ବିଦ୍ୟୁତ୍ ତାର ଛିଣ୍ଡି ବୃଦ୍ଧଙ୍କ ମୃତ୍ୟୁ ଘଟଣା:୨.୫୦ ଲକ୍ଷ କ୍ଷତିପୂରଣ ଦେବାକୁ କୋର୍ଟଙ୍କ ନିର୍ଦ୍ଦେଶ
ବାରିପଦା: ବଡସାହି ଥାନା ଅନ୍ତର୍ଗତ ଘୁସୁରିଆ-ପାଉଁଶିଆ ଗ୍ରାମର ଭରତ ଦେହୁରୀ(୬୫)ଙ୍କର ଗତ ୨୦୧୫ ମସିହାରେ ଛିଡ଼ି ପଡିଥିବା ବିଦ୍ୟୁତ ତାର ସଂସ୍ପର୍ଶରେ ଆସି ମୃତ୍ୟୁ ହୋଇଥିଲା। ମୃତକ ପରିବାରକୁ କ୍ଷତିପୂରଣ ରାଶି ଦେବାକୁ ଗ୍ରାମବାସୀ ଦାବି କରିଥିଲେ ବି ବିଦ୍ୟୁତ ବିଭାଗ ଏହାକୁ ଶୁଣି ନଥିଲା। ଏ ନେଇ ମୃତକଙ୍କ ପୁଅ ପଦ୍ମଲୋଚନ ବଡସାହି ଥାନାରେ ଅଭିଯୋଗ କରିଥିଲେ। ଏହି ମାମଲାଟି ବାରିପଦା ସବଜଜ୍ କୋର୍ଟ-୨ରେ ଦୀର୍ଘ ୭ ବର୍ଷ ହେଲା ବିଚାରାଧୀନ ଥିଲା।
Sambad is now on WhatsApp
Join and get latest news updates delivered to you via WhatsApp
ବିଚାରପତି ଦେବଶ୍ରୀ ସାହୁ ବୁଧବାର ଏହି ମାମଲାର ଶୁଣାଣି କରି ମୃତକଙ୍କ ପରିବାରକୁ କ୍ଷତିପୂରଣ ବାବଦକୁ ୨ ଲକ୍ଷ ୫୦ ହଜାର ଟଙ୍କା ଦେବାକୁ ନିର୍ଦ୍ଦେଶ ଦେଇଛନ୍ତି। ବିଦ୍ୟୁତ୍ ବିଭାଗର ଅବହେଳା ପାଇଁ ତାଙ୍କର ମୃତ୍ୟୁ ହୋଇଥିବା କୋର୍ଟ ଅନୁଭବ କରି କ୍ଷତିପୂରଣ ରାଶି ଦେବାକୁ ନିର୍ଦ୍ଦେଶ ଦେଇଛନ୍ତି। ମୃତକଙ୍କ ପରିବାର ପକ୍ଷରୁ ଆଇନଜୀବୀ ହିମାଂଶୁ ସଦୁଆଳ ଓ ବିଦ୍ୟୁତ ବିଭାଗ ପକ୍ଷରୁ ଆଇନଜୀବୀ ଏମ.ଆର ପଟ୍ଟନାୟକ କେସ୍ ଲଢୁଥିଲେ। ସୂଚନାଯୋଗ୍ୟ; ୨୦୧୫ ମେ ମାସ ୬ ତାରିଖରେ ଏହି ଘଟଣାଟି ଘଟିଥିଲା। ଭରତ ବିଲକୁ ଯିବା ବାଟରେ ବିଦ୍ୟୁତ ତାର ସଂସ୍ପର୍ଶରେ ଆସି ପ୍ରାଣ ହରାଇଥିଲେ।