ଚେତାବନୀ ଦେଲେ ମୁମ୍ବାଇ ଅଦାଲତ: ଆଗାମୀ ଶୁଣାଣିରେ କଙ୍ଗନା ହାଜର ନହେଲେ ଜାରି ହେବ ଜାମିନଯୁକ୍ତ ଗିରଫ ପରୱାନା
ମୁମ୍ବାଇ: ବଲିଉଡ ଅଭିନେତ୍ରୀ କଙ୍ଗନା ରାନାୱତଙ୍କୁ ଚେତାବନୀ | ବାରମ୍ବାର କହିବା ସତ୍ୱେ କଙ୍ଗନା କୋର୍ଟରେ ହାଜର ହେଉନଥିବାରୁ ଆଜି ଅନ୍ଧେରୀର ମେଟ୍ରୋପୋଲିଟାନ୍ ମାଜିଷ୍ଟ୍ରେଟ କଙ୍ଗନା ରାନାୱତଙ୍କୁ ଶେଷ ସୁଯୋଗ ଦେଇଛନ୍ତି | ଗୀତିକାର ଜାଭେଦ ଅଖତରଙ୍କ ଦ୍ୱାରା ଦାଖଲ ହୋଇଥିବା ମାନହାନି ମାମଲାର ପରବର୍ତ୍ତୀ ଶୁଣାଣିରେ କୋର୍ଟରେ ହାଜର ହେବାକୁ କଙ୍ଗନାଙ୍କୁ ଶେଷ ସୁଯୋଗ ଦିଆଯାଇଛି । ହାଜର ନହେଲେ ଅଭିନେତ୍ରୀଙ୍କ ବିରୋଧରେ ଜାମିନଯୁକ୍ତ ଗିରଫ ପରୱାନା ଜାରି କରାଯିବ ବୋଲି କୋର୍ଟ ସ୍ପଷ୍ଟ କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ଆଜି ମାମଲାର ଶୁଣାଣି ସମୟରେ କଙ୍ଗନାଙ୍କ ପାଇଁ ହାଜର ହୋଇଥିବା ତାଙ୍କ ଓକିଲ କୋର୍ଟଙ୍କୁ କହିଥିଲେ ଯେ, କଙ୍ଗନା ଦେଶରେ ନାହାଁନ୍ତି ତେଣୁ ଆଜି ଶୁଣାଣି ସମୟରେ ସେ ଉପସ୍ଥିତ ରହିବେ ନାହିଁ। ଏହା ସହ କଙ୍ଗନା କୋର୍ଟରେ ବ୍ୟକ୍ତିଗତ ଭାବେ ଉପସ୍ଥିତ ରହିବାରୁ ମୁକ୍ତି ଚାହୁଁଛନ୍ତି ବୋଲି କହିଥିଲେ କଙ୍ଗନାଙ୍କ ଓକିଲ। ଏହା ଶୁଣି ଜାଭେଦ ଅଖତରଙ୍କ ଓକିଲ ଜୟ ଭରଦ୍ୱାଜ ଏହାକୁ ବିରୋଧ କରିଥିଲେ ଏବଂ କଙ୍ଗନା ଆଗାମୀ ଶୁଣାଣିରେ ହାଜର ନହେଲେ ତାଙ୍କ ବିରୋଧରେ ଜାମିନଯୁକ୍ତ ଗିରଫ ପରୱାନା ଜାରି କରିବାକୁ କହିଥିଲେ।
ମହାମାରୀ ସମୟରେ ଉଭୟ ପକ୍ଷର ଶୁଣାଣି ପରେ ଅନ୍ଧେରୀ ମେଟ୍ରୋପଲିଟାନ ମାଜିଷ୍ଟ୍ରେଟ ଆର.ଆର ଖାନ କହିଛନ୍ତି ଯେ, ଯଦି କଙ୍ଗନା ଆଗାମୀ ତାରିଖରେ ଉପସ୍ଥିତ ରହିବାକୁ ବିଫଳ ହୁଅନ୍ତି, ତେବେ ତାଙ୍କ ବିରୋଧରେ ଜାମିନଯୁକ୍ତ ଗିରଫ ପରୱାନା ଜାରି କରାଯିବ।