମିଳିଥିବା ସୂଚନା ମୁତାବକ କଂଗ୍ରେସର ବଡ ବଡ ନେତାମାନେ ନିର୍ବାଚନ ଲଢ଼ିବାକୁ ଚାଁହୁନାହାନ୍ତି | ବାସ୍ତବରେ କଂଗ୍ରେସ ପାର୍ଟି ଚାହୁଁଛି ଯେ ଏହାର ବଡ ନେତାମାନେ ଲୋକସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରନ୍ତୁ, କିନ୍ତୁ ଅନେକ ରାଜ୍ୟରୁ ଏହାର ବଡ ଚେହେରା ନିର୍ବାଚନ କ୍ଷେତ୍ରଠାରୁ ଦୂରରେ ରହିଥିବାର ଦେଖାଯାଉଛି। ଏହି ତାଲିକାରେ ପ୍ରିୟଙ୍କା ଗାନ୍ଧୀଙ୍କ ଠାରୁ ଆରମ୍ଭ କରି ପିଏଲ୍ ପୁନିଆ ପର୍ଯ୍ୟନ୍ତ ସମସ୍ତେ ଅଛନ୍ତି। ଏହି ବଡ ବଡ ନେତାମାନଙ୍କ ମଧ୍ୟରେ ପ୍ରିୟଙ୍କା ଗାନ୍ଧୀ, ମଲ୍ଲିକାର୍ଜୁନ ଖଡ଼ଗେ, ଅଶୋକ ଗେହଲୋଟ, ସଚିନ ପାଇଲଟ, ଦିଗବିଜୟ ସିଂହ, କମଲନାଥ, ଭୂପିନ୍ଦର ସିଂହ ହୁଡ୍ଡା, ରଣଦୀପ ସୁରଜୱାଲା ପ୍ରମୁଖ ଅଛନ୍ତି |
Sambad is now on WhatsApp
Join and get latest news updates delivered to you via WhatsApp
ଅନ୍ୟପକ୍ଷରେ କଂଗ୍ରେସର କିଛି ବଡ ଚେହେରା ମଧ୍ୟ ନିର୍ବାଚନ ଲଢେଇରେ ଦେଖିବାକୁ ମିଳିପାରନ୍ତି । ଯଦି ଆମେ ଛତିଶଗଡର ପୂର୍ବତନ ମୁଖ୍ୟମନ୍ତ୍ରୀ ଭୁପେଶ ବଘେଲଙ୍କ ବିଷୟରେ ଆଲୋଚନା କରିବା, ତେବେ ତାଙ୍କୁ ରାଜନନ୍ଦଗାଓଁ ଆସନରୁ ପ୍ରାର୍ଥୀ କରାଯାଇପାରେ । ଏହା ବ୍ୟତୀତ ପଶ୍ଚିମବଙ୍ଗ ରାଜ୍ୟ କଂଗ୍ରେସ ସଭାପତି ଅଧୀର ରଂଜନ ଚୌଧୁରୀ, ଉତ୍ତରପ୍ରଦେଶ କଂଗ୍ରେସ ସଭାପତି ଅଜୟ ରାୟ ଏବଂ ଦିଲ୍ଲୀ କଂଗ୍ରେସ ସଭାପତି ଅରବିନ୍ଦର ସିଂ ଲଭଲି ମଧ୍ୟ ପ୍ରତିଦ୍ୱନ୍ଦ୍ୱିତା କରିପାରନ୍ତି । ଅନ୍ୟପକ୍ଷରେ କର୍ଣ୍ଣାଟକ ଏବଂ ତେଲେଙ୍ଗାନାରେ କଂଗ୍ରେସ ସରକାର ଗଠନ ପରେ ଅଧିକାଂଶ ବଡ ନେତା କ୍ୟାବିନେଟରେ ଅଛନ୍ତି ଏବଂ ସେମାନେ ଲୋକସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ଆଗ୍ରହୀ ନୁହଁନ୍ତି।