ଇକୋ ଟୁରିଜିମ୍ ପାଇଁ ୩୦ କୋଟି
ଭୁବନେଶ୍ବର : ରାଜ୍ୟରେ ପ୍ରକୃତି ପର୍ଯ୍ୟଟନ(ଇକୋ ଟୁରିଜିମ) ଉଲ୍ଲେଖନୀୟ ସଫଳତା ହାସଲ କରିଛି। କୋଭିଡ ମହାମାରୀ ପ୍ରଭାବିତ ଆର୍ଥିକ ମାନ୍ଦାବସ୍ଥା ସତ୍ତ୍ବେ ଦୁଇବର୍ଷରେ ଇକୋ-କେନ୍ଦ୍ରରେ ପର୍ଯ୍ୟଟକଙ୍କ ସଂଖାରେ ୯୬ପ୍ରତିଶତ ଓ ରାଜସ୍ବ ସଂଗ୍ରହରେ ୪୬ ପ୍ରତିଶତ ବୃଦ୍ଧି ଦେଖିବାକୁ ମିଳିଛି। ତେଣୁ ନୂଆ ପ୍ରକୃତି ପର୍ଯ୍ୟଟନ କେନ୍ଦ୍ରର ବିକାଶ, ବିକାଶ ହୋଇଥିବା ସ୍ଥାନଗୁଡ଼ିକର ରକ୍ଷଣାବେକ୍ଷଣ ଓ ଦୃଢ଼ୀକରଣ, ନିର୍ମାଣାଧୀନ କେନ୍ଦ୍ରଗୁଡ଼ିକର ତ୍ବରିତ କାର୍ଯ୍ୟାନ୍ବୟନ ଓ ଇକୋ-କେନ୍ଦ୍ର ଚଳାଉଥିବା ସ୍ଥାନୀୟ ବାସିନ୍ଦାମାନଙ୍କର ତାଲିମ ଓ ଦକ୍ଷତା ବୃଦ୍ଧି ପାଇଁ ୩୦ କୋଟି ଟଙ୍କାର କାର୍ଯ୍ୟ ଯୋଜନାକୁ ସରକାର ଅନୁମୋଦନ କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ରଙ୍କ ଅଧ୍ୟକ୍ଷତାରେ ଆଜି ଏକ ଉଚ୍ଚସ୍ତରୀୟ ବୈଠକ ଅନୁଷ୍ଠିତ ହୋଇଥିଲା। ଡିଜଟାଲ ମୋଡ୍ରେ ଅନୁଷ୍ଠିତ ଏହି ବୈଠକରେ ଜଙ୍ଗଲ ଓ ପରିବେଶ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ମୋନା ଶର୍ମା ପ୍ରକୃତି ପର୍ଯ୍ୟଟନ ପ୍ରକଳ୍ପ ଗୁଡ଼ିକର କାର୍ଯ୍ୟାନ୍ବୟନ ଓ ପରିଚାଳନା ସମ୍ବନ୍ଧରେ ଆଲୋଚନା କରିଥିଲେ। ବୈଠକରେ ୫ଟି ନୂଆ ସ୍ଥାନକୁ ୱେବ୍ସାଇଟ୍ରେ ପର୍ଯ୍ୟଟକମାନଙ୍କ ନିମନ୍ତେ ଖୋଲିବା ପାଇଁ ନିର୍ଦେଶ ଦିଆଯାଇଛି। ବରଗଡ଼ ଜିଲ୍ଲାର ନୃସିଂହନାଥ, କୋରାପୁଟର ଦେବଦାରୁ(ପାଇନ) ବଣ, ନୂଆପଡ଼ାର ପାତୋରା ଡ୍ୟାମ, ସୁନ୍ଦରଗଡ଼ର ଟେନ୍ସା ଓ କେନ୍ଦୁଝରର କାଞ୍ଜିଆପାଣିଠାରେ ଏହି ନୂତନ ପ୍ରକୃତି ପର୍ଯ୍ୟଟନସ୍ଥଳୀ ବିକଶିତ କରାଯାଇଛି। ନୂଆ ସ୍ଥାନଗୁଡ଼ିକର ବିକାଶ ସମୟରେ ପର୍ଯ୍ୟଟନ ସମ୍ଭାର ଓ ଅନ୍ୟ ରାଜ୍ୟ ତଥା ବିଦେଶରୁ ପର୍ଯ୍ୟଟକଙ୍କୁ ଆକୃଷ୍ଟ କରିବାର ସମ୍ଭାବନାକୁ ଲକ୍ଷ୍ୟ ରଖିବା ଉପରେ ଗୁରୁତ୍ବ ଦିଆଯାଇଛି।
