ସମ୍ବାଦ କର୍ପୋରେଟ୍ ଏକ୍ସଲେନ୍ସ ଆୱାର୍ଡସ୍ -୨୪ ସମାରୋହ ଆଜି
ଭୁବନେଶ୍ବର: ‘ବ୍ରାଣ୍ଡ୍ସ ଅଫ୍ ଓଡ଼ିଶା ପ୍ରାଇଡ୍ ଅଫ୍ ଇଣ୍ଡିଆ’ ସମ୍ବାଦ କର୍ପୋରେଟ୍ ଏକ୍ସଲେନ୍ସ ଆୱାର୍ଡସ୍ ୨୦୨୪ର ପୁରସ୍କାର ବିତରଣ ସମାରୋହ ଆସନ୍ତାକାଲି (ବୁଧବାର) ଭୁବନେଶ୍ବରରେ ଅନୁଷ୍ଠିତ ହେବ। ରାଜ୍ୟ ଗ୍ରାମୀଣ ବିକାଶ, ଦକ୍ଷତା ବିକାଶ ଓ ବୈଷୟିକ ଶିକ୍ଷା ମନ୍ତ୍ରୀ ପ୍ରୀତିରଞ୍ଜନ ଘଡ଼ାଇ ମୁଖ୍ୟ ଅତିଥି ଏବଂ ଆଦିତ୍ୟ ବିର୍ଲା ଗ୍ରୁପ୍ର ପୂର୍ବତନ ନିର୍ଦ୍ଦେଶକ (ଗ୍ରୁପ୍ ମାନବ ସମ୍ବଳ) ସଂତୃପ୍ତ ମିଶ୍ର ସମ୍ମାନିତ ଅତିଥି ଭାବେ ଯୋଗ ଦେବାର କାର୍ଯ୍ୟକ୍ରମ ରହିଛି। ‘ସମ୍ବାଦ’ର ସମ୍ପାଦକ ତନୟା ପଟ୍ଟନାୟକ ଓ ପରିଚାଳନା ନିର୍ଦ୍ଦେଶିକା ମୋନିକା ନୈୟର ପଟ୍ଟନାୟକ ମଧ୍ୟ ଉପସ୍ଥିତ ରହିବେ। ଚଳିତ ବର୍ଷ ସମ୍ବାଦ କର୍ପୋରେଟ୍ ଏକ୍ସଲେନ୍ସ ଆୱାର୍ଡସ୍ର ସପ୍ତମ ସଂସ୍କରଣ ଆୟୋଜନ କରାଯାଉଛି।
Sambad is now on WhatsApp
Join and get latest news updates delivered to you via WhatsApp
କର୍ପୋରେଟ୍ ସାମାଜିକ ଦାୟିତ୍ବବୋଧ (ସିଏସ୍ଆର୍), ବୃହତ (ଲାର୍ଜ), ମଧ୍ୟମ (ମିଡିଅମ୍), କ୍ଷୁଦ୍ର (ସ୍ମଲ୍) ଓ ଇମର୍ଜିଂ/ ଷ୍ଟାର୍ଟଅପ୍ ଭଳି ପାଞ୍ଚଟି ବର୍ଗରେ ବିଜେତାମାନଙ୍କୁ ପ୍ଲାଟିନମ୍, ଗୋଲ୍ଡ ଓ ସିଲ୍ଭର୍ ପୁରସ୍କାର ପ୍ରଦାନ କରାଯିବ। ଓଡ଼ିଶାରୁ ସୃଷ୍ଟି ହୋଇ ନିଜ କାରବାରକୁ ଦେଶବିଦେଶରେ ବ୍ୟାପକ କରିବା ସହ ରାଜ୍ୟ ପାଇଁ ଗୌରବ ଆଣିଥିବା ବ୍ରାଣ୍ଡ୍ଗୁଡ଼ିକୁ ଏକ ପ୍ରତିଷ୍ଠିତ ମଞ୍ଚରେ ପୁରସ୍କୃତ ଓ ସମ୍ମାନିତ କରିବା ଲକ୍ଷ୍ୟ ନେଇ ‘ସମ୍ବାଦ’ ପକ୍ଷରୁ ଏହି ପୁରସ୍କାର ପ୍ରତିଷ୍ଠା କରାଯାଇଛି। ଚଳିତ ସଂସ୍କରଣରେ ପୁରସ୍କାର ଲାଗି ବ୍ରାଣ୍ଡ୍ ଓ କମ୍ପାନିଗୁଡ଼ିକ ମଧ୍ୟରେ ବିପୁଳ ଉତ୍ସାହ ଦେଖିବାକୁ ମିଳିଥିଲା। ବହୁ ସଂଖ୍ୟାରେ ସଂସ୍ଥା ସେଥିପାଇଁ ଆବେଦନ କରିଥିଲେ। ଆବେଦନଗୁଡ଼ିକୁ ଏକ ସ୍ବାଧୀନ ବିଚାରକ ମଣ୍ଡଳୀ ଅନୁଧ୍ୟାନ ଓ ଅନୁଶୀଳନ କରିବା ପରେ ବିଜେତାମାନଙ୍କୁ ଚୟନ କରିଛନ୍ତି।