ନିୟନ୍ତ୍ରଣ ରେଖା ପାଖ ତୁଷାର ଭିତରୁ ମିଳିଲା ଆଠ ମାସ ହେବ ନିଖୋଜ ଥିବା ଯବାନଙ୍କ ମର ଶରୀର
ଡେରାଡୁନ୍: ଜାନୁଆରି ମାସରୁ ନିଖୋଜ ଥିବା ଭାରତୀୟ ସେନାର ଜଣେ ଯବାନଙ୍କ ମର ଶରୀର ଶନିବାର ଦିନ କଶ୍ମୀର ଅନ୍ତର୍ଗତ ନିୟନ୍ତ୍ରଣ ରେଖା ଅଞ୍ଚଳର ତୁଷାର ମଧ୍ୟରୁ ଉଦ୍ଧାର କରାଯାଇଛି। ସହିଦ ଯବାନ ହେଉଛନ୍ତି ୩୬ ବର୍ଷିୟ ହାବିଲ୍ଦାର୍ ରାଜେନ୍ଦ୍ର ସିଂହ ନେଗି। ବିଳମ୍ବିତ ରାତ୍ରୀରେ ଏ ସଂକ୍ରାନ୍ତରେ ନେଗିଙ୍କ ପରିବାରକୁ ସୂଚନା ଦିଆଯାଇଛି।
Sambad is now on WhatsApp
Join and get latest news updates delivered to you via WhatsApp
ଭାରତୀୟ ସେନାର ୧୧ ଘର୍ୱାଲ୍ ରାଇଫଲ୍ ସହ ସମ୍ପୃକ୍ତ ନେଗି ଏ ବର୍ଷ ଜାନୁଆରି ମାସରେ କଶ୍ମୀରର ଗୁଲମାର୍ଗ ଅଞ୍ଚଳ ନିୟନ୍ତ୍ରଣ ରେଖା ପାଖରେ ଡିୟୁଟି କରୁଥିବା ସମୟରେ ହଠାତ୍ ବହଳ ତୁଷାର ମଧ୍ୟକୁ ଖସଡ଼ି ଯାଇଥିଲେ।
ନେଗିଙ୍କ ମର ଶରୀର ଠାବ କରିବାରେ ବିଫଳ ହେବା କାରଣରୁ ଜୁନ୍ ମାସରେ ସେନା ତାଙ୍କୁ ‘ସହିଦ’ ଘୋଷଣା କରି ପତ୍ର ଦ୍ବାରା ଜୁନ୍ ୨୧ ତାରିଖ ଦିନ ତାଙ୍କ ପରିବାରକୁ ଅବଗତ କରାଇଥିଲେ। କିନ୍ତୁ, ସ୍ବଚକ୍ଷୁରେ ତାଙ୍କ ମର ଶରୀର ନ ଦେଖିବା ପର୍ଯ୍ୟନ୍ତ ତାଙ୍କୁ ସହିଦ ଭାବେ ସ୍ବୀକାର କରିବେ ନାହିଁ ବୋଲି ପତ୍ନୀ ରାଜେଶ୍ବରୀ ଦେବୀ କହିଥିଲେ।
ଶନିବାର ସ୍ବାଧୀନତା ଦିବସ ଦିନ ନେଗିଙ୍କ ସେନା ୟୁନିଟ୍ ତାଙ୍କ ପରିବାରକୁ ମର ଶରୀର ମିଳିଥିବା ସୂଚନା ଦେଇଥିଲେ। ସେନା ୟୁନିଟ୍ରୁ ଆସିଥିବା ଫୋନ୍ ଗ୍ରହଣ କରିଥିବା ନେଗିଙ୍କ ଦାଦି ରଘୁବୀର ସିଂହ ନେଗି କହନ୍ତି, ଶନିବାର ବିଳମ୍ବିତ ସନ୍ଧ୍ୟାରେ ତା’ ୟୁନିଟ୍ରୁ ବିୟୋଗାନ୍ତ ଖବର ସଂକ୍ରାନ୍ତ ଫୋନ୍ କଲ୍ ପାଇଲି। ସେମାନେ କହିଲେ ଯେ, ତଲାସ ଅଭିଯାନ ସମୟରେ ତୁଷାର ଗଦା ମଧ୍ୟରୁ ତା’ର ଶବ ମିଳିଥିଲା। ସେମାନେ ଆହୁରି ମଧ୍ୟ କହିଛନ୍ତି ଯେ, ତା’ ଶବ ଶ୍ରୀନଗରସ୍ଥିତ ମିଲିଟାରି ହସ୍ପିଟାଲ୍କୁ ନିଆଯାଇଛି। ଆବଶ୍ୟକ ଡାକ୍ତରୀ ପ୍ରକ୍ରିୟା ପରେ ସେମାନେ ଆମକୁ ଶବ ହସ୍ତାନ୍ତର କରିବେ।
ରବିବାର ସନ୍ଧ୍ୟାରେ ଶବ ଡେରାଡୁନ୍ରେ ପହଞ୍ଚିବ ବୋଲି ସେମାନେ ପ୍ରଥମେ କହିଥିଲେ, କିନ୍ତୁ ପରେ କହିଲେ ଦୁଇ ତିନି ଦିନ ସମୟ ଲାଗିପାରେ। କାରଣ ଦୀର୍ଘ ଦିନ ହେବ ଶବ ତୁଷାର ଭିତରେ ଥିବାରୁ ହଠାତ୍ ବାହାରକୁ ନେଲେ ନଷ୍ଟ ହୋଇଯିବାର ଆଶଙ୍କା ଅଛି। ତାହା ନ ହେବା ଲାଗି ଡାକ୍ତରମାନେ ଆବଶ୍ୟକ ପ୍ରକ୍ରିୟାକରଣ କରୁଛନ୍ତି।
ଡେରାଡୁନ୍ ଠାରୁ ୧୪୭ କିଲୋମିଟର୍ ଦୂର ଚାମୋଲି ଜିଲ୍ଲାବାସୀ ନେଗିଙ୍କର ବିଧବା ପତ୍ନୀ ଓ ତିନି ଜଣ ପିଲା ଅଛନ୍ତି।