ପୁରୁଷ ହକି ପ୍ରୋଲିଗ୍: ଅଷ୍ଟ୍ରେଲିଆ ଓ ନେଦରଲାଣ୍ଡ୍ସର ଚମତ୍କାର ବିଜୟ
ରାଉରକେଲା: ପୁରୁଷ ହକି ପ୍ରୋଲିଗ୍ରେ ଗୁରୁବାର ବିର୍ସା ମୁଣ୍ଡା ଷ୍ଟାଡିୟମରେ ଦୁଇଟି ମ୍ୟାଚ୍ ଖେଳାଯାଇଛି। ଏଥିରେ ଅଷ୍ଟ୍ରେଲିଆ ଓ ନେଦରଲାଣ୍ଡ୍ସ ବିଜୟୀ ହୋଇଛନ୍ତି। ଅଷ୍ଟ୍ରେଲିଆ ଓ ଆୟର୍ଲାଣ୍ଡ୍ ମ୍ୟାଚ୍ ସଂପୂର୍ଣ୍ଣ ଏକତରଫା ହୋଇଥିଲା। ଏଥିରେ ଅଷ୍ଟ୍ରେଲିଆ ୪-୧ ଗୋଲରେ ବିଜୟୀ ହୋଇଛି। ଅଷ୍ଟ୍ରେଲିଆ ପକ୍ଷରୁ ବ୍ଲାକ୍ ଗୋଭର୍ସ ଦୁଇଟି(୩୩ ଓ ୫୨) ଗୋଲ୍ ଦେଇଥିବାବେଳେ ନାଥନ ଏଫ୍ରମ୍ସ(୪୦) ଓ ଜ୍ୟାକ୍ ୱେଲଚ୍(୫୬) ଗୋଟିଏ ଲେଖାଏ ଗୋଲ୍ ଦେଇଥିଲେ। ଆୟର୍ଲାଣ୍ଡ୍ ପକ୍ଷରୁ ସେନ୍ ଓଡ୍ହ୍ୟୁ(୪୪) ଏକମାତ୍ର ଗୋଲ୍ଦେଇ ବ୍ୟବଧାନ ହ୍ରାସ କରିଥିଲେ।
Sambad is now on WhatsApp
Join and get latest news updates delivered to you via WhatsApp
ତେବେ ନେଦରଲାଣ୍ଡ୍ସ ଓ ସ୍ପେନ ମଧ୍ୟରେ ଖେଳାଯାଇଥିବା ଦ୍ବିତୀୟ ମ୍ୟାଚ୍ ବେଶ୍ ଉତ୍କଣ୍ଠାପୂର୍ଣ୍ଣ ହୋଇଥିଲା। ମ୍ୟାଚ୍ର ଦ୍ବିତୀୟ ମିନିଟ୍ରେ ସ୍ପେନ ପ୍ରଥମ ଗୋଲ୍ ଦେଇ ୧-୦ ଗୋଲ୍ରେ ଆଗୁଆ ହୋଇଥିଲା। ଏହାପରେ କିନ୍ତୁ ପଛରେ ପଡ଼ିଯାଇଥିବା ନେଦରଲାଣ୍ଡ୍ ଆକ୍ରମଣକୁ ବ୍ୟାପକ କରି ଗୋଟିଏପରେ ଗୋଟିଏ ଗୋଲ୍ (୧୧,୨୨,୩୧,୩୪) ଦେଇ ସ୍କୋର୍ ୪-୧କୁ ନେଇଥିଲା। ମ୍ୟାଚ୍ ପ୍ରାୟ ଏକତରଫା ହେଉଥିବାବେଳେ ସ୍ପେନ୍ କିନ୍ତୁ ଚମତ୍କାର ପ୍ରତ୍ୟାବର୍ତ୍ତନକରି ଲାଗ୍ ଲାଗ୍ ଦୁଇଟି ଗୋଲ୍(୫୧ ଓ ୫୪) ଦେଇଥିଲା। ଶେଷ ମୂହୁର୍ତ୍ତରେ ସ୍ପେନ ସୁଯୋଗ ପାଇଥିଲେ ମଧ୍ୟ ଗୋଲ୍ କରିବାରେ ସଫଳ ନ ହେବାରୁ ୩-୪ ଗୋଲରେ ପରାସ୍ତ ହୋଇଛି।