କାହାକୁ ଭୋଟ ଦେବେ ଏହି ଦିନ ଚିନ୍ତା କରନ୍ତି ଭୋଟର, ରୋଚକ ସର୍ଭେ ବାବଦରେ ଜାଣିଛନ୍ତି କି?
ନୂଆଦିଲ୍ଲୀ: ଭାରତୀୟ ଗଣତନ୍ତ୍ରର ସବୁଠାରୁ ବଡ ପର୍ବ, ସାଧାରଣ ନିର୍ବାଚନ ୨୦୨୪କୁ ନେଇ ଆଲୋଚନା ଜୋର ଧରିଛି | ଚର୍ଚ୍ଚା ମୁତାବକ ମାର୍ଚ୍ଚ ୧୭ ସୁଦ୍ଧା ୧୮ତମ ଲୋକସଭା ନିର୍ବାଚନ ପାଇଁ ତାରିଖ ଘୋଷଣା ହୋଇପାରେ | ନିର୍ବାଚନ ଆୟୋଗ ଯୁଦ୍ଧକାଳୀନ ଭିତ୍ତିରେ ନିର୍ବାଚନ ପାଇଁ ପ୍ରସ୍ତୁତି ଚଳାଇଛନ୍ତି। ଉଲ୍ଲେଖ ଥାଉ କି ଭାରତରେ ସମ୍ବିଧାନ କାର୍ଯ୍ୟକାରୀ ହେବା ପରଠାରୁ ଲୋକସଭା ଓ ବିଧାନସଭା ପାଇଁ ପ୍ରାୟ ୪୦୦ ନିର୍ବାଚନ ଅନୁଷ୍ଠିତ ହୋଇଯାଇଛି, କିନ୍ତୁ ଏହା ପ୍ରଥମ ଥର ହେବ ଯେତେବେଳେ ଭାରତରେ ପ୍ରାୟ ୧୦୦ କୋଟି ଭୋଟର ଏକାସାଙ୍ଗରେ ସେମାନଙ୍କ ସରକାର ଚୟନ କରିବେ। କେଉଁ ପର୍ଯ୍ୟାୟରେ ଏବଂ କେବେ ନିର୍ବାଚନ ଅନୁଷ୍ଠିତ ହେବ ସେନେଇ ନିର୍ବାଚନ ଆୟୋଗ ନିଷ୍ପତ୍ତି ନେଇଥାନ୍ତି । ଭାରତରେ ସମସ୍ତ ନାଗରିକଙ୍କୁ ଭୋଟ୍ ଦେବାର ଏବଂ ପ୍ରତିଦ୍ୱନ୍ଦ୍ୱିତା କରିବାର ଅଧିକାର ଦିଆଯାଇଛି। ତଥାପି, ଏଥିରେ କିଛି ସର୍ତ୍ତ ମଧ୍ୟ ରହିଛି | ନିର୍ବାଚନ ଆୟୋଗର ନିୟମ ଅନୁଯାୟୀ, ୧୮ ବର୍ଷରୁ ଅଧିକ ବୟସର ଭାରତୀୟମାନେ ଭୋଟ୍ ଦେବାକୁ ଯୋଗ୍ୟ ଅଟନ୍ତି। ୧୯୮୯ ପୂର୍ବରୁ ୨୧ ବର୍ଷ ଏବଂ ତଦୁର୍ଦ୍ଧ୍ୱ ନାଗରିକଙ୍କର ଏହି ଅଧିକାର ଥିଲା | ସେହିପରି ଜେଲରେ ଥିବା କଏଦୀଙ୍କୁ ଭୋଟ୍ ଦେବାର ଅଧିକାର ନାହିଁ। ଏଥି ସହିତ, ଯେଉଁମାନଙ୍କର ନାମ ଭୋଟର ତାଲିକାରେ ନାହିଁ, ସେମାନେ ମଧ୍ୟ ଭୋଟ୍ ଦେଇପାରିବେ ନାହିଁ। ପ୍ରାର୍ଥୀ ବିଷୟରେ କହିବାକୁ ଗଲେ, ୨୫ ବର୍ଷରୁ ଅଧିକ ବୟସର ଭାରତୀୟମାନେ ନିର୍ବାଚନ ଲଢ଼ିପାରିବେ | ତେବେ ଯଦି ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରୁଥିବା ପ୍ରାର୍ଥୀଙ୍କୁ ୨ ବର୍ଷରୁ ଅଧିକ ଜେଲ ଦଣ୍ଡ ମିଳିଥାଏ, ତେବେ ସେ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିପାରିବେ ନାହିଁ।
Sambad is now on WhatsApp
Join and get latest news updates delivered to you via WhatsApp
କାହାକୁ ଦେବେ ଭୋଟ ଏହି ଦିନ ଭାବନ୍ତି ଭୋଟର
୨୦୧୯ରେ, ସେଣ୍ଟର ଫର ଷ୍ଟଡି ଅଫ ଡେଭଲପିଙ୍ଗ ସୋସାଇଟି ଏକ ସର୍ଭେ କରିଥିଲା | ଏହି ଅନୁଯାୟୀ, ୩୫ ପ୍ରତିଶତ ଲୋକ କହିଥିଲେ ଯେ ନିର୍ବାଚନ ପ୍ରଚାର ପୂର୍ବରୁ ସେମାନେ କାହାକୁ ଭୋଟ୍ ଦେବେ ତାହା ସ୍ଥିର କରନ୍ତି। ୧୧ ପ୍ରତିଶତ ଲୋକ କହିଥିଲେ ଯେ ପ୍ରାର୍ଥୀ ଘୋଷଣା ପରେ ସେମାନେ ନିଷ୍ପତ୍ତି ନିଅନ୍ତି । ୧୫ ପ୍ରତିଶତ ଲୋକ କହିଥିଲେ ଯେ ମତଦାନ ଦିନ ହିଁ କାହାକୁ ଭୋଟ୍ ଦେବେ ତାହା ସେମାନେ ସ୍ଥିର କରନ୍ତି। ୧୭ ପ୍ରତିଶତ ଲୋକ କହିଥିଲେ ଯେ ନିର୍ବାଚନ ପ୍ରଚାର ଦେଖିବା ପରେ ସେମାନେ ଏହି ନିର୍ବାଚନରେ କାହାକୁ ଭୋଟ୍ ଦେବେ ତାହା ସ୍ଥିର କରନ୍ତି। ୧୪ ପ୍ରତିଶତ ଲୋକ ମତଦାନର ୧-୨ ଦିନ ପୂର୍ବରୁ ନିଷ୍ପତ୍ତି ନିଅନ୍ତି ବୋଲି କହିଥିଲେ |