ସାଇକେଲ ସେବା ବି ଆରମ୍ଭ କରିବ ଓଲା
ମୁମ୍ବାଇ: ଯାହା ଜଣାପଡୁଛି କେବଳ ଟାକ୍ସି ବା ଅଟୋ ସେବାକୁ ନେଇ ସନ୍ତୁଷ୍ଟ ନାହିଁ ଓଲା । କମ୍ପାନି ପକ୍ଷରୁ ଏବେ ସାଇକେଲ ସେବା ପାଇଁ ଯୋଜନା କରାଯାଉଥିବା ଜଣାଯାଇଛି । ଏହି ସେବାର ନାଁ ରଖା ଯାଇଛି ପେଡାଲ ।
Sambad is now on WhatsApp
Join and get latest news updates delivered to you via WhatsApp
ଯେଉଁ ସ୍ଥାନଗୁଡିକ ବେଶ ଦୂରରେ ନାହିଁ, କିନ୍ତୁ ଚାଲିଚାଲି ବି ଯାଇହେବ ନାହିଁ, ସେଠାକୁ ସାଇକେଲ ସାହାଯ୍ୟରେ ଯାତ୍ରୀମାନେ ସହଜରେ ଯାଇପାରିବେ । ଏପରି ସ୍ଥାନ ହେଉଛି ବିଶ୍ୱ ବିଦ୍ୟାଳୟ କ୍ୟାମ୍ପସ, କର୍ପୋରେଟ୍ କ୍ୟାମ୍ପସ ଆଦି । ସେହି ସବୁ ସ୍ଥାନରେ ସାଇକେଲ ରଖି ଏହି ସେବା ଆରମ୍ଭ କରିବ ଓଲା । ଯାତ୍ରୀମାନେ ଆଧାରକାର୍ଡ ବା କ୍ୟୁଆର୍ କୋର୍ଡ ବ୍ୟବହାର କରି ସାଇକେଲ ନେଇପାରିବେ ଓ ଗନ୍ତବ୍ୟ ସ୍ଥାନରେ ପହଞ୍ଚିବା ପରେ ସାଇକେଲକୁ ତାଲା ପକାଇ ରଖି ଯାଇପାରିବେ । ଓଲା ଆପ ମାଧ୍ୟମରେ ଏହାକୁ ବୁକ୍ କରିହେବ । ସାଇକେଲଟି ଗମନାଗମନର ଏକ ପରିବେଶ ଅନୁକୂଳ ଉପାୟ ମଧ୍ୟରେ ଅନ୍ୟତମ । ଏହି ସେବା ମାଧ୍ୟମରେ ଲୋକମାନଙ୍କ ମଧ୍ୟରେ ପରିବେଶ ସୁରକ୍ଷାର ବାର୍ତ୍ତା ପ୍ରଚାର ପାଇଁ କମ୍ପାନି ଲକ୍ଷ୍ୟ ରଖିଛି ।
ତେବେ ଦେଶବ୍ୟାପୀ ଓଲାର ଏହି ସେବା ଆରମ୍ଭ ହେବାକୁ ଆଉ କିଛି ଦିନ ସମୟ ଲାଗିବ। କାରଣ ଏବେ କମ୍ପାନି ପକ୍ଷରୁ ଏହି ସେବାର ପାଇଲଟ୍ ପ୍ରକଳ୍ପ କେତେକ ନିର୍ଦ୍ଦିଷ୍ଟ ବିଶ୍ୱବିଦ୍ୟାଳୟରେ ଚାଲିଛି ।