ନୂଆଦିଲ୍ଲୀ : ୪ଟି ଗରିବ ଦେଶର ଲୋକଙ୍କ ପେଟକୁ ଦାନା ଯୋଗାଇବ ଭାରତ । ଏହି ୪ଟି ଦେଶ ହେଲେ ଆଫଗାନିସ୍ତାନ, ଇଥିଓପିଆ, ସିରିଆ ଓ ୟେମେନ । ଜାତିସଂଘର ବିଶ୍ବ ଖାଦ୍ୟ କାର୍ଯ୍ୟକ୍ରମ (ଡବ୍ଲୁଏଫପି) ଅଧିନରେ ଏସବୁ ଦେଶଙ୍କୁ ଚାଉଳ ଓ ଗହମ ପଠାଇବ ଭାରତ ।
Sambad is now on WhatsApp
Join and get latest news updates delivered to you via WhatsApp
କେନ୍ଦ୍ର ସରକାରଙ୍କ ସୁତ୍ରରୁ ମିଳିଥିବା ସୂଚନା ଅନୁସାରେ ଏସବୁ ଦେଶଙ୍କୁ ଖାଦ୍ୟାନ୍ନ ପଠାଇବାକୁ ଗତ ଫେବ୍ରୁଆରି ମାସରେ ଭାରତ ସରକାର ଡବ୍ଲୁଏଫପି ସହ ଏକ ଚୁକ୍ତି କରିଛନ୍ତି । ମୂଳ ଚୁକ୍ତି ଅନୁସାରେ ଭାରତ ୨ ଲକ୍ଷ ଟନ ଗହମ ଓ ଚାଉଳ ( ୧.୯ ଲକ୍ଷ ଟନ ଗହମ ଓ ୦.୧ ଲକ୍ଷ ଟନ ଚାଉଳ) ଯୋଗାଇଥାନ୍ତା । ପରେ ଏହି ପରିମାଣକୁ ଆହୁରି ବୃଦ୍ଧି କରାଯାଇଛି ।
ଭାରତ ସରକାର ଏଫସିଆଇ ଦ୍ବାରା ପରିଚାଳିତ ନିଜର କେନ୍ଦ୍ରୀୟ ଶସ୍ୟ ଭଣ୍ଡାରରୁ ଏସବୁ ଚାଉଳ ଓ ଗହମ ଯୋଗାଇବେ । ଏହା ଦ୍ବାରା ଏସବୁ ଦେଶଙ୍କ ସହ ଭାରତର ସଂମ୍ପର୍କ ସୁଦୃଢ ହୋଇପାରିବ । ଏହା ସହିତ ଦେଶର ବଳକା ଚାଉଳ ଓ ଗହମର ଭଣ୍ଡାରଣ ଓ ରକ୍ଷଣାବେକ୍ଷଣ ବାବଦ ଖର୍ଚ୍ଚ ବଞ୍ଚିଯିବ । ଭାରତ ନିଜ ଆବଶ୍ୟକତାଠାରୁ ଅଧିକ ଖାଦ୍ୟଶସ୍ୟ ଉତ୍ପାଦନ କରିଥାଏ । ଅନେକ ସମୟରେ ବଳକା ଶସ୍ୟ ରଖିବାକୁ ସ୍ଥାନ ନଥିବାରୁ ବାହାରେ ରହି ନଷ୍ଟ ହୋଇଥାଏ । ଏଣୁ ଏହି ପଦକ୍ଷେପ ଦ୍ବାରା ଖାଦ୍ୟ ଶସ୍ୟ୍ ନଷ୍ଟ ହେବାର ସମସ୍ୟା ରହିବ ନାହିଁ ।