କଳିଙ୍ଗା ଘାଟିର ପାଇନ ବଣ, ବଣାଇ, ଦେଓମାଳି ପର୍ବତ ଶିଖର, ଡମ୍ବରୁଗଡ଼ ଓ କଳାହାଣ୍ଡିର ଜଖମ ଆଦି ସ୍ଥାନକୁ ରାତି-ରହଣୀ, ଇକୋ କେନ୍ଦ୍ର ଭାବେ ବିକଶିତ କରାଯିବ। ଏହାଛଡ଼ା ଫୁଲବାଣୀ ବନଖଣ୍ଡର ସିକିରି, ବଲାଙ୍ଗୀର ବନଖଣ୍ଡର ଭୀମଡୁଙ୍ଗୁରି, ସାତକୋଶିଆର ବାଲିପୁଟ, କଳାହାଣ୍ଡିର ଫୁଲଝରଣ ଓ ରାବଣଧାର ଝରଣା, ଢେଙ୍କାନାଳର ଚକୁରିଆ ଘାଟ ଓ ବୌଦ୍ଧ ବନଖଣ୍ଡର ଡମ୍ବରୁଗଡ଼ଠାରେ ପ୍ରକୃତି ପର୍ଯ୍ୟଟନସ୍ଥଳୀ ମଧ୍ୟ ବିକଶିତ ହେବ। ପ୍ରକୃତି ପର୍ଯ୍ୟଟନ କେନ୍ଦ୍ରମାନଙ୍କରେ ପରିଚ୍ଛନ୍ନତା, ସ୍ବାସ୍ଥ୍ୟକର ପରିବେଶ ଓ କୋଭିଡ ପ୍ରତିରୋଧ ବ୍ୟବସ୍ଥା ଓ ନିୟମର ଅନୁପାଳନ ଉପରେ ଗୁରୁତ୍ବ ଦିଆଯାଇଛି। କୋଭିଡ ପ୍ରତିରୋଧ ପାଇଁ ଜାରି ହୋଇଥିବା ଏସ୍ଓପି ପାଇଁ ୨୫ ବନଖଣ୍ଡକୁ ସମୁଦାୟ ସମୁଦାୟ ୧୫୦ କୋଟି ଟଙ୍କା ଆବଣ୍ଟିତ କରାଯାଇଛି। ୨୦୧୭/୧୮ରେ ରାଜ୍ୟରେ ଇକୋ କେନ୍ଦ୍ରମାନଙ୍କୁ ୧୧,୫୦୦ ପର୍ଯ୍ୟଟକ ଆସିଥିବା ବେଳେ ୨୦୧୮/୧୯ରେ ପର୍ଯ୍ୟଟକଙ୍କ ସଂଖ୍ୟା ୨୯,୦୨୪ ଓ ୨୦୨୦/୨୧ରେ ୫୭ ହଜାରକୁ ବୃଦ୍ଧି ପାଇଛି। ୨୦୧୭/୧୮ରେ ପ୍ରକୃତି ପର୍ଯ୍ୟଟନରୁ ୩.୪ କୋଟି, ୨୦୧୮/୧୯ରେ ୫.୬୧ କୋଟି ଓ ୨୦୨୦/୨୧ରେ ଏହା ୮.୩୨ କୋଟି ଟଙ୍କାର ରାଜସ୍ବ ଆଦାୟ ହୋଇଛି। ବୈଠକରେ ପ୍ରଧାନ ବନରକ୍ଷକ(ବନ୍ୟଜନ୍ତୁ) ଶଶି ପଲ ଓ ଅନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।