ଚାଉଳ କିଣା ପ୍ରସଙ୍ଗରେ କେନ୍ଦ୍ରକୁ ବିଜେଡ଼ିର ଟାର୍ଗେଟ୍, କ’ଣ ହେବ ୨୨ ଲକ୍ଷ ଟନ ଚାଉଳର ଭାଗ୍ୟ ?
ଭୁବନେଶ୍ବର : ଚାଉଳ କିଣା ପ୍ରସଙ୍ଗରେ କେନ୍ଦ୍ର ସରକାରଙ୍କୁ ଟାର୍ଗେଟ କରିଛି ବିଜୁ ଜନତା ଦଳ । ଚାଷୀଙ୍କ ସ୍ବାର୍ଥରକ୍ଷା ପ୍ରସଙ୍ଗରେ ବିଜେପି ସବୁବେଳେ ଦୋମୁହାଁ ନୀତି ଗ୍ରହଣ କରୁଛି ବୋଲି ବିଜେଡି ପକ୍ଷରୁ ଅଭିଯୋଗ କରାଯାଇଛି ।
Sambad is now on WhatsApp
Join and get latest news updates delivered to you via WhatsApp
ଆଜି ଏକ ସାମ୍ବାଦିକ ସମ୍ମିଳନୀରେ ବିଜେଡ଼ି ମୁଖପାତ୍ର ଶ୍ରୀମୟୀ ମିଶ୍ର କହିଛନ୍ତି ଯେ କେନ୍ଦ୍ର ସରକାର ଚାଷୀମାନଙ୍କ ପ୍ରତି ବୈମାତ୍ରୁକ ମନୋଭାବ ପୋଷଣ କରୁଛନ୍ତି । ଚାଷୀମାନଙ୍କ ଜୀବନ ଜୀବିକା ସହ ଖେଳୁଛନ୍ତି । ଏଥିପାଇଁ କିଛି ଚାଷୀ ଆତ୍ମହତ୍ୟା କରିବାପରି ପଦକ୍ଷେପ ନେଉଛନ୍ତି । ୨୦୨୦-୨୧ ଖରିଫ ଋତୁରେ ଓଡ଼ିଶାରେ ୫୨ ଲକ୍ଷ ମେଟ୍ରିକ ଟନ ଚାଉଳ ଉତ୍ପାଦନ କରାଯାଇଥିଲା । ତାମଧ୍ୟରୁ ୩୦ ଲକ୍ଷ ମେଟ୍ରିକ ଟନ ଚାଉଳ ରାଜ୍ୟରେ ବ୍ୟବହାର ପାଇଁ ରାଜ୍ୟ ସରକାର ରଖିଛନ୍ତି । ଅର୍ଥାତ ଆମ ପାଖରେ ୨୨ ଲକ୍ଷ ମେଟ୍ରିକ ଟନ ଚାଉଳ ଗଚ୍ଛିତ ରହିଛି ଓ ନିୟମ ଅନୁସାରେ କେନ୍ଦ୍ର ସରକାର ଏଫସିଆଇ ମାଧ୍ୟମରେ ଏହାକୁ ଖରିଦ କରିବା କଥା । ଏହା ମଧ୍ୟରୁ ୨ ଲକ୍ଷ ଟନ ଅରୁଆ ଚାଉଳ ଓ ୫ ଲକ୍ଷଟନ ଭିଟାମିନଯୁକ୍ତ ଉଷୁନା ଚାଉଳ କିଣିବାକୁ କେନ୍ଦ୍ର ପ୍ରତିଶ୍ରୁତି ଦେଇଥିଲା । ବଳକା ୧୫ ଲକ୍ଷ ଟନ ଚାଉଳର ଭାଗ୍ୟ କଣ ହେବ ତାହା ମଧ୍ୟ ଆମେ ଜାଣିପାରୁ ନାହୁଁ ବୋଲି ସେ କହିଛନ୍ତି ।
ସେହିପରି ବିଜେଡ଼ିର ମୁଖପାତ୍ର ସୁଲତା ଦେଓ କହିଛନ୍ତି ଯେ ଚାଷୀଙ୍କ ପାଇଁ ବିଜେପି ସବୁବେଳେ କୁମ୍ଭୀର କାନ୍ଦଣା କାନ୍ଦୁଛି । କେବଳ ନିର୍ବାଚନ ଆସିଲେ ଚାଷୀଙ୍କ ପାଇଁ ବିଜେପି କୁମ୍ଭୀର କାନ୍ଦଣା କାନ୍ଦୁଛି, କିନ୍ତୁ ନିର୍ବାଚନ ଯିବା ପରେ ଚାଷୀମାନଙ୍କୁ ଭୁଲି ଯାଉଛି ।