ଘାନାରେ ବିସ୍ଫୋରକ ଭର୍ତ୍ତି ଟ୍ରକ ଦୁର୍ଘଟଣାଗ୍ରସ୍ତ, ୧୭ ମୃତ
ଘାନା : ଆଫ୍ରିକୀୟ ଦେଶ ଘାନାରେ ଆଜି ଏକ ଦୁଃଖଦ ଘଟଣା ଘଟିଛି । ଗୋଟିଏ ଖଣିରେ ବ୍ୟବହାର ହେବାକୁ ଥିବା ବିସ୍ଫୋରକ ନେଇ ଯାଉଥିବା ଏକ ଟ୍ରକ ଦୁର୍ଘଟଣାଗ୍ରସ୍ତ ହେବାରୁ ୧୭ ଜଣ ବ୍ୟକ୍ତି ମୃତ୍ୟୁବରଣ କରିବା ସହ ୫୯ ଜଣ ଆହତ ହୋଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଘଟଣାଟି ଘାନାର ରାଜଧାନୀ ଆକରାଠାରୁ ୩୦୦ କିଲୋମିଟର ପଶ୍ଚିମରେ ଥିବା ବୋଗୋସୋ ସହର ନିକଟରେ ଥିବା ଆପିଆଟ ଠାରେ ହୋଇଛି । ବିସ୍ଫୋରକ ଭର୍ତ୍ତି ଟ୍ରକଟି ଏକ ମୋଟରସାଇକେଲ ଓ ଆଉ ଏକ ଗାଡ଼ି ସହ ଧକ୍କା ହେବାରୁ ଦୁର୍ଘଟଣାଗ୍ରସ୍ତ ହୋଇପଡ଼ିଥିଲା । ଫଳରେ ସେଥିରେ ଥିବା ବିସ୍ଫୋରକ ସାମଗ୍ରୀରେ ନିଆଁ ଲାଗି ବିସ୍ଫୋରଣ ହୋଇଥିଲା । ବିସ୍ଫୋରଣ ଏତେ ତୀବ୍ର ଥିଲା ଯେ ଆଖପାଖରେ ଥିବା କୋଠାଗୁଡ଼ିକ ମାଟିରେ ମିଶିଯାଇଛି । ବିସ୍ଫୋରଣ ସ୍ଥାନରେ ଏକ ବଡ଼ ଗାତ ସୃଷ୍ଟି ହୋଇଛି । ଖବର ମିଳିବା ପରେ ଘଟଣାସ୍ଥଳରେ ସ୍ଥାନୀୟ ଲୋକ ଓ ଉଦ୍ଧାରକାରୀ ଦଳ ପହଞ୍ଚି ଉଦ୍ଧାରକାର୍ଯ୍ୟ ଚଳାଇଛନ୍ତି । ଏହି ଘଟଣାରେ ୧୭ ଜଣ ବ୍ୟକ୍ତି ମୃତ୍ୟୁବରଣ କରିବା ସହ ୫୯ ଜଣ ଆହତ ହୋଇଛନ୍ତି । ଆହତ ମାନଙ୍କ ମଧ୍ୟରୁ କେତେକଙ୍କ ଅବସ୍ଥା ସଂକଟାପନ୍ନ ରହିଛି ବୋଲି ଘାନାର ସୂଚନା ମନ୍ତ୍ରୀ କୋଜୋ ଓପୋଙ୍ଗ କ୍ରୁମାହ କହିଛନ୍ତି । ପ୍ରଶାସନ ପକ୍ଷରୁ ଘଟଣାର ତଦନ୍ତ ନିର୍ଦ୍ଦେଶ ଦିଆଯାଇଛି ।