ଭୁବନେଶ୍ବର : ଓଡ଼ିଶା ହୋମ୍ ଆଣ୍ଡ କମର୍ସିଆଲ ନିର୍ଦ୍ଦେଶକ ମନୋଜ କୁମାର ପଣ୍ଡାଙ୍କୁ କ୍ରାଇମ ବ୍ରାଞ୍ଚର ଅର୍ଥନୈତିକ ଶାଖା ଶନିବାର ସଂଧ୍ୟାରେ ଭୁବନେଶ୍ବରରୁ ଗିରଫ କରିଛି। ତାଙ୍କୁ ଏକ ଗୁପ୍ତ ସ୍ଥାନରେ ରଖି ଜେରା କରାଯାଉଛି। ତେବେ ଏ ନେଇ କ୍ରାଇମ ବ୍ରାଞ୍ଚ ପକ୍ଷରୁ ଗଣମାଧ୍ୟମକୁ କୌଣସି ବିଧିବଦ୍ଧ ସୂଚନା ଦିଆଯାଇନାହିଁ।
Sambad is now on WhatsApp
Join and get latest news updates delivered to you via WhatsApp
ପ୍ରକାଶ ଥାଉକି, ଗତକାଲି କ୍ରାଇମ୍ ବ୍ରାଞ୍ଚ ପକ୍ଷରୁ ମନୋଜଙ୍କ ବିରୋଧରେ ଲୁକ୍-ଆଉଟ୍ ନୋଟିସ୍ ଜାରି ହୋଇଥିଲା। ଯଦି କୌଣସି ବ୍ୟକ୍ତି ମନୋଜଙ୍କ ବିଷୟରେ ସୂଚନା ଦେବେ, କ୍ରାଇମବ୍ରାଞ୍ଚ ପକ୍ଷରୁ ତାଙ୍କୁ ପୁରସ୍କୃତ କରାଯିବ ବୋଲି କୁହାଯାଇଥିଲା। ଏହି ଖବର ଗଣମାଧ୍ୟମରେ ପ୍ରକାଶ ପାଇବା ପରେ ଆଜି ମନୋଜଙ୍କ ସମ୍ପର୍କରେ ଏକାଧିକ ତଥ୍ୟ କ୍ରାଇମ ବ୍ରାଞ୍ଚକୁ ମିଳିଥିଲା। ତଥ୍ୟକୁ ଆଧାର କରି ସଂଧ୍ୟାରେ ପୁଲିସ ରାଜଧାନୀ ବିଭିନ୍ନ ସ୍ଥାନରେ ଚଢ଼ଉ କରିଥିଲା। ଚଢ଼ଉ ବେଳେ ମନୋଜ ପୁଲିସ ହାତରେ ଲାଗିଥିବା ସୂଚନା ମିଳିଛି।
ମନୋଜ ଏସଓଏସ୍ ଭିଲେଜ ସମ୍ମୁଖ କଳିଙ୍ଗ ଷ୍ଟୁଡିଓ ନିକଟରେ ‘ଗଣପତି ହୋମ୍ସ’ ନାମକ ଏକ ପ୍ରୋଜେକ୍ଟ କରିଥିଲେ। ୨୦୧୮ ମସିହା ସୁଦ୍ଧା ଗ୍ରାହକମାନଙ୍କୁ ବିବାଦ ବିହୀନ ଫ୍ଲାଟ୍ ଯୋଗାଇ ଦିଆଯିବାକୁ ପ୍ରତିଶ୍ରୁତି ଦିଆଯାଇଥିଲା। ଟିସିଏସ୍ର କେତେକ କର୍ମଚାରୀ ଫ୍ଲାଟ୍ ନେବା ପାଇଁ ଓଡ଼ିଶା ହୋମ୍ ଆଣ୍ଡ କମର୍ସିଆଲର ନିର୍ଦ୍ଦେଶକ ମନୋଜଙ୍କୁ ୨୦କୋଟି ଟଙ୍କା ଦେଇଥିଲେ। କିନ୍ତୁ ଟିସିଏସ୍ କର୍ମଚାରୀଙ୍କୁ ଫ୍ଲାଟ୍ ଯୋଗାଇବା ବଦଳରେ ଦିନ ଗଡ଼ାଇ ଚାଲିଥିଲେ। ଓଲଟି ମନୋଜ ୭ଟି ଫ୍ଲାଟ୍ ଅନ୍ୟ ଗ୍ରାହକଙ୍କୁ ବିକ୍ରି କରି ଦେଇଥିଲେ। କେବଳ ଏହି ପ୍ରୋଜେକ୍ଟ କାହିଁକି, ତା’ର ଅନ୍ୟାନ୍ୟ ପ୍ରୋଜେକ୍ଟରେ ମଧ୍ୟ ଗ୍ରାହକମାନଙ୍କୁ ଠକିବା ଅଭିଯୋଗରେ ମନୋଜକୁ ପୂର୍ବରୁ ବିଭିନ୍ନ ଥାନା ପୁଲିସ ଗିରଫ କରିସାରିଛି।
ମନୋଜ ହେଉଛି ଓଡ଼ିଶା ହୋମ୍ ଆଣ୍ଡ କମରସିଆଲର ଅନ୍ୟତମ ନିର୍ଦ୍ଦେଶକ। ପୂର୍ବରୁ ଏହି ମାମଲାର ପରିଚାଳନା ନିର୍ଦ୍ଦେଶକ ଅରବିନ୍ଦ ସାନ୍ତ୍ରା ଗିରଫ ହୋଇ ଏବେ ଜେଲରେ। ଟିସଏସ୍ ପକ୍ଷରୁ ରଞ୍ଜନ କୁମାର ମହାପାତ୍ର କ୍ରାଇମ୍ ବ୍ରାଞ୍ଚରେ ଏ ନେଇ ଅଭିଯୋଗ କରିଥିଲେ।