ମୁମ୍ବାଇ: ବଞ୍ଚିତ ବହୁଜନ ଅଘାଡି (ଭିବିଏ) ଅଧ୍ୟକ୍ଷ ପ୍ରକାଶ ଆମ୍ବେଦକର ମହାବିକାଶ ଅଘାଡିକୁ ଝଟକା ଦେଇଦେଇଛନ୍ତି | ସେ ମହାରାଷ୍ଟ୍ରର ଏମଭିଏ ସହ ମେଣ୍ଟ ଭାଙ୍ଗିଛନ୍ତି। ଗତ କିଛି ଦିନ ହେବ ମହାବିକାଶ ଅଘାଡି ଏବଂ ପ୍ରକାଶ ଆମ୍ବେଦକରଙ୍କ ପାର୍ଟି ମଧ୍ୟରେ ଆସନ ଭାଗବଣ୍ଟା ନେଇ ବିବାଦ ଲାଗି ରହିଥିଲା। ଏଥି ସହିତ କୃଷକ ନେତା ରାଜୁ ଶେଟ୍ଟୀ ମଧ୍ୟ ସ୍ୱାଧୀନ ଭାବରେ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ଘୋଷଣା କରିଛନ୍ତି। ସେହିପରି ଶିବସେନା ୟୁବିଟି ବୁଧବାର ସାଙ୍ଗଲି ଆସନ ପାଇଁ ପ୍ରାର୍ଥୀ ଘୋଷଣା କରିଛି ଯାହା ମହାରାଷ୍ଟ୍ର କଂଗ୍ରେସ ନେତୃତ୍ୱକୁ କ୍ରୋଧିତ କରିଛି। ସୂଚନାନୁସାରେ, ରାଜ୍ୟ କଂଗ୍ରେସ ନେତାମାନେ ଦିଲ୍ଲୀ ହାଇକମାଣ୍ଡଙ୍କୁ ଏ ବିଷୟରେ ସୂଚନା ଦେଇଛନ୍ତି ଏବଂ ସାଙ୍ଗଲି ଆସନରେ ବନ୍ଧୁତ୍ୱପୂର୍ଣ୍ଣ ପ୍ରତିଯୋଗିତାର ବିକଳ୍ପ ମଧ୍ୟ ପରାମର୍ଶ ଦେଇଛନ୍ତି। ବର୍ତ୍ତମାନ କଂଗ୍ରେସ ହାଇକମାଣ୍ଡଙ୍କ ପରବର୍ତ୍ତୀ ଆଦେଶକୁ ରାଜ୍ୟ ନେତୃତ୍ୱ ଅପେକ୍ଷା କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ ମୁମ୍ବାଇର ୬ଟି ଆସନ ମଧ୍ୟରୁ ୫ଟିରେ ଶିବସେନା-ୟୁବିଟି ପ୍ରାର୍ଥୀ ଘୋଷଣା କରିଥିବାରୁ ଏହାକୁ ନେଇ ମୁମ୍ବାଇର କଂଗ୍ରେସ ନେତାମାନେ ଖୁସି ନୁହଁନ୍ତି। ଏହା ବ୍ୟତୀତ ମୁମ୍ବାଇ ଉତ୍ତର ପଶ୍ଚିମ ଏବଂ ମୁମ୍ବାଇ ଦକ୍ଷିଣ କେନ୍ଦ୍ରୀୟ ଆସନ ହରାଇବା ନେଇ ମୁମ୍ବାଇ କଂଗ୍ରେସ ନେତାଙ୍କ ମଧ୍ୟରେ ଅସନ୍ତୋଷ ରହିଛି। ଏହାପୂର୍ବରୁ ଶିବସେନା (ୟୁବିଟି) ଲୋକସଭା ନିର୍ବାଚନ ପାଇଁ ୧୬ ଜଣ ପ୍ରାର୍ଥୀଙ୍କ ପ୍ରଥମ ତାଲିକା ପ୍ରକାଶ କରିଛି। ଯେଉଁଠାରୁ କଂଗ୍ରେସ ନେତା ସଞ୍ଜୟ ନିରୁପମ୍ ଟିକେଟ୍ ଚାଁହୁଥିଲେ ସେହି ସ୍ଥାନରୁ ଶିବସେନା ଆମୋଲ କୀର୍ତ୍ତିକରଙ୍କୁ ଟିକେଟ୍ ଦେଇଛି । ଗତକାଲି ଅର୍ଥାତ୍ ମଙ୍ଗଳବାର ପ୍ରକାଶ ଆମ୍ବେଦକର ଅଲ୍ଟିମେଟମ୍ ଦେଇଥିଲେ । ତେବେ କୌଣସି ନିଷ୍ପତ୍ତି ନ ହେବାରୁ ସେ ଇଣ୍ଡିଆ ମେଣ୍ଟରୁ ଓହରିଯାଇ ୮ଟି ଆସନରେ ପ୍ରାର୍ଥୀଙ୍କ ନାମ ମଧ୍ୟ ଘୋଷଣା କରିଛନ୍ତି। ପ୍ରକାଶ ଆମ୍ବେଦକର ନିଜେ ଅକୋଲାରୁ ନିର୍ବାଚନ ଲଢ଼ିବେ ।