ଆଧାର ଲିଙ୍କ କରାଇବା ପାଇଁ ଆପଣଙ୍କ ଘରକୁ ଭୋଡାଫୋନ ଆସିବ !
ନୂଆଦିଲ୍ଲୀ : ଆପଣଙ୍କୁ ବ୍ୟବହାର କରୁଥିବା ସିମ କାର୍ଡ଼ କମ୍ପାନୀ ପକ୍ଷରୁ ଆଧାର ସଂଯୋଗ କରିବା ପାଇଁ ମେସେଜ ଆସିଥିବ । କାରଣ ଫେବ୍ରୁଆରି ୬, ୨୦୧୮ ପୂର୍ବରୁ ସବୁ ମୋବାଇଲ ନମ୍ବରକୁ ଆଧାର ସହ ସଂଯୋଗ କରିବା ପାଇଁ ସୁପ୍ରିମକୋର୍ଟ ଆଦେଶ ଦେଇଛନ୍ତି । ପୂର୍ବରୁ ଏହା କରିବା ପାଇଁ ଆପଣଙ୍କୁ ପାଖ ମୋବାଇଲ ଷ୍ଟୋରକୁ ଯିବାକୁ ପଡ଼ୁଥିଲା ଯାହାକି ଆପଣଙ୍କ ପାଇଁ କଷ୍ଟ ଦାୟକ ଥିଲା । କିନ୍ତୁ ଏବେ ଆପଣଙ୍କ ଟେଲିକମ୍ ଅପରେଟର ଏବଂ ୟୁଏଡ଼ିଏଆଇ ମିଶି ଏହାକୁ ସହଜ କରିବାକୁ ଚେଷ୍ଟା କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଯଦି ଆପଣ ଭୋଡ଼ାଫୋନ ବ୍ୟବହାରକାରୀ ହେବା ସହିତ ଗ୍ରାମାଞ୍ଚଳରେ ରହୁଛନ୍ତି ତେବେ ଆପଣଙ୍କ ପାଇଁ ଆଧାର ସଂଯୋଗ କରିବା ପୂର୍ବ ଅପେକ୍ଷା ସହଜ ହୋଇପାରିବ । ଏବେ ଆପଣ ଘରେ ବସି ଆପଣଙ୍କ ଫୋନ ନମ୍ବରକୁ ଆଧାର ସହ ସଂଯୋଗ କରିପାରିବେ । ଗ୍ରାମାଞ୍ଚଳରେ କିଛି ଲୋକ ଆଧାର ସଂଯୋଗ ବିଷୟରେ ଜାଣିନାହାନ୍ତି । ଘର ଘର ବୁଲି ଏହା ବିଷୟରେ ଲୋକଙ୍କୁ ଜଣାଇବା ସହିତ ଭୋଡାଫୋନ ନମ୍ବରକୁ ଆଧାର ସହ ସଂଯୋଗ କରିବା ପାଇଁ ଭୋଡାଫୋନ ଇଣ୍ଡିଆ ଘୋଷଣା କରିଛି । ଏହା ପ୍ରଥମେ ରାଜସ୍ଥାନରେ ଆରମ୍ଭ କରାଯାଇଥିବା ବେଳେ ଦୁଇଟି ମୋବାଇଲ ଭ୍ୟାନ୍ ଏହି କାମରେ ଲଗାଯାଇଛି । ଏହି ଦୁଇଟି ଭ୍ୟାନ୍ ରାଜସ୍ଥାନର କୋଣ ଅନୁକୋଣରେ ଥିବା ଗାଁକୁ ଯାଇ ଭୋଡାଫୋନ ସିମ୍ ବ୍ୟବହାର କରୁଥିବା ଲୋକମାନଙ୍କୁ ଆଧାର ସଂଯୋଗ କରାଇବାରେ ସାହାଯ୍ୟ କରିବେ ।
ରାଜସ୍ଥାନର ଭୋଡ଼ାଫୋନ ଇଣ୍ଡିଆ ବିଜ୍ନେସର ମୁଖ୍ୟ ଅମିତ୍ ବେଦୀ କହିଛନ୍ତି କି, “ମୁତୟନ ହୋଇଥିବା ଦୁଇଟି ଭ୍ୟାନ ଆଧାର ସଂଯୋଗ କରାଇବା ସହ ୨ଜି ଏବଂ ୩ଜି ନେଟ୍ଓ୍ଵାର୍କ ବ୍ୟବହାର କରୁଥିବା ଲୋକମାନଙ୍କୁ ୪ଜି ନେଟ୍ଓ୍ଵାର୍କର ସୁବିଧା ବିଷୟରେ ଜଣାଇବେ । ତା’ ସହ ୨ଜି/୩ଜି ସିମ୍ କାର୍ଡ଼କୁ ଅପ୍ଗ୍ରେଡ଼୍ କରାଇ ୪ଜି କରାଇବେ। ”
ପୂର୍ବରୁ ଆଧାର ସଂଯୋଗ କରିବା ପାଇଁ ଆପଣଙ୍କୁ ଟେଲିକମ୍ ଅପରେଟରଙ୍କୁୁ ଆପଣଙ୍କର ବାୟୋମେଟ୍ରିକ୍ ଡ଼ିଟେଲ୍ସ ଦେବାକୁ ପଡ଼ୁଥିଲା । କିନ୍ତ ଏବେ ୟୁଏଡ଼ିଏଆଇ ଦ୍ୱାରା ଏହାକୁ ଆହୁରି ସହଜ କରାଯାଇଛି । ଏହା ମାଧ୍ୟମରେ ଆପଣଙ୍କୁ ଟେଲିକମ୍ ଅପରେଟରକୁ ବାୟୋମେଟ୍ରିକ୍ ଡିଟେଲ୍ସ ଦେବାକୁ ପଡ଼ିବ ନାହିଁ । ଡ଼ିସେମ୍ବର ୧ ସୁଦ୍ଧା କେବଳ ଓଟିପି ନମ୍ବର ଦ୍ୱାରା ଆପଣ ଫୋନ ନମ୍ବର ସହ ଆଧାର ସଂଯୋଗ କରାଇ ପାରିବେ ।