ଆମେରିକାର ଚେତାବନୀ ସତ୍ତ୍ବେ ରୁଷରୁ ବିପୁଳ ପରିମାଣରେ ତେଲ କିଣିବ ଭାରତ
ଇଣ୍ଡିଆନ ଅଏଲ ପରେ ଅନ୍ୟ ରାଷ୍ଟ୍ରାୟତ୍ତ ତେଲ କମ୍ପାନିମାନେ ବି ରୁଷରୁ କିଣିବେ ତେଲ
Sambad is now on WhatsApp
Join and get latest news updates delivered to you via WhatsApp
ନୂଆଦିଲ୍ଲୀ : ଆମେରିକା ପକ୍ଷରୁ ରୁଷ ତେଲ ଉପରେ କଟକଣା ଲଗାଯାଇଥିବାବେଳେ ଭାରତ ରୁଷରୁ ବିପୁଳ ପରିମାଣରେ ଅଶୋଧିତ ତେଲ ରିହାତି ଦରରେ କିଣିବାକୁ ଯୋଜନା କରୁଛି । ଇତି ମଧ୍ୟରେ ଭାରତର ବୃହତ୍ତମ ତୈଳ ବିଶୋଧକ ଇଣ୍ଡିଆନ ଅଏଲ ପକ୍ଷରୁ ରୁଷରୁ ୩ ନିୟୁତ ବ୍ୟାରେଲ ତେଲ ଆମଦାନୀ କରିବାକୁ ଚୁକ୍ତି କରାଯାଇଛି ।
କେବଳ ଇଣ୍ଡିଆନ ଅଏଲ ନୁହେଁ, ଅନ୍ୟ ରାଷ୍ଟ୍ରାୟତ୍ତ ତୈଳ କମ୍ପାନି- ଭାରତ ପେଟ୍ରୋଲିୟମ, ହିନ୍ଦୁସ୍ତାନ ପେଟ୍ରୋଲିୟମ ଓ ଏମଆରପିଏଲ (ମାଙ୍ଗାଲୋର ରିଫାଇନରୀ ଏଣ୍ଡ ପେଟ୍ରୋକେମିକାଲ୍ସ ) ରୁଷରୁ ତେଲ କିଣିବାକୁ ଯୋଜନା କରୁଛନ୍ତି । କଟକଣା ଲାଗିବା ପରେ ରୁଷ ଭାରତକୁ ରିହାତି ଦରରେ ଅଶୋଧିତ ତେଲ ରପ୍ତାନି ପାଇଁ ପ୍ରସ୍ତାବ ଦେଇଛି । ବ୍ୟାରେଲ ପିଛା ୨୦ର ୨୫ ଡଲାରର ରିହାତି ପ୍ରଦାନ କରାଯାଉଛି । ପୁଣି ରୁଷର ତୈଳ ଜାହାଜଗୁଡ଼ିକ ଭାରତରେ ଏହି ତୈଳ ପହଞ୍ଚାଇଦେବେ । ଏଣୁ ଏହି ରିହାତି ତେଲକିଣି ଭାରତ ଅନ୍ତର୍ଜାତୀୟ ବଜାରରେ ମହଙ୍ଗା ହୋଇଚାଲିଥିବା ତେଲଦର ପ୍ରଭାବକୁ ସମ୍ମୁଖୀନ ହୋଇପାରିବ ।
ଏହି ତେଲ କ୍ରୟ ଯୋଗୁଁ ଭାରତ ଉପରେ ପାଶ୍ଚାତ୍ୟ ଦେଶ କୌଣସି କାର୍ଯ୍ୟାନୁଷ୍ଠାନ ଗ୍ରହଣ ନ କରିବାର ସମ୍ଭାବନା ରହିଛି । କାରଣ ରୁଷ ଉପରେ ଯେଉଁ କଟକଣା ଲଗାଯାଇଛି ସେଥିରେ ତେଲକୁ ଅନ୍ତର୍ଭୁକ୍ତ କରାଯାଇନାହିଁ । କେବଳ ଆମେରିକା ରୁଷରୁ ତେଲ କିଣିବା ବନ୍ଦ କରିଦେଇଛି । କିନ୍ତୁ ଅନ୍ୟମାନଙ୍କ ଉପରେ ଏହା ଲାଗୁ କରାଯାଇନାହିଁ । ଏହି କାରଣରୁ ଜର୍ମାନି ପ୍ରଭୃତି କେତେକ ୟୁରୋପୀୟ ଦେଶ ଏବେ ବି ରୁଷିଆରେ ତେଲ କିଣିବା ଅବ୍ୟାହତ ରଖିଛନ୍ତି ।