ପୁଣି ପାକିସ୍ତାନକୁ ଧମକାଇଲେ ଗଡକରୀ, ଆତଙ୍କବାଦ ବନ୍ଦ ନହେଲେ ପାଣି ବନ୍ଦ କରିବୁ
ନୂଆଦିଲ୍ଲୀ : ପୁଣି ଥରେ ପାକିସ୍ତାନକୁ ଧମକାଇଛନ୍ତି କେନ୍ଦ୍ରମନ୍ତ୍ରୀ ନିତିନ ଗଡ଼କରୀ । ସେ କହିଛନ୍ତି ଯେ ପାକିସ୍ତାନ ଯଦି ଆତଙ୍କବାଦକୁ ବନ୍ଦ ନକରେ ତେବେ ଭାରତ ବାଧ୍ୟ ହୋଇ ପାଣି ବନ୍ଦ କରିଦେବ । ଗଣମାଧ୍ୟମକୁ ଏକ ସାକ୍ଷାତକାର ଦେଇ ସେ କହିଛନ୍ତି ଯେ ଭାରତ ଏବେ ସିନ୍ଧୁ ଜଳବଣ୍ଟନ ଚୁକ୍ତିର ଅଧ୍ୟୟନ କରୁଛି । ବିଶେଷକରି ଭାରତର ସଂପୂର୍ଣ୍ଣ ଅଧିକାର ଥିବା ୩ଟି ନଦୀର ପ୍ରକଳ୍ପ ରିପୋର୍ଟକୁ ଅଧ୍ୟୟନ କରାଯାଉଛି । କିଛି ଦିନ ତଳେ ମଧ୍ୟ ଗଡକରୀ ଏପରି ମନ୍ତବ୍ୟ ଦେଇଥିବାରୁ ପାକିସ୍ତାନ ତାହାର ତୀବ୍ର ପ୍ରତିକ୍ରିୟା ପ୍ରକାଶ କରିଥିଲା ।୧୯୬୦ର ସିନ୍ଧୁ ଜଳବଣ୍ଟନ ଚୁକ୍ତିକୁ ଭାରତ ସମ୍ମାନ ଜଣାଉ ବୋଲି ପାକିସ୍ତାନର ବୈଦେଶିକ ମନ୍ତ୍ରାଳୟ ପକ୍ଷରୁ କୁହାଯାଇଥିଲା ।
Sambad is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ ଯେ ହିମାଳୟରୁ ବାହାରି ଥିବା ୬ଟି ନଦୀ ଭାରତ ବାଟଦେଇ ପାକିସ୍ତାନକୁ ଯାଉଛନ୍ତି। ସେଗୁଡ଼ିକ ହେଲେ ସିନ୍ଧୁ, ରବି, ଚେନାବ,ଝେଲମ, ସତଲେଜ ଓ ବ୍ୟାସ । ୧୯୬୦ର ସିନ୍ଧୁ ନଦୀ ଜଳବଣ୍ଟନ ଚୁକ୍ତି ଅନୁସାରେ ବ୍ୟାସ, ସତଲେଜ ଓ ରବି ଭାରତ ନିୟନ୍ତ୍ରଣରେ ରହିଥିବା ବେଳେ ଅନ୍ୟତିନୋଟି ନଦୀ ପାକିସ୍ତାନ ନିୟନ୍ତ୍ରଣରେ ଅଛି ।