ଅସ୍ତରଙ୍ଗ: ମୁଣ୍ଡ ନେଲା ମୁହାଣ। ମାଛ ଧରିବାକୁ ଯାଇ ଭାସିଗଲେ ଜଣେ ବ୍ୟକ୍ତି। ମୃତ ଅବସ୍ଥାରେ ଉଦ୍ଧାର କଲା ଓଡ୍ରାଫ୍ ଟିମ। କୋରଣା ପଞ୍ଚାୟତର ପବିତ୍ର ବିଶ୍ଵାଳ(୫୫) ନାମକ ଜଣେ ବ୍ୟକ୍ତି ଗତକାଲି ରାତିରେ କେଳୁଣୀ ମୁହାଣ ସଲଗ୍ନ ନଈକୁ ମାଛ ଧରିବାକୁ ଯାଇ ପାଣିରେ ଭାସିଯିବା ପରେ ଆଜି ତାଙ୍କୁ ମୃତ ଅବସ୍ଥାରେ ଉଦ୍ଧାର କରାଯାଇଛି। ଗତକାଲି ରାତିରୁ ସେ ନିଖୋଜ ଥିଲାବେଳେ ଆଜି ସକାଳୁ ଅଗ୍ନିଶମ ବିଭାଗର ଓଡ୍ରାଫ୍ ଟିମ୍ ବହୁ ଖୋଜାଖୋଜି କରିବା ପରେ ମୃତଦେହ ଠାବ କରିଥିଲା।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ ପବିତ୍ର ଅନ୍ୟ ଦୁଇଜଣଙ୍କ ସହ ଗତକାଲି ରାତିରେ କାଡୁଆ-ପ୍ରାଚୀ ନଦୀ ସଂଲଗ୍ନ କେଳୁଣୀ ମୁହାଣ ନିକଟକୁ ମାଛ ଧରିବାକୁ ଯାଇଥିଲେ। ସେମାନେ ଗୋଟିଏ ପଟେ ଯାଉଥିବା ବେଳେ ଜୁଆର ଯୋଗୁ ନଈରେ ହଠାତ୍ ଅଧିକ ପାଣି ଆସିଯିବାରୁ ସେହିବାଟ ଦେଇ ଯିବାକୁ କେହି ଆଗ୍ରହ ପ୍ରକାଶ କରିନଥିଲେ । ଅନ୍ୟ ୨ ଜଣ ଗୋଟିଏ ବାଟରେ ଯିବା ସହ ପବିତ୍ର କିନ୍ତୁ ତାଙ୍କ ସହ ନଯାଇ ପୂର୍ବ ବାଟରେ ଯିବାକୁ ପସନ୍ଦ କରିଥିଲେ। ଦୁର୍ଭାଗ୍ୟ ଏମିତି ଯେ ସବୁଦିନିଆ ନଈରେ ସତେ ଯେପରି ଜମ ଜଗି ବସିଥିଲା। ପବିତ୍ର ପାଣି ସୁଅରେ ପଡିଯିବା ପରେ ହାତରେ ଧରିଥିବା ଜାଲ ସହ ବୁଡିଯାଇଥିଲେ।
ଅନ୍ୟ ୨ ଜଣ ମୁହାଣ ନିକଟରେ ପହଞ୍ଚି ମାଛ ଧରିଥିବା ବେଳେ ତାଙ୍କ ନିକଟରେ ପବିତ୍ର ନପହଞ୍ଚିବାରୁ ସେମାନଙ୍କ ସନ୍ଦେହ ବଢିଥିଲା। ରାତି ସାରା ଖୋଜାଖୋଜି କରିଥିଲେ ବି ସେମାନେ ପବିତ୍ରକୁ ପାଇନଥିଲେ। ଆଜି ସକାଳେ ଅଗ୍ନିଶମର ଓଡ୍ରାଫ୍ ଟିମ୍ ପହଞ୍ଚି ଚାରିଆଡେ ବହୁ ଖୋଜିବା ପରେ ତାଙ୍କର ମୃତଦେହ ଉଦ୍ଧାର ହୋଇଥିଲା। ପବିତ୍ର ପାଣିରେ ଭାସିଯିବା ଓ ଜାଲରେ ଛନ୍ଦି ହୋଇ ବୁଡିଯିବା ପରେ ମୃତ୍ୟୁବରଣ କରିଥିବା କୁହାଯାଇଛି। ତେବେ ଘଟଣା ସ୍ଥଳରେ ଅସ୍ତରଙ୍ଗ ପୁଲିସ୍ ପହଞ୍ଚି ଶବକୁ ଜବତ କରି ଅସ୍ତରଙ୍ଗ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନେଇଥିଲା। ସେଠାରେ କାର୍ଯ୍ୟରତ ଡାକ୍ତର ପରୀକ୍ଷା କରି ତାଙ୍କୁ ମୃତ ଘୋଷଣା କରିଥିଲେ।
ଅନ୍ୟପକ୍ଷରେ ପବିତ୍ର ଜଣେ ଆଗଧାଡିର ରାଜନୈତିକ କର୍ମୀ ହୋଇଥିବାରୁ ତାଙ୍କ ମୃତ୍ୟୁ ଖବର ଶୁଣିବା ପରେ କାକଟପୁର ନିର୍ବାଚନ ମଣ୍ଡଳୀର ପୂର୍ବତନ ବିଧାୟକ ସୁରେନ୍ଦ୍ର ସେଠୀ, ଅସ୍ତରଙ୍ଗ ପଞ୍ଚାୟତ ପୂର୍ବତନ ସମିତି ସଭ୍ୟ ତଥା ମିଳିତ ମେଣ୍ଟ ଆବାହକ ଦିବାକର ଛାଟୋଇ, ବହୁ ପୁରୁଖା କର୍ମୀ ଓ ନେତୃବୃନ୍ଦ ଦୁଃଖଦ ସମୟରେ ପହଞ୍ଚି ପବିତ୍ରଙ୍କ ଶେଷ ଦର୍ଶନ କରିବା ସହ ଗଭୀର ଶୋକ ପ୍ରକାଶ କରିଛନ୍ତି ଏବଂ ତାଙ୍କ ପରିବାରକୁ ସମବେଦନା ଜଣାଇଛନ୍ତି |