ସିଆଇଏସ୍ସିଇ ପରୀକ୍ଷାଫଳ ପ୍ରକାଶ: ଦଶମରେ ୯୯.୦୮%, ଦ୍ବାଦଶରେ ୯୮.୯୦% ପାସ୍
ଭୁବନେଶ୍ବର: କାଉନ୍ସିଲ୍ ଫର୍ ଦି ଇଣ୍ଡିଆନ୍ ସ୍କୁଲ ସାର୍ଟିଫିକେଟ୍ ଏଗ୍ଜାମିନେସନ (ସିଆଇଏସ୍ସିଇ) ଦ୍ବାରା ପରିଚାଳିତ ବିଦ୍ୟାଳୟର ଦଶମ (ଆଇସିଏସ୍ଇ) ଓ ଦ୍ବାଦଶ ଶ୍ରେଣୀ(ଆଇଏସ୍ସି) ପରୀକ୍ଷା ଫଳ ଆଜି ପ୍ରକାଶ ପାଇଛି। ଦଶମରେ ଓଡ଼ିଶାର ୯୩ଟି ବିଦ୍ୟାଳୟର ୮ ହଜାର ୭୩୯ ଛାତ୍ରଛାତ୍ରୀ ପରୀକ୍ଷା ଦେଇଥିଲେ। ସେମାନଙ୍କ ମଧ୍ୟରୁ ୯୯.୦୮% ପରୀକ୍ଷାର୍ଥୀ କୃତକାର୍ଯ୍ୟ ହୋଇଛନ୍ତି। ଛାତ୍ରଙ୍କ ତୁଳନାରେ ଛାତ୍ରୀମାନେ ଉନ୍ନତ ପ୍ରଦର୍ଶନ କରିଛନ୍ତି। ପରୀକ୍ଷା ଦେଇଥିବା ୪,୬୨୯ ଜଣ ଛାତ୍ରଙ୍କ ମଧ୍ୟରୁ ୪,୫୭୬ ଅର୍ଥାତ୍ ୯୮.୮୬% ଏବଂ ୪,୧୧୦ଜଣ ଛାତ୍ରୀଙ୍କ ମଧ୍ୟରୁ ୪,୦୮୩ ଜଣ ଅର୍ଥାତ୍ ୯୯.୩୪% ପାସ୍ କରିଛନ୍ତି। ଅନୁସୂଚିତ ଜାତି ବର୍ଗର ୯୮.୬୪% ଓ ଅନୁସୂଚିତ ଜନଜାତି ବର୍ଗର ୯୭.୧୭% ପରୀକ୍ଷାର୍ଥୀ ସଫଳତାର ସହ ଉତ୍ତୀର୍ଣ୍ଣ ହୋଇଛନ୍ତି। ଅନ୍ୟାନ୍ୟ ପଛୁଆ ବର୍ଗର ୯୯.୫୦% ଛାତ୍ରଛାତ୍ରୀ କୃତକାର୍ଯ୍ୟ ହୋଇଥିବା ସିଆଇଏସ୍ସିଇ ପକ୍ଷରୁ ଜାରି ବିଜ୍ଞପ୍ତିରେ କୁହାଯାଇଛି।
Sambad is now on WhatsApp
Join and get latest news updates delivered to you via WhatsApp
ଆଇଏସ୍ସିରେ ଓଡ଼ିଶାରୁ ୩୩ଟି ବିଦ୍ୟାଳୟର ୧,୭୨୬ ଜଣ ଛାତ୍ରଛାତ୍ରୀ ପରୀକ୍ଷା ଦେଇଥିବା ବେଳେ ୯୮.୯୦% ପାସ୍ କରିଛନ୍ତି। ଏଥିରେ ବି ଛାତ୍ରୀମାନଙ୍କ ପ୍ରଦର୍ଶନ ଉଚ୍ଚକୋଟିର ହୋଇଛି। ପରୀକ୍ଷା ଦେଇଥିବା ୮୭୨ ଜଣ ଛାତ୍ରଙ୍କ ମଧ୍ୟରୁ ୮୬୨ ଓ ୮୫୪ ଛାତ୍ରୀଙ୍କ ମଧ୍ୟରୁ ୮୪୫ ଜଣ କୃତକାର୍ଯ୍ୟ ହୋଇଛନ୍ତି। ଛାତ୍ରଙ୍କ ପାସ୍ହାର ୯୮.୮୫% ଥିବା ବେଳେ ଛାତ୍ରୀଙ୍କର ୯୮.୯୫% ହୋଇଛି। ଅନୁସୂଚିତ ଜାତି ବର୍ଗ ପରୀକ୍ଷାର୍ଥୀଙ୍କ ପାସ୍ହାର ୯୮.୯୮%, ଅନୁସୂଚିତ ଜନଜାତି ବର୍ଗର ୯୮.୫୫% ଓ ଅନ୍ୟାନ୍ୟ ପଛୁଆ ବର୍ଗ ଛାତ୍ରଛାତ୍ରୀଙ୍କ ପାସ୍ହାର ୯୭.୭୩% ରହିଛି। ଦଶମ ଓ ଦ୍ବାଦଶ ଶ୍ରେଣୀ ପାଇଁ ରାଜ୍ୟ ଟପର୍ ତାଲିକା ପ୍ରକାଶ କରାଯାଇ ନାହିଁ। ଦେଶ ଓ ବିଦେଶରେ ବୋର୍ଡ ଅଧୀନରେ ଥିବା ବିଦ୍ୟାଳୟଗୁଡ଼ିକର ପରୀକ୍ଷା ଫଳକୁ ଦେଖିଲେ ଦଶମ ଶ୍ରେଣୀରେ ୨,୬୯୫ ବିଦ୍ୟାଳୟର ୨ଲକ୍ଷ ୪୩ ହଜାର ୬୧୭ ଛାତ୍ରଛାତ୍ରୀ ପରୀକ୍ଷା ଦେଇଥିଲେ। ସେମାନଙ୍କ ମଧ୍ୟରୁ ୯୯.୪୭% ପାସ୍ କରିଛନ୍ତି। ଛାତ୍ରୀଙ୍କ ପାସ୍ହାର ୯୯.୬୫% ଓ ଛାତ୍ରଙ୍କ ପାସ୍ହାର ୯୯.୩୧% ହୋଇଛି। ଦ୍ବାଦଶ ଶ୍ରେଣୀରେ ୧୩୬୬ ବିଦ୍ୟାଳୟର ୯୯ ହଜାର ୯୦୧ ଛାତ୍ରଛାତ୍ରୀ ପରୀକ୍ଷା ଦେଇଥିଲେ। ସେମାନଙ୍କ ମଧ୍ୟରୁ ୯୮.୧୯% ପାସ୍ କରିଛନ୍ତି। ଛାତ୍ରୀଙ୍କ ପାସ୍ହାର ୯୮.୯୨% ଓ ଛାତ୍ରଙ୍କ ପାସ୍ହାର ୯୭.୫୩% ହୋଇଛି।