ଜାତୀୟ ରାଜପଥ ୫୫ରେ ରାତି ଅଧରେ ଦୁର୍ଘଟଣା ବାଇକ୍କୁ ଧକ୍କା ଦେଲା ଟ୍ରକ୍, ଯୁବକ ମୃତ
ଉତ୍ତ୍ୟକ୍ତ ଲୋକେ ଟ୍ରକ୍ ଜାଳିଦେଲେ
ଅନୁଗୁଳ: ଅନୁଗୁଳ ଟାଉନ୍ ଥାନା ଟାଉନ୍ ଉଚ୍ଚବିଦ୍ୟାଳୟ ସମ୍ମୁଖରେ ଜାତୀୟ ରାଜପଥ ୫୫ରେ ସୋମବାର ବିଳମ୍ବିତ ରାତିରେ ପୁଣି ଏକ ଦୁର୍ଘଟଣା ଘଟିଛି। ରାତି ପ୍ରାୟ ୧୧ଟା ୩୦ ସମୟରେ ଏକ ଟ୍ରକ୍ ବାଇକ୍କୁ ଧକ୍କା ଦେବାରୁ ଜଣେ ଯୁବକଙ୍କ ମୃତ୍ୟୁ ହୋଇଯାଇଛି। ମୃତ ଯୁବକ ହେଲେ ସହର ଉପକଣ୍ଠ ବଣିଆବାହାଳ ଅଞ୍ଚଳର ତାପସ ନନ୍ଦ (୨୫)। ଏହି ଘଟଣା ପରେ ସ୍ଥାନୀୟ ଲୋକ ଦୁର୍ଘଟଣା ଘଟାଇଥିବା ଟ୍ରକ୍ରେ ନିଆଁ ଲଗାଇ ଦେଇଥିଲେ।
ତାପସ କୌଣସି କାମରେ ଅନୁଗୁଳ ଆସି ଘରକୁ ଫେରୁଥିବା ବେଳେ ଏହି ଦୁର୍ଘଟଣା ଘଟିଛି। ଟ୍ରକ୍ଟି କଟକ ପଟରୁ ସମ୍ବଲପୁର ଦିଗରେ ଯାଉଥିବା ବେଳେ ତାପସ ମଧ୍ୟ ସମାନ ଦିଗରେ ତାଙ୍କ ଗାଁକୁ ଯାଉଥିଲେ। ଟାଉନ୍ ଉଚ୍ଚବିଦ୍ୟାଳୟ ସମ୍ମୁଖରେ ଟ୍ରକ୍ଟି ତାଙ୍କୁ ଧକ୍କା ଦେଇଥିଲା। ତାପସ ତଳେ ପଡ଼ିଯିବା ପରେ ଟ୍ରକ୍ଟି ତାଙ୍କ ଉପରେ ଚଢ଼ିଯାଇଥିଲା। ଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଯାଇଥିଲା।
Sambad is now on WhatsApp
Join and get latest news updates delivered to you via WhatsApp
ଖବରପାଇ ତାପସଙ୍କ ଗାଁଲୋକମାନେ ଘଟଣାସ୍ଥଳରେ ପହଞ୍ଚିଥିଲେ। ଏହାକୁ ନେଇ ସେଠାରେ ଉତ୍ତେଜନାପ୍ରକାଶ ପାଇଥିଲା। ଉତ୍ତ୍ୟକ୍ତ ଲୋକମାନେ ଟ୍ରକ୍ରେ ନିଆଁ ଲଗାଇ ଦେଇଥିଲେ। ଟାଉନ୍ ଥାନା ପୁଲିସ ପହଞ୍ଚି ଲୋକଙ୍କୁ ବୁଝାସଝା କରିଥିଲେ। ତେବେ ସହର ମଧ୍ୟ ଦେଇ ଯାଇଥିବା ଏହି ଜାତୀୟ ରାଜପଥରେ ଗୋଟିଏ ପରେ ଗୋଟିଏ ମୁଣ୍ଡ ଗଡ଼ିବା ଘଟଣାକୁ ନେଇ ପ୍ରବଳ ଅସନ୍ତୋଷ ପ୍ରକାଶ ପାଇଛି। ରାତିରେ କଟକଣା ହଟିବା ପରେ ଏହି ଦୁର୍ଘଟଣା ଘଟିଛି। ଏପଟେ ରାସ୍ତାର ଶୋଚନୀୟ ଅବସ୍ଥାରେ ସୁଧାର ଆସୁନି, ସେପଟେ ଟ୍ରକ୍ ଚାଳକମାନେ ବେପରୁଆ ଗାଡ଼ି ଚଳାଉଥିବା ବେଳେ ଏପରି ଦୁର୍ଘଟଣା ବାରମ୍ବାର ଘଟୁଛି ବୋଲି ଲୋକେ କହିଛନ୍ତି। ରିପୋର୍ଟ ଲେଖାହେବା ପର୍ଯ୍ୟନ୍ତ ରାସ୍ତାରୋକ ଓ ଉତ୍ତେଜନା ଜାରି ରହିଥିଲା।