ଖୁବଶୀଘ୍ର ନିର୍ମାଣ ହେବ ରାମମନ୍ଦିର: ବିଶ୍ୱ ହିନ୍ଦୁ ପରିଷଦ
ଅଯୋଧ୍ୟା: ଲୋକସଭା ନିର୍ବାଚନରେ ଭାରତୀୟ ଜନତା ପାର୍ଟିର ବିପୁଳ ବିଜୟ ପରେ ସନ୍ଥ ଓ ଧର୍ମାଚାର୍ଯ୍ୟମାନଙ୍କର ଆଶା ବଢିଯାଇଛି | ତେବେ ଅଯୋଧ୍ୟାରେ ରାମମନ୍ଦିର ନିର୍ମାଣ ନେଇ ସନ୍ଥମାନଙ୍କର ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଯାଇଛି | ମନ୍ଦିର ନିର୍ମାଣରେ ଯେଭଳି ଆଉ ବିଳମ୍ବ ନ ହୁଏ ସେ ନେଇ ଆଲୋଚନା ହୋଇଛି | ବିଶ୍ୱହିନ୍ଦୁ ପରିଷଦର ନେତାମାନେ ସାଧୁମାନଙ୍କୁ ଆଶ୍ୱାସନା ଦେଇଛନ୍ତି ଯେ ମନ୍ଦିର ନିର୍ମାଣ କାର୍ଯ୍ୟ ଖୁବ ଶୀଘ୍ର ଆରମ୍ଭ ହେବ |
Sambad is now on WhatsApp
Join and get latest news updates delivered to you via WhatsApp
ସନ୍ଥ ସମାଜ ପକ୍ଷରୁ କୁହାଯାଇଛି ଯେ ଖୁବଶୀଘ୍ର ସନ୍ଥମାନଙ୍କର ଏକ ପ୍ରତିନିଧି ଦଳ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଭେଟିବାକୁ ଯିବ | ବୈଠକରେ ସାମିଲ ହୋଇଥିବା ବିଏଚପି ନେତା ସନ୍ଥମାନଙ୍କୁ ଆଶ୍ୱସ୍ତ ଦେଇ କହିଛନ୍ତି ଯେ ଏବେ ସବୁ କିଛି ଠିକ ଚାଲିଛି | ତେଣୁ ବହୁ ସମୟ ଅପେକ୍ଷା କରିବାକୁ ପଡିବ ନାହିଁ | ଏହା ସେମାନେ କହିଛନ୍ତି ଯେ ଖୁବ ଶୀଘ୍ର ରାମଙ୍କର ଭବ୍ୟ ମନ୍ଦିର ନିର୍ମାଣ ହେବ | ଶ୍ରୀରାମ ଜନ୍ମଭୂମିର ଅଧ୍ୟକ୍ଷ ମହନ୍ତ ନୃତ୍ୟ ଗୋପାଳ ଦାସ କହିଛନ୍ତି ଯେ କେନ୍ଦ୍ର ଓ ରାଜ୍ୟରେ ବିଜେପିର ବହୁମତ ସରକାର ରହିଛି |
ଭଗବାନଙ୍କ କୃପାରୁ ସୁନ୍ଦର ସମୟ ଆସିଛି | ତେଣୁ ଏହି ଅନୁକୂଳ ସମୟରେ ମନ୍ଦିର ନିର୍ମାଣ ହେବା ଆବଶ୍ୟକ | ସେ କହିଛନ୍ତି ଯେ ବହୁତ ମୁସଲମାନ ସମ୍ପ୍ରଦାୟର ବ୍ୟକ୍ତି ମଧ୍ୟ ମନ୍ଦିର ନିର୍ମାଣ ସପକ୍ଷରେ ଅଛନ୍ତି | ଏଠାରେ ସୂଚନା ଥାଉ କି ଦୁଇ ଦିନ ତଳେ ବିଜେପି ନେତା ସୁବ୍ରମଣ୍ୟମ ସ୍ୱାମୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଚିଠି ଲେଖିଥିଲେ | ଏହି ଚିଠିରେ ଶୀଘ୍ର ରାମ ମନ୍ଦିର ନିର୍ମାଣ କରିବାକୁ ଅପିଲ କରିଥିଲେ |