ଉଦୟପୁର: ସରକାରୀ ସ୍କୁଲରେ ଦଳିତ ଛାତ୍ରୀଙ୍କପ୍ରତି ଭେଦଭାବ । ଦଳିତ ଛାତ୍ରୀ ଡାଲି ପରଶିବାରୁ ଖାଇବା ଫିଙ୍ଗିଲେ ପିଲା । ଅଭିଯୁକ୍ତ ରୋଷେଇଆ ବିରୋଧରେ ମାମଲା ରୁଜୁ ।
Sambad is now on WhatsApp
Join and get latest news updates delivered to you via WhatsApp
ପୁଲିସର ସୂଚନାନୁସାରେ, ଶୁକ୍ରବାର ଦିନ ଗୋଗୁଣ୍ଡାର ଭାରୋଡି ଗ୍ରାମରେ ଥିବା ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟର ଛାତ୍ରୀ ଡିମ୍ପଲ୍ ମେଘୱାଲ (୧୩) ଏବଂ ନୀମା ମେଘୱାଲ (୧୪) ବିଦ୍ୟାଳୟର ରୋଷେଇଆ ଲାଲୁରାମ ଗୁରୁଜାର(୫୫)ଙ୍କ ବିରୋଧରେ ଜାତିଆଣ ଭେଦଭାବ କରିଥିବା ଅଭିଯୋଗ କରିଛନ୍ତି । ଅଭିଯୁକ୍ତ ରୋଷେଇଆ ସେଠାରେ ବହୁ ବର୍ଷ ଧରି କାମ କରୁଥିଲା । ମଧ୍ୟାନ ଭୋଜନ ସମୟର ସେ ନିଜେ ବାହାର କରି ରଖୁଥିବା ପିଲାଙ୍କୁ ଖାଦ୍ୟ ପରଶିବାକୁ କହୁଥିଲା । କିନ୍ତୁ ଶୁକ୍ରବାର ଦିନ ସେହି ଦୁଇ ଝିଅଙ୍କୁ ଡାଲି ପରଶିବା ଦେଖି ରାଗିଯାଇ ତାଙ୍କୁ ଦୁର୍ବ୍ୟବହାର କରିବାସହ ସେମାନେ ଛୋଟ ଜାତିର ଅଟନ୍ତି, ସେମାନେ ଛୁଇଁଥିବା ଖାଦ୍ୟ ଅନ୍ୟମାନେ କାହିଁକି ଖାଇବେ, ଏହାକୁ ଫୋପାଡି ଦିଅ ବୋଲି ଅନ୍ୟ ପିଲାଙ୍କୁ କହିଥିଲା । ଲାଲୁରାମ ଏପରି କହିବା ପରେ ପିଲାମାନେ ଖାଦ୍ୟ ଫିଙ୍ଗିଦେଇଥିଲେ ।
ଏହି ବିଷୟରେ ମେଘୱାଲ ବସ୍ତିର ଲୋକମାନେ ଜାଣିବା ପରେ ବିଦ୍ୟାଳୟରେ ପହଞ୍ଚିଥିଲେ । ରୋଷେଇୟାର ଏପରି ଆଚରଣ ବିଷୟରେ ଶିକ୍ଷକମାନଙ୍କ ନିକଟରେ ଅଭିଯୋଗ କରିଥିଲେ । କର୍ମଚାରୀମାନେ ରୋଷେଇଆଙ୍କ ବ୍ୟବହାରକୁ ଭୁଲ ବୋଲି କହିଥିଲେ ଏବଂ ନିଶ୍ଚିତ କରିଥିଲେ ଯେ ସ୍କୁଲ କେବେ ଭେଦଭାବକୁ ଅନୁମତି ଦେବ ନାହିଁ । ସମସ୍ତ ଜାତିର ପିଲା ସ୍କୁଲରେ ପାଠପଢ଼ନ୍ତି ଓ ସମସ୍ତେ ସମାନ । ଏସବୁ ବିଷୟରେ ବିଦ୍ୟାଳୟର ପ୍ରଧାନଶିକ୍ଷକ ତଥା ମଧ୍ୟାହ୍ନ ଭୋଜନ ଦାୟିତ୍ୱରେ ଥିବା ଶିବଲାଲ ଶର୍ମା କହିଛନ୍ତି ଯେ ଅଟାରେ ବେଙ୍ଗ ପଡ଼ିବା କାରଣରୁ ଖାଦ୍ୟ ଫିଙ୍ଗି ଦିଆଯାଇଥିଲା । ବିଦ୍ୟାଳୟରେ ଏକ ଆନ୍ତରିକ ପରିବେଶ ଅଛି । ସମସ୍ତ ପିଲା ଗୋଟିଏ ସ୍ଥାନରେ ପାଣି ପିଅନ୍ତି । ଆମେ କେବେ ସ୍କୁଲର ପରିବେଶ ନଷ୍ଟ ହେବାକୁ ଦେବୁ ନାହିଁ ।